Ni 3 awh Mizo Infiamna Kutpui-2016, Mizoram State Sports Council (MSSC) in a buatsaih chu vawiin chawhnu khan MSSC Sport Complex, Ramhlunah kharna hun hman a ni a. Pu PC Lalthanliana, Minister, Social Welfare etc. chu khuallian niin a hmanpui.

Khuallian chuan thu sawiin MSSC in Mizo infiamna a buatsaih chu lawmawm tiin tunlai khawvel thangzelah Mizo thalai ten Mizo Infiamna an hriatloh a hlauhawm a, Mizo Infiamna tluka hlu hi Mizo te tana hlu a awm lo tiin mahni Culture leh Infiamna lam hriatchian hi hnam zahawmna a ni a ti bawk.

Branch YMA atanga hruaitu leh infiammi kal khawm te chu fuihin, Hnam dang tan pawha chhim chakawm khawpa kan infiamna hi kan hlut thiama kan chawisan zel a pawimawh a ni a ti. Infiamna kutpui tihlawhtling tura tha thawh tu zawng zawng chungah lawmthu a sawi a ni.

Kharna inkhawm hi Pu John Kima, Vice President MSSC in a kaihruai a, Mizo infiamna hrang hrang 16 hmangin infiamna neih a ni a, Branch YMA 17 atangin mi 921 an tel a, a pumpuia titha ber chu Durtlang North Branch YMA niin vawiin tlai khan lawmman semna neih nghal a ni.