Vawiin India Republic Day chu Kawnpui-ah zing dar 7:00 khan Pu Lalchungnunga SDO (C) Kawnpui chuan Hnam Puanzar a pawt parh a; mipui ten Hnam Puanzar chibai an buk a ni.

Khuallian chuan Sawrkar in hmasawnna kawng hrang hrang a siam ah Kolasib District chu kawng hrang hranga hmasawn ber zing ami an ni tiin Deptt hrang hrang te hmasawnna a mal te te in a sawi lang a. Nau nei tur 87% ten Damdawi In an pan tawh a; Nu Naupai 97% in Doctor te an berawn tawh a; hei hian hriselna kawngah kawng min sial sak a; Infant Mortality Rate (Naupang thihna) pawh a la titlahniam zel dawn a. Kolasib District Court in kum 2012 a thubuai 737 an ziah luh zinga 701 lai an ching fel thei pawh thil chhinchhiah tlak tak a ni a ti bawk.

Kawnpui ah hian tun hnaia Sipai chawimawina sang dawngtu Lalremruata 1st Assam Rifles leh RZ Vanlalhruaia 21 Bn CRPF te hnenah Chawimawina thuziak hlan a ni.

Lalremruata hian President Medal for Galantry leh Chief of Army Staff Commendation Card a dawn avang in Lawmpuina hlan a ni a. RZ Vanlalhruaia hian President Police Medal for Galantry a dawn avang in Lawmpuina hlan a ni bawk.

He hunah hian Sawrkar hnathawk te; VC leh NGO hruaitu bakah School naupangte an tel a ni.