Vawiin khan Mizoram Information Commission leh I&PR Dept. tangkawpin Lunglei SP Office Conference Hall, Venglai-ah ‘RTI Week 2013’ puala inkhawm chu State Information Commissioner Pu L.Hrangnawna, IPS (Rtd) hovin hman a ni a. He hunah hian Lunglei-a sorkar Department hrang hranga SPIO, SAPIO leh DAA bakah tlawmngai pawl, zirna in hrang hrang, political parties aiawhte leh chanchinbumite kalkhawmin RTI Act zirchianna bakah zawhna leh chhanna hun an hmang a ni.

RTI Week 2013 puala inkhawm Pu K.Vanlalthiana, SDO(S) kaihhruaiah hian Information Commissioner Pu L.Hrangnawna chuan India ramah RTI Act tobul chungchang leh ram dangah te RTI Act kalpui a nih mek dan te a sawi a. Mizoramah June ni 29, 2006-ah Mizoram Information Commission (MIC) din a nih atanga kumin September, 2013 thlengin RTI Act hmanga zawhna lut tawh zawng zawngte chu 4222 a ni, a ti. Nikum March, 2012 atang khan Mizoram Information Commission hi National Federation Information Commission of India a zawm tawh a; kum tin RTI Week chhung hian New Delhi-ah rampum huap ‘Annual Convention of Chief Information Commissioners & Information Commissioners’ neih thin a nih thu a sawi. Mizoram Information Commission hian mipuite tan awlsam zawka anmahni dawr theih turin website www.mic.mizoram.gov.in a neih thu leh RTI chungchang lehkhabu leh booklet-te pawh buatsaih a nih thin thu a sawi bawk a. Kumin RTI Week pualin lehkhabu thar ‘A Wider Study of RTI Act with Questions Commonly Asked’ tihchhuah a nih thu sawiin Pu Hrangnawna chuan mipuiten RTI Act an hmelhriat zual nan advertisement, magazine, poster, banner, TV channel leh chanchinbu hrang hrang hmangin tanlak a nih mek thu a sawi a. Sorkar laipui chuan kumin August ni 21 atang khan ‘RTI ONLINE’ buatsaih tharin www.rtionline.gov.in ah a duh apiang tan awlsam taka RTI chungchang a zawhfiah theih a nih tawh thu kalkhawmte a hrilh bawk a ni.

Information Commissioner Pu L.Hrangnawna chuan RTI Act kaltlanga zawhna zawh dan kawng dik chungchang sawifiahin mipuiten Act an hmelhriat tawk loh avangin harsatna an tawk thin a ni, a ti a. Sorkar Department hrang hrangte pawh RTI Act kaltlanga zawhnate chu huphurhna nen hmachhawn lovin mahni department theuhte dinhmun leh hmalakna hrang hrang chungchang felfai taka vawnthat phah nan hmang tangkai zawk turin a chah a ni.

Vawiina RTI Week pual inkhawmah hian Pu L.H.Shanliana, DIG (SR) Lunglei leh Dr. Andrew H. Vanlaldika, Addl. DC Lunglei te pawhin sorkar department leh pawl hrang hrang ten RTI Act chungchangah an hriat tur thil pawimawhte sawizauna hun an hmang a. RTI Week inkhawm zawhah Information Commissioner Pu L.Hrangnawna chuan Lunglei chanchinbumite kawmna hun a hmang zui nghal bawk a ni.

India ramah RTI Act hi October ni 12, 2005 atang khan rampumah (Jammu & Kashmir tiam lovin) hman tan a ni a. He Act-in a tum ber chu sorkar dik, felfai leh langtlang din leh mipuiten sorkar hmalakna hrang hrang chungchang an hriat duh ang ang zawhna hmanga awlsam taka an hriat theih nan a ni.