Vawiin chawhma dar 10:00 khan Lunglei Thuamluaia mual ah India Republic Day champha vawi 64-na chu India ram hmundang ang bawkin urhsun taka hman ani a. He hun ah hian khuallian Pu V. Sapchhunga, Lunglei Bawrhsap chuan hnampuan zar a pawt parh a, hnam puanzar zahna lantir a Parade Contingents 19 te chibai bukna a chhang let a ni.

Republic Day ah hian zalenna sualtu te leh India danpui duang chhuaktute thinlung taka zahna lantir-in ram leh hnam tan kan inpek thar leh theuh a ngaih thu khuallian chuan a sawi a. Lunglei District bikah pawh he ni pual hian hmasawnna hmel duhawm tak tak tarlan phu a awm nual thu a sawi a ni. Sawrkar hmalakna lianber NLUP bikah Lunglei Dsitrict chu a chhuanawm thu sawiin khua leh mimal ang pawh a State Level award dawng thei te an awm ta chu hmasawnna lian tak ani a ti. Lunglei High Powered Committee kaltlanga hmalakna te leh MGNREG scheme kaltanga hmasawnna bakah Deptt. hrang hrang te hnathawh te tarlangin Lunglei District in hmaa sawn nasat thu a sawi a. Lunglei Dsitrict chu sawrkar atanga sum dawngtu mai nilovin sum chhungluttu a ni ve a ni, a ti. Kum liamta khan Taxation deptt. in chhiah a lak khawm zat chu Rs. 4,62,55,334/- chu tiang bawkin Transport department-in Tax and Fees atangin Rs. 1,78,51,939/- Printing and Stationary atangin Rs. 10,02,680/- leh Excise & Narcotic Deptt. lak luh rs. 24,75,494/- te bakah Police Deptt. in Fine atanga lak khawm Rs. 4,91,925/- te chu sawrkar Reveneu-ah chhunluh a ni tawh a ni, a ti.

Khuallian chuan Democracy hnuaia sawrkar kan nih ang in mipui vantlang, tlawmngai pawl hrang hrang te leh kohhran te puihna leh thawhhona tel lo chuan sawrkar hnathawk te ringawtin sawrkar ngelnghet leh hmasawn a siam thei lo a, ram in hma a sawn zel na tur leh sawrkar a lo chak zawk nan mitinte thawhpui ah a sawm nghal thu a sawi a ni.

Vawiin Parade Contingents 19 te hi B.Tuanpu, Adjutant 2nd Bn. MAP Lunglei in a kaihruai a. Armed Contingent ah 2nd Bn. MAP chu Pakhatna niin, Mizoram Home Guards, Lunglei chu Pahnih na an ni thung. Unarmed Contingents zingah NCC, BHSS Serkawn chu Pakhatna niin Guides Company, Chawngfianga Memorial School leh Scout & Guides, Secred Hearts School te chu Pahnih na leh Pathumna an ni a. School Contingents zing ah Secred Hearts School Pakhatna niin Holy Faith School leh Grace Land English Medium School te chu Pahnih na leh Pathumna an ni bawk.

Republic Day Official Function hi hman zawh anih hnuin, chawhnu dar 12:00 ah DC’s Bungalow ah sawmbikte pualin Bawrhsap chuan thingpui ruai a buatsaih bawk a ni.