350/2022-2023
Kolasib dated 29th April 2022: Vawiin khan DC Conference Hall, Kolasibah Pradhan Mantri Awas Yojana - Housing For All (Urban) District Screening Committee chuan thutkhawmna neiin Kolasib district chhung a Kolasib, Kawnpui, Bairabi leh Vairengte khaw huam chhung atanga dilna lutte an enho a ni.

He hun hi Pu John LT Sanga, Deputy Commissioner, Kolasibin kaihruaiin Pu K.Lalrinliana, Kolasib Assembly Constituency bialtu MLA-in a telpui a. Pu Timothy R.Lalhmangaiha, District Urban Development Officer chuan PMAY-HFA (Urban) kalpui a nih dan leh dawng thei tur a tehfung hrang hrang awm te a sawifiah bawk a ni. Thutkhawm kaihruaitu Pu John LT Sanga chuan Kolasib district chhunga PMAY-HFA (Urban) hamthatna dawng tur awmang dik takten an dawn theih nan a mawhphurtu Department leh khawtlang hruaitute thawhho that a pawimawh hle thu a sawi a, dil theih zat bithliah hnawh khat a nih theih nan dil theih hun May 2022 chhung pawhsei tur a rawtna awm chu District Screening Committee chuan lungrual takin an pawm a ni.

Lehkha pawimawh thil tel ngai kim loh vangte, mahni duh thu a inhnukdawkte, pem vangte, hamthatna thuhmun dil kawp leh tehfung hrang hranga tlin loh vanga dilna hnawl ngai te enho a ni a. Kolasib khaw chhung tan a PMAY-HFA (U) hamthatna 132, Kawnpui tan 7 leh Vairengte tan 4 dil theih la awmte hnawhkhah vat a nih theih nana Village Council hruaitute leh DUDO-a thawktute hmalak dan tur te sawiho a ni bawk a ni.