Tukin dar 8:00 khan India rama state dang zawng zawng te rualin Mizoram Police pawhin 1.9.2010 - 31.8.2011 chhunga ral kuta Police thi sunna hun 1st Battalion MAP Lammual, Armed Veng-ah an hmang. Hemi hun chhung hian state hrang hrang 24-a police thi te leh paramilitary force - BSF, CISF, CRPF, ITBP, NFG, RPF leh SSB - hnuaia thawk mi 634 te sunna hun Mizoram DGP Pu Lalrokhuma Pachuau hovin hman a ni.

Vanneihthlak takin hemi hun chhung hian Mizoram Police te zingah ral kuta thi an awm lova; Assam-9, Arunachal Pradesh-4, Manipur-ah 14, Meghalaya-5, Nagaland-3, Tripura-2 leh Sikkim-ah 1 kan thenawm state ten an police te an chan a ni. He Ni hi ‘Police Commemoration Day’ tia serh thin a ni a; ni 21 October 1959 khan Ladakh (Jammu & Kashmir state ni ta) hmuna police outpost chu China sipai ten an rawn bei thut a, hetah hian police mi 9 laiin ram tan an nunna an hlan a. He Ni behchhan hian rampumah Police Commemoration Day hi hman thin a lo ni ta a ni.

Mizoram DGP Pu Lalrokhuma Pachuau chuan “Mizoram venghim tur ringawt kan ni lova, a tul hun apianga India ram leh hnam tana koh theih reng kan ni tih i hre thar leh ang u. Police te thuam chak nan tunah hian M-4 silai, America sipai ten Iraq-a an hman ang chi te, ral laka police-te himdama an veivahna tur lirthei ‘troop carrier’ pawh lei tum mek a ni a, forensic science pawh tihchangtlun tum a ni” a ti.

1^st MAP lammuala police sun takte puala inkhawm neih zawh hian DGP leh Mizoram Police hotuten Martar Thlan-ah pangpar an dah a ni.