India ram mahni a ro a inrelna-ni India Republic Day vawi 64-na chu Mamit-ah ropui takin lawm a ni a. zing dar 10:00 ah khuallian Pu V. Lalremthanga IAS, District Bawrhsapin hnam puanzar pawtparhin contingents 13 te hnam puanzar chibai buk a chhanglet a ni.

Khuallian chuan thuchah sawiin India ram in mahni a ro a inrel tanna ni lawm tura lo kal zawng zawngte duhsakna a hlan a, ramchhung hmun dangte rualin Mizoram pawhin hmasawnna nasa tak a neih thu sawiin chumi rual chuan Mamit District pawhin kawng tin rengah hmasawnna a nei chho zel a, mi harsa zawkten eizawnna nghelnghet an neih theihna tura sawrkar flagship Programme NLUP hmanga hmalakna-ah state level a hnathawk tha khua thlanah Zamuang khua thlan a ni te, mimal-ah Zira S/o Mukta Singh, Bawngva khua a miin pathumna dinhmun a changte hi a ropui a, a lawmawm hle a ni a ti bawk.

Khuallian chuan Zamuang khua-ah hian kuhva sawngbawlna tur Arecanut Processing Plan cheng vaibelchhe 1.06 sengin Industry hnuaiah project siamin bun tum mek anih thu a sawi bawk.

Khuallian chuan Department hrang hrang hmasawnna te tarlangin MSDP hnuaiah beneficiary 214 te hnenah insak tanpuina, IAY pek an nih thu te, Anganwadi centre 87 sak zawh anih thu te, DRDA hnuaia MGNREGS ah chhungkaw 19069 te hnenah kum 2012-13 chhungin ni 56 inhlawhna siam anih thu te, Self Help Group 335 lai din anih thute, tarlangin Mamit-ah hun rei lote-ah Helicopter service tir anih tur thute a sawi bawk a ni.

Police Department tan lakna a zarah Mamit District pawhin nasa taka hma a sawn thu sawiin Nikum Zawlnuam BDO Office pawisa bo chungchangah pawh kan police te thawhrimna a zarah pawisa bo atangin a zahve lai hmuh a nih tawh thu te, Case Register pawh kum 2011 aiin 2012 ah chuan 12 in a tlem zawk a ni tiin case Register te hi za a sawmkhua lai chinfel anih thu a sawi bawk a ni.

Zirna lama hmasawnna a tan RMSA hnuaiah New Secondary School 3, building sak zawh tawh niin a dang 8 sak mek a ni a, Sikul 11-ah zirna tan a nih thute khuallian chuan a tarlang bawk a ni.

Khuallian chuan Department hrang hrangte chuan an hnathawhah a tam lam a chhut lova a hna that leh belhchian a dawl em tih lama tan la lehzual turin a chah a, mipuite pawh kan thil thlir danah hmasawnna a tak ram thleng ngei tura kum thara hma la turin a chah bawk a ni.

Republic Day lawmna Parade Commander chu Inspector Lalramtana niin Armed Contingents 1, un-armed contingents 2 leh School Contingents 10 ten hnam puanzar chibai an buk a, School Contingents-ah hian JNV chu pakhatna an ni a, 2-na chu Presbyterian English Medium School niin St francis of Assisi School (girls) 3-na an ni.

Vawiin India Republic Day 2013 ah hian Mamit District a Sport lama National Level-a Gold medalist mi 4, Silver medalist mi 2 leh Bronze medalist mi 5 te hnenah lawmpuina pawisa hlan an ni a, Lawmman te hi khuallian in a hlan a ni.

Khuallian hian Mamit damdawiin tlawhin Damlo mi 21 te hnenah thilpek a hlan a ni.

Tourist Lodge, Mamit-ah sawmbik te pualin thingpui buatsaih a ni bawk.