1711/2025-2026 

Aizawl, the 3rd October 2025 :  India rama sawrkar damdawi in ṭha bik tehnaah Primary Health Centre pathum an tling thar a, heti hian Mizoram chhunga HWC-PHC 57 target awm zinga 34-in National NQAS certificate an nei tawh a ni.

Dr. Lily Chhakchhuak, Mission Director, National Health Mission, Health & Family Welfare Department chuan India rama sawrkar damdawi in ṭha bik tehna, National Quality Assurance Standards (NQAS)-a tling thar Phullen PHC, Hnahlan PHC, leh Reiek PHC te hian 90.68%, 93.36%, leh 90.76% te an hmu a tih a sawi.

Reiek PHC hi Aspirational Block Programme (ABP) hnuaia mi niin ABP hnuaiah hian target pasarih awmin State certified 5 (panga) leh National certified 4 (pali) an awm mek a ni.

Health Minister Pi Lalrinpuii pawhin lawmawm a tih thu sawiin, heng NQAS certified sawrkar damdawi in kan neih te hi mipuite’n kan hman ṭangkai thiam a pawimawh hle tih a sawi a ni.

Heti hian Mizoram chhunga Sawrkar damdawi in 47 te chu NQAS national certificate nei tawh an ni a. Tunah hian sawrkar damdawi in 19 leh HWC Sub-Centre 21-in state level certificate nei mekin national certificate result nghak mek 4 an awm bawk a ni.

National Quality Assurance Standards (NQAS) certified damdawi in te hi endikna chhawng thum paltlang an ni a, a tawp bera endikna an hmachhawn hi National External Assessment a ni a, state pawn aṭangin Assessor an lo kal ṭhin a ni. Hetah hian 70% an hmuh chuan certified an ni chauh ṭhin. Heng certified tawh damdawi inah te hian natna darh thei ven kawngah te, thawktu zawng zawngte an hna bil an thiamna te, an level zelah enkawlna an pek ṭhat dan te, a thlawna enkawlna leh damdawi pek te, damdawi in faina leh dik taka damdawi in bawlhhlawh sawngbawl te, hawihawmna leh a chhehvel vawnfai kawngah te, environment vawn ṭhat kawngah te endik an ni.