Vawiin khan ram chhung hmun dangte rualin Thuamluaia Mual Lunglei ah India Republic Day vawi - 71 na ropui taka lawm a ni. Pu V Lalsangliana, IAS Lunglei Deputy Commissioner chu khuallian a ni.

Zing ni chhuah rualin Lunglei District chhunga sawrkar Pisa hrang hrangah India Hnam Puanzar zar niin a lawmna pui ber chu zing dar 7:30 a.m ah neih tan a ni.  Pu V Lalsangliana chuan hnam puanzar pawtparhin parade contingent 17-ten hnam puanzar chibai an buk chu a chhanglet bawk. 

Khuallian Pu V. Lalsangliana chuan Lunglei District mipuite chu Republic Day chibai bukin India khua leh tuite tan zalenna sual chhuak tu ram hruaitu hmasate zahna chibai a buk bawk a. Kan ram Dan Bu (Constitution of India) siam leh hman tanna ni ah hian he Dan Bu ropuina leh hlutna hre chhuak thar leh theuh ila tiin Lunglei DC chuan mitin te kan dikna leh chanvo humhalh saka kan awm hi kan vannei takzet a ni, a ti. India khua leh tui zawng zawng ten kan ram Dan ropuina leh zahawmna vawng him turin tih ve tur (Fundamental Duties) kan kova innghat te kan hlenchhuah ve a tul takzet a ni, a ti bawk.

Lunglei District chhunga hmasawnna hna thawh hrang hrang tarlangin Mahatma Gandhi National Rural Employment Guarantee Scheme (MGNREGS) Job Card nei mi 38,680 an awm a. Rural Development hnuaia CM Rural Housing Scheme kal pui mek ah hian insak tanpuina Rs 50,000/- chhungkaw 619 tana pek ani a, chhungkaw 374 tan ruahmana siam mek ani bawk. PMAY (G) hnuaiah kum 2019-20 chhungin chhungkua 451 te chu insak tanpuina  Rs 1,30,000/-  theuh pek an ni; tunah hian chhungkua 469 te in sakna tur First Installment pek mek an ni bawk tih a tarlang.

Lunglei khawpui hmasawn nan District Urban Development Office, UD&PA kaltlangin Pradhan Mantri Awas Yojana- Housing For All (Urban) hnuaia insak tanpuina diltu mirethei chhungkua (eligible) 2450 atangin 1^st phase ah chhungkaw 792 te hnen ah tanpuina Rs 1,50,000/- theuh pek mek a nih thu a sawi bawk.

Tin, Dan leh thupek kenkawh chungchang pawh sawilangin Lunglei District Police chuan Law & Order kenkawhna lamah pawh theihtawp chhuah mek zelin, Police ten ngun takin chhun leh zan zawmin ruihlo tawlhru leh hralh an veh reng bawk avangin Crime Rate pawh nasa takin a tla hniam a ni, a ti. 2^nd Bn MAP, Lunglei chuan remna leh muanna a awm theihnan kawng hrang hrang ah hna a thawk thin a, Bru Repratriation Batch Kua na (9^th Batch Bru Repatriation) venhimna kawngah nasa takin an thawhhlawk a, State dangah Election duty turin Company 4 lai an in tir chhuak bawk a ni.

Inkalpawhna lama hmalaknate sawiin E.E (Road) PWD hnuaiah PMGSY kaltlangin hmun hrang hrang sawm pathum (13) ah Km 238.97 a thui kawngpui laih mek a ni a, tunah hian  Km 111.88 a thui laih zawh tawh a nih hu a tarlang a. NABARD hnuaiah kawng pathum(3) siam mek a ni a, Km 90.75 a thuiah Km 39 siam zawh leh laih zawh tawh a ni a. SEDP hnuaiah Aizawl – Thenzawl – Lunglei road strengthening tur in Km 29 a thui (Haulawng – Pukpui) chu thawh mek a ni a, rei lo te chhunga zawh thuai tur a beisei a ni. 

