India Republic Day, 2013 chu vawiin chawhma dar10:30 khan District Playground Vengpui-ah ropui leh urhsun taka lawm a ni.
He ni lawmnaah hian Pu Alok Swarup IAS, District Bawrhsap chuan zing dar 10:30 ah hnam puanzar pawtparh in Parade contingent te chibai a chhanglet a, Republic Day thuchah sawi nghalin District chhunga hmasawnna kawng hrang hrang te leh sawrkar in hna hrang hrang a thawh tawh te bakah a hmachhawp mekte a tarlang a, kan sawrkar hmalakna pui ber miretheite chawikanna - NLUP programme kalpui mek anih dan te sawiin Saiha District bikah Agriculture hnuaia NWDPRA kalpui anih dan te, Rural Development Department hnuaia hmalakna kawng hrang hrang te, PHE Department hnuaia mipuiten Tui thainghlim in tur an neih theih nana hmalakna kawng hrang hrang te, Health Department te hmalakna kawng hrang hrang te,bakah Supply Department ten theihtawp chhuaha hma an lakna avanga mipuiten harsatna liantham an tawh loh thu te a sawi bakah kum 2012 a MADC inthlanpui tluang tak leh muanawm taka neih anih avangin lawmthu a sawi bawk.
He Republic Day lawmna ah hian Parade Contingent 13 awmin School Contingents zingah pakhatna Govt. High School te an ni a, pahnihna Zasai Memorial English School te niin pathumna Donbosco Higher Secondary School te an ni. Uniform Contingents zingah lawmman pakhatna M.R.H.G ten dawngin pahnihna Bharat Scout & Guide, Donbosco School te niin pathumna N.C.C Donbosco School te an ni. Parade Contingents zawng zawng te hnenah Consolation Prize ek vek an ni a, heng lawmman te hi khuallian hian a sem nghal a ni.
He Ni lawmna pual vek hian Saiha khawpui chhunga Department paruk ten an department hmalakna leh hnathawhte tarlang thei turin Tableu hmuhnawm tak an entir a, Tableu entirtu zingah hian lawmman pakhatna Horticulture Department an dawng a, pahnihna Disaster Management & Rehabilitation Department ten an dawng a, lawmman pathumna D.R.D.A Department ten an dawng ve thung a ni. Tableu entirtu zawng zawng te hnenah hian Consolation prize pek vek an ni. Heng lawmman te pawh hi khuallian hian a sem nghal a ni. Republic Day lawmna chikhat atan Saiha Assam Rifles te chuan an ralthuam neihte mipuite hmuh theih in an pho chhuak nawk a ni.
Chawhnu dar 1:00 khan DC’s Bunglowah sawmbikte pualin thingpui inhona “At Home” neih a ni a, sawmbik te leh Official te an kal tha hle a ni. Chawhnu dar 2:00 ah Republic Day Football leh Volleyball Fnal hmuhnawm tak District Playground ah khelh a ni bawk.
