1969/2023-2024

Aizawl, the 21st September 2023: India rama hospital ṭha zual leh damlote tana him tehna, National Quality Assurance Standard (NQAS) hmanga endik an nih hnuin Ni 12th September 2023 khan Aibawk Primary Health Centre(PHC) leh Thingsulthliah Primary Health Centre(PHC) te chu NQAS Certificate pek an ni.

Thingsulthliah PHC hi Chief Medical Officer, Aizawl East District hnuaiah awmin Dr. Thanmawii chu Medical Officer niin, Aibawk PHC hi Chief Medical Officer, Aizawl West District hnuaiah awmin Dr. Zoliankimi Ngente chu Medical Officer a ni bawk.

NQAS hnuaiah hian PHC damdawi in endikna standard hi 50 awmin, heng standard hrang hrang hnuaiah hian endikna point chi hrang hrang 1419 (sang khat za li sawm leh pakua) a la awm leh a. Hemi endikna point bakah hian Hospital Staff zawng zawngte’n interview an hmachhawn vek bawk a ni. Heng damdawi in pahnihte hi July 24-27, 2023 inkarah khan State pawn aṭanga lo kal, NQAS External Assessor, Ministry of Health & Family Welfare, Govt of India rawn tirh te chuan an rawn endik a. He’ng tehna hrang hrang hmanga tehnaah hian Aibawk PHC hian 89.38% hmuin, Thingsultliah PHC te hian 84.78% an hmu a ni.

PHC endik tura National Assessor ko lut tur hian damdawi in an endik turte chuan endikna chhawng thum an paltlang phawt a ngai a, District level-a endiknaah leh anmahni lo intehna (Internal Assessment)-ah 70% tal an hmuh phawt hnuah State chhunga NQAS Internal Assessor te’n an endik leh a, State-level certificate pek an nih hnuah chauh National Assessor-te koh luh theih an ni.

National Quality Assurance Standard (NQAS) hi National Health Mission (NHM) hnuaia programme pakhat niin, India mipuite’n Sawrkar hospital ṭha kan neih theihna tura kalpui a ni a. Hetianga NQAS programme-in hmasawnna duhawm tak a nei hi Dr. Eric Zomawia, Mission Director, NHM chuan thawktute ṭanrualna fakin, an inpeknaah lawmthu a sawi a, kumin kum kal lai mekah hian damdawi in dang pasarih pawh NQAS National Assessment hmachhawn tura inbuatsaih mek an awm thu a tarlang bawk.

Mizoram a damdawi in zingah Civil Hospital Aizawl chu kum 2017 khan NQAS certificate hi hlan niin, India ram puma district hospital zingah NQAS certificate dawng hmasa ber pahnihte zinga mi a ni. Civil Hospital Aizawl hnuah hian Urban Public Health Centre (UPHC), ITI Veng chuan kum 2019 khan NQAS certificate hi an lo dawng tawh bawk a ni.