349/2022-2023
Aizawl, 29th April, 2022 : India ramin zalenna a hmuh kum 75-na lawmna “Azadi Ka Amrit Mahotsav (AKAM)” kal mekah April 28, 2022 – May 4, 2022 inkar hian North East Festival/Iconic Week hmang turin sawrkar laipui chuan ruahmanna a siam a, Mizoram bikah chuan May 2, 2022 – May 4, 2022 inkar hian he hun hi hman tur a ni. North-East Festival/Iconic Week hi Ministry of Development of North eastern Region (DoNER) leh North Eastern Council (NEC) te tangkawpin huaihawtin hemi atana senso zawng zawng hi an tum a ni.

Mizoramah chuan May ni 2, 2022 chawhma dar 10:30 atanga hun hman tan tur a ni a, a bul tan nan Aijal Club-ah Round Table Conference neih a ni ang a, sawrkar laipuiin thupui atana an rawn thlan pahnih “Untapped Eco-Tourism Potential” leh “Potential of Bamboo” hmangin India hmarchhak State hrang hrang atanga mithiam kalkhawm ten sawihona an nei dawn a, DDK, Aizawl chuan live in a pe chhuak ang.

Hemi ni vek chawhnu dar 3:30 atanga tanin Dawrpui Multipurpose Hall-ah Cultural Evening neih a ni dawn a, Chief Minister Pu Zoramthanga’n khuallian niin he hun hi a hmanpui ang.

May ni 3, 2022 chawhma dar 10:45 ah Khuangchera Hall, Ailawng atanga Reiek Tlang chhip thleng “Freedom Trek” neih a ni dawn a, tupawh a duh apiang a tel theih a, lirthei kalna tur nei lo tan zing dar 9:00 ah Vanapa Hall kawt atangin Bus a chhuak ang. Hetih rual hian Reiek Tourist Resort-a Adventure Theme Park chu mipuite tan nilengin a thlawnin hawn a ni dawn a, adventure activities chi hrang hrang - climbing walls, zorbing balls, rifle shooting, zip line, tarzan land leh a dangte a thlawn vekin mipuite tan hawn a ni ang a, tui in tur leh theitui a thlawna sem a ni bawk ang.

May ni 2 atanga ni 4 inkar hian Dawrpui Multipurpose Hall-ah Exhibition-cum-Sale huaihawt a ni dawn bawk a, sawrkar department hrang hrang l2 chuangin an kutchhuakte man tlawm zawka an zawrh dawn bakah mipuite tana rawn theih turin an inchhawp chhuak dawn a ni.

North East Iconic Week chhim turin Mizoram sawrkar chuan mi zawng zawng a sawm a ni.