1968/2023-2024

Aizawl the 21st September, 2023: Art & Culture Department, Govt. of Mizoram leh Mizo Academy of Letters, Aizawl tangkawp buatsaih Mizo Tawng Zirhona Seminar -2023 chu Chanmari YMA Hall, Aizawl-ah hman a ni a. Pu R. Lalzirliana, Art & Culture Minister chuan khuallian niin a hmanpui.

Khuallian chuan thu sawiin Art & Culture Department hotute leh Mizo Academy of Letters (MAL) lama hruaitute'n vawiin ang programme hlu tak buatsaih nachang hria a, mi thiam ko khawma Mizo Tawng zirhona tur hun remchang an siam chu lawmawm a ti a, a hlawkthlak hle a beisei thu a sawi sawi. MAL-in Mizo tawng humhalhna kawngah leh kan tawngin hma a sawn zel theih nana hma an lo lak tawhna-ah te lawmthu a hrilh a, hmalam an pan zelna turah tha thlah lova bei zel turin duhsakna a hlan. Tawng pawimawhzia sawiin, “Tawng kan tih chuan, kan ka atanga ri kan tihchhuah, thil awmzia sawifiah nan leh kan rilru puan chhuah nana kan hman piahlamah, thil reng reng a nihna lantirtu a ni a. Tawngin a sawifiah zawh loh chu mihring tu tan mah hriatthiam tak tak ngaihna a awmlo thin; chuvangin tawng hi thil engkim nihna petu leh awmzia hrilhfiahtu a ni,” a ti.

Minister chuan kan Missionary hmasa te zarah A AW B (Mizo Script) kan nei thei chu kan tawng humhalhna kawngah a pawimawh hle tiin, “Tawng reng reng tipuitlingtu chu a ziak, Sap hovin a Script an tih hi a ni a, Tawng script neih loh chuan, eng ang tawng upa leh hman nasat pawh ni se, humhalh a har em em a ni. India ram chhungah ringawt pawh hian tawng hrang hrang, ziak nei lo, a hmangtu tlem tial tial, boral mai hmabak hi tam tak an awm a. Mizo tawng hi Latin Script atanga kaih-lek ni mahse, script puitling, alphabet hrang thlap nei kan ni a, hnam dang tam tak ai chuan kan vannei hle a ni tih hre thar leh theuh ang u,” a ti. Tawng chu danglam reng a ni a, thumal thar lo piang te, tawng dang atanga seng lut te a awm ve reng a, chutihrual chuan thumal thenkhat hman zui loh leh thlauhthlak a awm thin bawk tiin Mizo tawng hi a lo hausak deuh deuh theih nan engtin nge hma kan lak zel ang tih te pawh hi vawiin sawiho atan pawh a that a rin thu a sawi bawk. Tawng humhalh tur chuan kan tawng kan zirchian a tul a, kan Tawng neihchhun, Mizo Tawng hi kan tihchangtlun zel a, a hmangtute’n inang tlangin a hman dan tur dik taka hmang thei tura kan inzirtir a, kan inhrilhfiah a ngai a, Mizo Tawng tan hian theihtawp chhuah zel turin kalkawmte a chah a ni.

Seminar hawnna inkhawm hi Pi Carol VLMS Dawngkimi, Director, Art & Culture Department chuan a kaihruai a, Prof R.L. Thanmawia, President, MAL-in Keynote Address pein thusawina hun a hmang a ni.

Vawiin Mizo Tawng Zirhona Seminar Technical session-ah hian Pu Rozama Chawngthu paper buatsaih ‘Mizo Tawng Kalphung leh nihphung’ leh Dr. Darchuailova Renthlei, Asst. Secretary, MAL paper buatsaih ‘Mizo tawng kauchheh leh ziak dan dik’ tih thupui zirhona leh sawihona hun an hmang a. Pu K. Lalruala, Dy. Director, Art & Culture Deptt. Chuan seminar kharna hun hmangin college leh school naupang he seminar chhimtu zawng zawngte hnenah Certificate pek vek an ni bawk.