Aizawl District huam chhunga Assembly inthlan senso tur thil chi hrang hrang sawi hovin vawiin chhun khan District Election Officer leh Aizawl DC ni bawk, Dr. Franklin Laltinkhuma hovin political party hrang hrang aiawhte DC Office Chamber-ah an thukhawm. DEO chuan party tin aiawhte chu election sum hman ral thlithlai kawnga an hritat tur pawimawhte chipchiar takin a hrilhfiah hmasa a. Revised Format of Affidavit-te pawh party tinte hnenah hian sem nghal a ni. Vawiin meeting-ah hian Aizawl District huam chhunga MLA candidate tin ten sum an hman ralna tur thil chi hrang hrang- hall hman man te, banner leh poster siam man te, lirthei senso tur zat leh ei leh in kaihhnawih thil chi hrang hrang tur te riruatin an bituk fel a. Hei hi Election Commission of India duh dan anga candidate tinte sum hman ral vilna tur (Expenditure Monitoring) a ni. Vawiin meeting-ah hian candidate tinte chu an sum hman ral zat fel leh dik taka vawngtu tur, account lam thiam mi nei vek tura beisei an nih thu hrilh an ni a, heng sum hman ralna record te hi a tul hun apianga election thuneitute endik theih tura kawl reng tura hriattir an ni.

Vawiin meeting ah hian political party hrang hrang aiawhte an tel kimin, an thuhriat duh leh ngaihpawimawh zawngte huam zau tak leh inpawh taka sawi ho a ni. Tarlan tawh thin angin tun tum MLA inthlanna turah hian ECI chuan Candidate pakhat sum sen zat tur cheng nuai 8 ah a bituk fel tawh a, nomination file dawnah inthlan pual hian candidate tinin bank account hranpa cheng nuai 8 aia tam lovin an hawng tur a ni a. Inthlan chhung zawnga an sum sen chu he account atang chauh hian an hmang thei ang.