Vawiin hian ram chhung hmun dangte rualin Serchhip ah Republic Day vawi 71 na chu tluang taka hman a ni a, a lawmna pui ber Khawtetlang playground a buatsaihah district bawrsap Dr. Lalzirmawia Chhangte, IAS chu khuallian niin hnam puanzar a pawtpharha a, chibai buktute a chhanglet nghal a ni.

Zing ni chhuah rualin sawrkar pisa ah te hnam puanzar zar a ni a, chumi hnuah zing dar 7:00 am ah a lawmna pui ber hi buatsaih zui a ni. He hunah hian thusawiin khuallian chuan, India ram mipuiten keimahni danpui siam ngei kan hman tanna champhaah ram hruaitu hmasate zahna chibai bukin, an inpekna zarah ram hmasawn leh nuam tak kan nei thei a ni, a ti a. Remna leh muanna hnuaiah hmasawnna tam tak Mizoram pawhin neiin, Serchhip district ngei pawh nasa takin hma a sawn zel a, vawiinah chuan India rama ziak leh chhiar thiam tamna ber district kan ni ta hial a ni, a ti. Khuallian hian district chhunga tunhnaia hmasawnna hnathawh langsar zualte tarlang nghalin, inkalpawhna kawng tha zawk a awm theih nana PMGSY sum hmanga kawngpui laih te, tui thianghlim hnianghnar kan neih theih nana Central Fund hrang hrang hmanga tuilak hna thawk mek te, faina leh thianghlimna lama nasa taka hma kan sawn thu leh Serchhip khawpui ngei pawh khawpui fai inelna 2019 a Mizorama district capital fai ber a nih hial thute a tarlang a. Ram hmasawn tehna pawimawh Infant Mortality Rate ah serchhip chu 7.9 a nih mek thute, Maternal Mortality Rate 0 a nih thute, 2019 chhunga Malaria avanga boral kan neih loh thute a tarlang a. Kan ram ngaw leh nungchate humhalha, kangmei laka ram venghim tura mipuite sawmin, department hrang hrangten hmasawnna hna an thawh tlangpuite kalkhawmte hmaah hian a sawilang a ni. Dr. Lalzirmawia Chhangte chuan, Day lawmna tihlawhtling tura mawhphurhna nei zawng zawng te, a lawm tura kal khawm sawrkar hnathawkte, zirlai naupang leh chanchinbumite, khawtlang mipuite chungah lawmthu sawiin, remna leh muanna te, rorelna tha leh khawtlang boruak nuam te a awm zel theih nana thawhpuiah a sawm nghal a ni.

Parade Contingent titha thlan chhuahte hnenah Dr. Lalzirmawia Chhangte hian lawmman a sem nghal a, lawmman dawngtute chu: Pakhatna Student Police Cadet, Marian High School, pahnihna Government JM High School leh pathumna NCC, Serchhip High School te an ni a. Parade Commander hi SI Hrangchhuana, 3rd Bn. MAP a ni

Tin, Republic Day pual hian Serchhipa Home hrang hrang te, Hospital leh Jail ah te thilpek hlan an ni a, District Volleyball tournament buatsaih a ni bawk a, lawmman te chu khuallian hian a sem nghal bawk a ni.

Kumin Republic Day hi Pathianni a nih avangin VIP at Home programme erawh chu siam a nilo a ni.