Tin, Power & Electricity Department hnuaiah Single Circuit Transmission Line Melriat to Khawiva (Lunglei) siam mek chu 97% zawh fel tawh a ni.

SSA hnuaiah Rs 3,355,544/- man hu Text Book a thlawna sem a ni a. Mid Day Meal Primary leh Middle School 550 hnuaia naupang 25,987 hnenah nitin an chaw chhun ei tur sem a ni. 

Nursing School Lunglei chuan an batch 25-na ni turin zirlai 20 te chu October, 2019 khan session an tan pui a, an result hnuhnung berah 94.64% pass percentage neiin, an student ten Topper, 3^rd Position  leh 4^th Position chu Mizoram chhung bik ah nihna an hauh bawk a ni.

Excise and Narcotics Department chuan Zu leh ruihhlo khuahkhirh chungchangah nasa takin hma an la a,hemi kaihhnawiha dan bawhchhiatna atangin Sawrkarah chhiah  Rs 2,39,03,559/-  lai a chhung lut a. Case 301 register in mi 339 man an ni bawk. Deputy Commissioner of State Tax, Lunglei Zone atangin Revenue Rs 356,43,002/- hmuh a ni. DCSO Office chuan total supply sale atangin sawrkar sumbawmah Rs 18,35,49,857/- a chhung lut a. District Transport Officer, Lunglei chuan chhiah chi hrang hrang atangin sawrkar sumbawmah Rs 3,17,15,733/- a chhung lut bawk. Office of the Joint Director, Accounts and Treasuries, Southern Zone Lunglei Mizoram chuan Pension Case 1065 (Sangkhat sawmruk panga) a ti fel a, Rs 540,261,870/- hu vel chu pensioner te hnenah a sem chhuak bawk.

CMO Office, Lunglei ah pawh hmasawnna chi hrang hrang hmuh tur a awm a, Nu nau chunga thi(Maternal Death) an awm lova, Damdawiin a nau nei (Institutional Deliveries) 93% ah  an kai chho a, Nau neih hnua in entir (Post Natal Check Up Visit) pawh 75% atangin 93% ah an kai chho ani.  Immunization lamah pawh nasa taka hma sawn in 89% an cover a, vaccine thar ‘Rota-Virus vaccine’ leh Tetanus and Adult Diptheria(Td) te chu May, 2019 atangin pek chhuah tan a ni a.

Heng bakah hian Department hrang hrang hnuaia hmasawnna hna kal mek te leh hmalakna tlangpui khuallian hian a tarlang bawk.

Vawiin Republic Day parade-a contingent 17 zingah hian Armed Contingent pahnih, Unarmed Contingent pali, School Contingent sawm leh Band Parties pakhat te an tel a, Inspector HC Vakhu chu Parade Commander niin SI B.Lalnunsanga chu 2^nd Parade Commander a ni. Thu a sawi zawh hian Khuallian chuan lawmman hrang hrang a sem nghal a. Republic Day parade-a unarmed contingent-ah NCC Air Wing, BHSS Junior Section Serkawn chu pakhatna niin, pahnihna Scouts and Guides Sacred Heart Higher Secondary School leh pathumna Scouts and Guides Baptist Higher Secondary School Junior Section, Serkawn te an ni a. School contingent-ah Sacred Heart Higher Secondary School chu pakhatna niin, pahnihna 2^nd Battalion MAP English Medium School leh pathumna Serkawn Sikulpui te an ni. He'ng bakah hian parade endiktu (judge)-te, parade commander-te, armed contingent te, Pipe Band te leh parde contingent dang zawng hnenah lawmman pek an ni bawk.

Kumin Republic Day pual hian Judo (Category paruk), Carrom Board (Single leh Double), Tennis (Under - 16), 9 Ball-ah te inelna buaitsaih a ni a. Heng intihsiakna a tithate hnenah khuallian chuan lawmman a hlan bawk a ni.

Vawiin Lungleia Republic Day lawmnaah hian District officials, NGO hotute, khawtlang hruaitute,  thuthar thehdarhtu te, sikul naupang leh mipuite an tel a ni.