India ram ni zung chakna hmanga tui pump project lian ber Kelkang Water Supply Scheme chu vawiin khan bialtu MLA, NLUP Implementing Board Chairman ni bawk Pu JH Rothuama’n a hawng a, PHE Department changtu Minister Pu Zodintluanga pawhin he hun hi a hmanpui a ni.

Water Supply Scheme hawnna hi Kelkang Community Hall-ah buatsaih niin khuallian Pu JH Rothuama chuan mipui kalkhawmte hma ah thu sawiin harhna in a awmchilh hnu a Kelkang khua mikhualin an chim buai nasat zia ngaihtuahin Kelkang khaw mipuite dawhtheihna leh inpekna te avangin Pathianin mal a sawm ni a a hriat thu a sawi a, Kelkang khaw chhawmdawlna atan NLUP kaltlangin tui dahkhawlna tur tuizem, bawlhhlawh bawm, ek in khur leh thil dang mamawh zualte ngaihtuah anih bakah tui tlan tur hnianghnar an neih theih nan kawng chi hrang hrang dap ani bawk a, mak tak main an beisei phak baka tha in Pathianin kawng a hawng zel ani a ti a, Kelkang Water Supply Scheme chu India ramah a ni zung chakna hmanga tui pump project lian ber anih thu leh Asia ah pawh a lian ber anih an rin thu solar pump hmanrua siamtu Company te pawhin an sawi hial a ni a ti a, chuvang chuan Kelkang khaw mipuite chu an khaw rohlu an neih thar chu roh tak leh duat taka enkawl turin a chah a, buh leh bala an intodelh a khawtlang malsawmna an dawnna hnar pakhat ni ngei se a duh thu a sawi a ni.

Inkhawm kaihruaitu Pu Zodintluanga pawhin Kelkang khaw mipuiten Pathian malsawmna an dawng chu a lawmpui bakah malsawmna an dawnna hmanrua atana PHE Department Pathianin a hmang chu amah pawhin vanneihthlak a tih thu leh lawmawm a tih thu a sawi a, bialtu MLA in Kelkang Water Supply Scheme a hlawhtlintheihna tura hma a lak dan leh a thahnemngaihna zawng zawng hriatpuitu anih avangin a lawmna pawh a nasa lehzual ani a ti bawk. Pu Zodintluang chuan NLUP Apex Board in Kelkang khua in tui an mamawhna hria in ruahmanna a siam hnu ah NLUP Implementing Board kaltlangin chak takin hma lak a ni a, NABARD leh PHE Department te nen tanghovin anmahni kaltlangin he ruahmanna pawh hi a lo puitling thei ta a ni a ti a, project thawh zawh hun tura ruahman lawk sa aia kum khat a hma a thawh zawh ani te hian Pathian awmpuina leh thawktute inpekna nasatzia a tarlang ani a ti a, Pathianin a mipuite tan hnathawk turin Sawrkar a hmang a, Sawrkar pawhin hei hi hria in theihtawp a chhuah a ni a ti bawk. Minister chuan NLUP hmawr bawk ani tan tawh a tun atanga reilote ah tanpuina sum dawng zinga thawk tha leh thawk tha lo pawh thliar hran an awl tawh dawn a, chuvang chuan theihtawp chhuaha NLUP malsawmna an dawnte hlawhtlinpui ngei turin NLUP tanpuina dawngtute a fuih bawk a ni.

Er. Lalmuanzova, E-in-C, PHED pawhin Kelkang Water Supply Scheme chu a mak deuh bik tih bak sawi ngaihna a hriatloh thu sawiin India rama Project lian ber ni si heti taka thil a kaltluang leh hna thawh a chak lutuk te chu thil danglam tak a ni a, Pathian awmpuina vang ani tih bak sawi ngaihna a hriat bik loh thu a sawi a ni.

Kelkang Water Supply Scheme (Solar Pump) ah hian ni zung chakna hmangin Bangla lui tui pump a ni a, hemi atan hian Bangla lui chu litre 20,000 dawng turin an khuap a, Bangla lui atang hian booster pump hmun thumah siamin metre 520 a sang Kelkang Vengchunga Tuizem lian Main Reservoir tui litre 1,00,000 dawngah an chhung lut a, Main reservoir bakah hian tui litre 50,000 dawng Zonal tank Kelkang Thlanmual chungah siam a ni bawk.

Kelkang Water Supply Scheme hi NABARD kaltlanga Rs nuaih 631 senga sak niin, a satu contractor te hi Pu H.Sanga, CCChanmari, Aizawl leh M/s P&V Eastern Engineers, Bawngkawn, Aizawl te an ni a, mipui 2000 chawm thei tura ruahman niin ni zung chakna hmang tura ruahman anih angin tui pump khawl chawm tur hian Solar plate 204 hman a ni a, kumtluanin nitin tui litre 82,000 pump thei tura ruahman ani bawk. Solar pump house panna hi khua atanga kilometer 6 a hla ah awmin kilometer 4.5 hi laih thar a ni a, Treatment plant ah hian Stilling chamber litre 1000 dawng, Sedimentation tank tui litre 45,000 dawng leh Filter house a awm a, Bangla lui atanga tui pump chhuah te hi mihring tan pawh a in tlak vek a ni. He project hi December, 2015 atanga tan niin thla 18 chhunga zawh fel tura ruahman a ni a, hna thawh tan anih atanga thla 7 chhungin zawhfel a ni nghe nghe a ni.

Vawiina Kelkang Water Supply Scheme hawnna inkhawm buatsaih anih hma hian Kelkang atanga kilometer 6 a hla a awm Solar Pump House chu Pu JH Rothuama, NLUP Implementing Board Chairman hian hawngin Feeder Pump a ti nung nghal a, hemi zawh hian Pu Zodintluanga, PHED Minister chuan Booster Pump – 1 khawl a ti nung veleh a, PHED E-in-C Er. Lalmuanzova’n Booster Pump-2 khawl ti nung chhunzawmin Champhai District Bawrhsap Pu Vanlalngaihsaka, IAS in Booster Pump-3 khawl a hmet nung veleh a ni.

Vawiina Kelkang Water Supply Scheme hawnna ah hian Aizawl leh Champhai atang sawrkar mipawimawh thahnemtak an tel a ni.