Vawiin khan Kolasib Tumpui Field-ah India Republic Day vawi 64-na ropui taka lawm a ni a, DC Pi Niharika Rai, IAS chuan hnam puanzar pawtpharhin mipuite hnenah thuchah a sawi a. March Past contingent 14 te chibai a chhanglet.

Thuchah sawiin Pi Niharika Rai chuan vawiin hi India ram, mahnia ro a inrel tanna ni a ni a, a hlu hle a ni, a ti. Kolasib District chhunga hmasawnna tamtak zinga a tul zual nia a hriatte sawilangin Pi Rai chuan, UD & PA hnuaiah Kolasib khaw chhung kawng 28 kms siam hna chu thawh zawh tep a ni tawh a, mirethei BPL te loan hmang tea khai chhuah mek an niin Mirethei chenna tur In 300 sak mek a ni, a ti. DRDA hnuaiah pawh MGNREGA inhlawhna tluang taka kalpui a niin tun sawrkar kum kal mekah ni 100 inhlawhna tur sum pawh sanction fel tawh a ni a. Central Scheme thar, National Rural Livelihood Mission hmang hmasa ber tura District pahnih thlan chhuahah Kolasib thlan a ni hi a lawmawm hle a ni, a ti.

Mizoram thenawm, Assam-a District tenen ramri chungchanga buaina kan neihte chingfel turin DC Office chuan kum kalta chhung khan hma a la nasa hle a, boruak tha tak kan nei mek a ni, Pi Rai chuan a ti a. NLUP titha thlanna tun hnaia neiha Zoram puma 1-na Soil Deptt hnuaia mi leh khua titha pathumna Horti Deptt. hnathawk tamna Bilkhawthlir a nite kha a chhuanawm a. Agri Deptt. lamah poh hlawhtlinna tamtak neih a niin nikum chhung khan thei rah hralhna man cheng nuai 36 revenue hmuh a ni a, Vety Deptt. hnuaia Bawnghnute siamna pawh bawng vulhtute hamthat nan an kutah hlan a nita bawk a ni, a ti a. Taxation Deptt. chuan kum kalta chhung khan sawrkarah revenue cheng nuai zathum leh panga (305,00,000) a chhung a ni, a ti bawk.

Republic Day 2013 lawmna atana inelna hrang hrang Cricket, Basketball, Chess leh Drawing Competition-a tithate hnenah Pi Niharika Rai chuan lawman a sem a. March Past leh Tableau tithate hnenah lawman a hlan bawk.

Deptt. pariat- DAO, DHO, DRDA, Envi & Forest, UD & PA, PHE, PWD leh District Jail ten an Deptt. hnathawhte Tableau –in an entir a, mipuiin an lawm hle a ni. Tableau-ah hian PWD chu pakhatna niin IIna PHE an ni a, IIIna chu DRDA an ni.