Taxation Minister Pu Zodintluanga chuan ram pum thlir chuan chhiah khawn chungchangah hian mipui lamin sorkar an nghah laiin, Mizoram ah erawh chuan Taxation Department hian, mipui chet nghakin englai pawhin sumdawng leh chhiah pe tu zawng zawng te tan, zangkhai leh awlsam taka chhiah an pek theih nan tunlai thiamna hmangin ruahmanna changkang tak an buatsaih zawk a ni, a ti.
He thu hi vawiina Taxation Department-in E-Audit Module Training, Mizoram Legislative Assembly Annexe Conference Hall-a a buatsaih hmanpuia a sawi a ni a. Sumdawngte tana an thawhrimna leh remhriatna ah Minister chuan Taxation Department chu fakin chhiah lak pawh nasa taka a pun chhoh thu a tarlang a, chung sum chu ram hmasawn nana tangkai taka hman zel a nih thu te a sawifiah bawk. PGCIL ruaiin Internet chak tha zawk neih nan Optical Fibre Cable pawh buaipui mek a nih thu sawiin Pu Zodintluanga chuan thingtlang kilkhawr khaw 300 thlan chhuah ah Rural Information Kiosk buatsaih a nih tawh thu te a tarlang bawk. Mizo thalai thiam tak tak te hnathawhna tur leh an thiamna phochhuaha hralhchhuahnaturinSoftware Technology Parks of India (STPI) buatsaih chhoh mek a nih dan te a sawi lang bawk. MZU kawng chhia chungchang sawiin UD&PA Minister chuan Mizoram Sorkarin a ngaihpawimawh thu leh Sorkar Laipui atanga kawng siamthat nana sum vaibelchhe 19 a rawn sanction atanga theihtawpa thawh chhoh mek a ni, a ti a, ruahtui tlak tam vanga a thawh chak theih loh thu leh mipuiin an tuar chu Sorkarin pawi a tih thu te sawiin Mizorama kawngpui tha ber ni tura ruahman a nih dan te a sawi lang bawk.
Khualzahawm Principal Secretary Pu R.L.Rinawma chuan Taxation Department chu an hmalakna leh hlawhtlinna ah lawmthu hrilhin anmahni Department kaihhnawih Dan te hrechiangturina fuih a, Taxation Department chuan chuan hmalam eng tak neiin Mizorama department tha ber niturintheihtawpa hma la chhunzawm zelturina chah bawk.
Mizoram-ah kum 2005 atanga Value Added Tax (VAT) hman tan a lo nih khan Taxation Department chuan VAT hi computer puihna tel lo chuan hlawhtling taka kalpui a harsa dawn a ni tih a hria a, chuvang chuan computer puihna hmang tangkai tur hian nasa takin hma a la thin a. Kum 2010 atanga e-Governance Project kalpui a nih hnu phei chuan nasa taka hma sawnin, mipui ten Office kal kher ngai lova awlsam taka Department an dawr theihna tur chu internet kaltlangin a chhawp chhuak tawh a, engtik hun leh khawi hmun atang pawhin mipui ten a hnuaia module hrang hrang hmang hian Taxation Department chu an dawr thei ta a, an tangkaipui hle a ni :-
1. E-Registration 3. E-Return 5. E-CST Forms
2. E-Way Bill 4. E-Filing of Invoices 6. E-Payment
Heng mipuite awlsamna e-services te chhawpchhuah a nih hnu hian Department chuan sumdawng ten mipui te chhiah an lak khawm sa Sorkara an chhun luh dik leh dik loh computer hmanga endikna tur e-Audit Module chu peih fel a ni ta a. He e-Audit Module hmang hian sumdawng zawng zawng tena sorkara chhiah an chhunluh chu tehna hrang hrang hmanga khaikhin a ni anga, chhiah pe dik lo ni-a rinhlelhawm sumdawngte chu thlang chhuakin, Department Officials ten Dan angin an dawrah endik hna an thawk anga, thil diklo hmuhchhuah a nih chuan dan anga hmalak chhunzawm zel tur a ni ang.
E-services hrang hrang hmanga midik te awlsamna a pekchhuah rual hian Taxation Department chuan he e-Audit Module hmang hian sumdawng rinhlelhawm te a hmu chhuak zung zung thei dawn a. He Module hian Department Officials te hna a tih awlsam hle dawn bakah Sorkar revenue pawhin nasa taka a pun phah beisei a ni bawk a ni.
E-Audit Module Training hawnna hi Taxation Commissioner Pu Lalthangliana Varte-in a kaihruai a, Pu Lalhmachhuana, Secretary ICT, Pu Lalthlamuana, Chief Informatics Officer, ICT Department leh Pi Lallianmawii, State Informatics Officer, NIC ten an hmanpui bawk.
E-Audit Module Training ah hian Taxation Department Officer 60 ten thupui hrang hrang hmangin an zir ho a ni.
