424/2022-2023
Saitual, the 6th May, 2022: India ram zalenna kum 75 na tlin hriatrengna leh lawmna kûtpui, Azadi Ka Amrit Mahotsav (AKAM) denchhenin vawiin khan Ngopa RD Block huamchhung khuate tan Ngopa CHC ah National Health Mission (NHM) bultumin hriselna kûtpui 'Block Level Health Mela' buatsaih a ni.

He hunah hian District Hospital Champhai leh CMO Office Champhai atanga inenkawlna leh hmanraw neih ken theih tha ber berte thawhchhuahpui a ni a. Health Mela kaltlang hian District Hospital Champhai pan remchang lo leh harsatna neite tan remchanna siam sak mai bakah, health service hrang hrangte chhawp hnaih sak an ni a, mipuiten an hlut hle a ni. A thlawna inentir leh damdawi semchhuahna hun hman a ni.

District Hospital Champhaia Department hrang hranga Doctor thiam ten inentirna clinic an hawng a. Inkaichhawn theih loh natna lam te, zuk leh hmuam kaihhnawih lam te, rilru hriselna lam te, HIV/AIDS kaihhnawih lam te, ECG, X-Ray, Ultrasound, Family Planning & Councelling bakah Mobile Medical Unit thlenga buatsaih a ni a, khawl changkang zawk hmanga sample endik tulte pawh lak a ni a. He hunah hian Ayushman Bharat Digital Mission hnuaia India khua leh tui tinin hriselna kaihhnawih ID hran (Unique Health ID) an neih tur atana lo inziah lawk theihnate pawh kalpui niin, Specialist leh Doctor thiam tak takte chu mipui rawn theih turin clinic hawngin nilengin an thu a ni.

Chhinchhiah danin vawiina Block Level Health Mela, Ngopa CHC a buatsaihah hian Clinic/stall 15 hawn a ni a, damlo mai bakah mahni hriselna thlithlaia inentir mi 1200 chuang an awm tling a, remchanna leia Doctor hrang hrangte rawn khawp nghal an awm nual bawk a ni. He hunah hian Champhai atangin Doctor 9 leh an thawhpuite, an vaiin mi 30 chuang hret an tel thei a, Ngopa CHC MO leh Staff ten an tawiawm bawk a ni.

Undivided Champhai District bikah Block Level Health Mela hi April ni 18, 2022 khan Hnahlan PHC ah Champhai RD Block tan neih a lo ni tawh a. Khawbung RD Block tan Khawbung PHC ah April ni 21 khan neih niin, April ni 26 khan Khawzawl RD Block tan Kawlkulh PHC ah neih a lo ni tawh bawk a. Ngopa RD Block tana April ni 29 a neih tura ruahmanna siam tawh chu hrileng vanga a hun sawn hlat a nih hnuah vawiin May ni 6, 2022 hian Ngopa CHC ah hlawhtling taka buatsaih a ni.