Vawiin zing dar 9:45 khan India ram hmun dangte ang bawkin Champhai-ah pawh India Republic Day vawi-64na chu Chhangphut Field-ah Champhai District Bawrhsap Pu Lalthangpuia Sailo, IAS hovin tluang taka hman a ni.
Champhai a Republic Day hmanna ah hian khuallian Pu Lalthangpuia Sailo, IAS chuan kalkhawm mipuite chu Republic Day chibai bukin thu a sawi a. He ni ropui takah hian Zalenna sualtu ropui mi huaisente leh Danpui tha taka min duan chhuah sak a, kum 1950 January ni 26 a, khawvel hriat a kan hnam, mahni a ro in rel a, mipui lalna ram (democracy) kan nihna puang chhuak tute kha zahna hlan tharin I hre reng ang u a ti a. He thumal ‘Republic’ tih hi thumal satliah mai ani lo va, kan ramah hian thuneihna chu khawimaw laia inti lal thenkhatte ta ni lovin, ram chhung mipuite kuta awm a nih tarlangtu a ni. He ni champha kan lawm naah hian India chu mipuite rorelna leh lalna ram a ni tih I hre thar leh ang u. Kan ram mipui inpumkhatna hi India chakna thahrui a ni si a. Khawvel democracy ram ropui ber kan nihna leh dinhmun tha chungchuang kan neihte hi hriain, khawvel ramdang democracy chi hrang hrangte aia tha zawkin India Republic khua leh tui kan ni thei hi lawm ang u khuallian chuan a ti.
India sawrkar in nasa taka hma a sawn rualin Mizoram Sawrkar chak tak mai chuan, a ram chhung mipuite tana hmasawnna turin kawng hrang hrangah tan a lak nasat thu sawiin khuallian chuan hmasawnna zinga pawimawh ber NLUP ah pawh District chhungah chak taka hma lak mek dan sawiin Ist Phase ah beneficiaries 5961 leh 2nd Phase ah beneficiaries 6308 an awm a, 1st Phase hi department 4(pali)- (1) Horticulture(2)Fisheries(3)Sericulture leh(4) Soil & Water Conservation ah te tanpuina sem zawh tawh a ni. Tin, 2nd Phase ah department 3(pathum) - Horticulture, Sericulture leh Soil & Water Conservation ten tanpuina an sem tan mek a ni. Tun hnai mai January 14, 2013 khan ‘Kuthnathawktute Ni’ hman a ni a, chutah chuan Champhai District chhunga NLUP hma la tha 3(pathum) te hnenah lawmman hlan a ni a. Hei bakah hian Champhai District chhunga mi Hliappui khua chu, NLUP hma la tha khua thlan chhuah zingah telin Consolation Prize Rs.100, 000 (Cheng Nuai khat) an dawng nghe nghe a ni a ti a.
Huaisen lawmman Jeevan Raksha Padak Award, 2012 hmu tur zingah Champhai District atangin mi 3, C.Thanthuama (Posthumous),Zawlsei, Liankanglova, Saichal,leh Lalramchhana, Aiduzawl te kan district chhung atanga India ram huaisen lawmman dawng thei tura thlan chhuah an ni chu lawmpuiin an chhuanawm hle a ni a ti bawk.
January 25th hi National Voters Day (NVD) atan hman a ni a, kuminah pawh urhsun taka hman a ni a, vote nei tharte chawimawina hun, District chhunga hmun hrang hrangah neih a ni. Ni 15 January 25, 2013 khan District chhunga Assembly Constituency panga hnuaia Electoral Roll Bu thar chu publish niin Champhai District chhungah vote nei zawng zawng mi 77439 an ni a, Champhai District chu Mizoram District hrang hrangte zingah 100 % EPIC Coverage nei hmasa ber a ni nghe nghe a ni tiin Khuallian chuan inpumkhatna titha lehzual turte, khawtlang nun dik leh hausa siam turte, mi tin zahawmna, muanna leh hlimna nena Champhaia an chen theih nan, mimal leh a huho ang pawh a inhlan thar leh turin kalkhawmte chu a sawm a ni.
Vawiin Republic Day lawmna ah hian Parade Contingent 22 te March Past lawmman leh Republic Day puala Sports item hrang hrang titha te hnenah lawmman sem ani a, Football Final Match khelh a ni bawk a. Chhun dar 12 ah Keifangtlang ah ‘At Home’ neih zui nghal a ni.
