423/2022-2023
Aizawl, 6th May, 2022 : Vawiin khan State Literacy Mission Authority (SLMA) Governing Council leh Executive Committee chu School Education Directorate Conference Hall-ah an thukhawm a. School Education Minister Pu Lalchhandama Ralte hovin he meeting hi neih a ni.

Minister chuan he meeting-ah hian thusawiin New India Literacy Programme hnuaiah ziak leh chhiar zirtir kawngah i angrual ang u tiin kalkhawmte a sawm a. Minister chuan he programme-ah hian thawktute mai bakah kohhrante leh tlawmngai pawlte chu anrualpuiah a sawm a ni. Minister chuan ziak leh chhiarah Mizoram chu a sang ber pawl kan nih avangin Mizoram zahawmna vawng nung a, tithangmawi zel turin i angrual ang u tiin kalkhawmte a sawm a ni.

Minister chuan Mizoram chu digital literacy lamah pawh kan hniam lova, state dangte nena khaikhin pawhin a ha pawl tak kan ni a, chhiarpui neih hunah pawh NILP tehfungah ziak leh chhiar thiam hian digital literacy a huam tel avangin heti lama kan hmasawnna hi hmuh hmaih loh nise a ti a. Ziak leh chhiar zirtirah school-a thawktute an rim deuh dawn a, chutih rualin kohhran leh tlawmngai pawlte pawh kut ke pawimawh annih avangin theih tawp chhuah turin a sawm bawk.

Meeting-ah hian Samagra Shiksha SPD Pu Lalhmachhuana chuan New India Literacy Programme (NILP) chu a sawifiah a, he programme hian kum 15-35 inkar a tinzawn dawn a, a hnuai lam chu RTE in a huam sa a ni. Kum 2030-ah India ram mipui chu ziak leh chhiar thiamtir vek tum a ni a, he programme hian ziak leh chhiar thiam lo mi vaibelchhe 5 te chu a tinzawn dawn a, kumtin vbch 1 zel thiamtir tum an ni dawn a ni.

Meeting-ah hian Minister bakah School Education Secretary Dr Lalzirmawia Chhangte, Social Welfare Secretary Pi Sangchin Chinzah te, School Education Department leh Samagra Shiksha officer-te, service association hruaitute, kohhran leh tlawmngai pawl hruaitute an tel a ni.