United Nations hnuaia Food & Agricultre Organisation (FAO) India Representative leh a hotu lu ber Dr. Peter Kenmore, PhD(Agriculture cology) leh a team te chuan Mizoram sorkar NLUP kalpui dan rawn thlithlai turin vawiin khan Aizawl an lo thleng a. NLUP Nodal Minister Pu H.Liansailova chu a office ah hmuin Chief Secretary Pi L.Tochhong leh mi pawimawh dangte nen meeting an nei a. Minister an hmuh hnu hian Chief Minister Pu Lal Thanhawla chu a chenna bungalow ah an hmu nghal bawk a ni.

Pu Liansailova chuan NLUP chungchanga Mizoram sorkar hmalakna leh project dinhmun tlangpui te a lo hrilh a. Dr.Kenmore chuan Bangladesh Chittagong hilltracts leh Nepal ah te NLUP ang project hi kalpui ve a nih thu sawiin heng ram pahnih te hi FAO-in a puih dan te a sawi a. Heng ram pahniha FAO hmalakna te nen Mizoram sorkar NLUP chu thlunzawm tura thawhhona kawng dawp chu phurawm a tih thu sawiin NLUP atana Mizoram in technical support a mamawh te pe turin FAO chu a tangkai thei dawn niin a tarlang.

Dr.Kenmore hi a nupui, Pi Zenaida Flores Kenmore M.Sc, M.A (Anthropology) leh Dr. Antonia Patiwal PhD(Agro-Forestry) ten an rawn tawiawm a. Naktukah Baktawng, Serchhip leh Thenzawlah te NLUP project kalpui na hmun hrang hrang te an tlawh dawn a ni.