Tukin khan Kolasib Sports Stadium, Project Veng, Kolasibah Republic Day vawi 71-na lawmna hun hman a ni a, Sawrkar Pisa leh hmun pawimawh dangah te India hnam puanzar zar niin, a lawmna hmunah hian Bawrsap Pi Sangchhin Chinzah chuan hnam puan zar, Marching Contingent 16 inlan te hmaah a pawt phar a ni.

Republic Day lawmnaah hian Pi Sangchhin Chinzah chuan Kolasib district chhunga Sawrkar hmalakna hrang hrangte tarlangin, kum 2019 chhung khan Oil Palm tiak Sing 7 chuang sem chhuah a nih thu te, Oil Palm chingtute tanpui nan Cheng Nuai 80 dawn pek chhuah a nih thu te leh Kum 7 chhung khan Godrej Pvt Ltd Bukvannei Oil Palm Mill a Oil Palm rah hralh tawh zat chu Metric Tones Nuai 116 a chuang tawh thu a sawi a ni. District Agriculture Office hnuaiah FOCUS Project (Fostering Climate Resilient Upland Farming Systems) kaltlangin Kolasib District tan Nuai 190 chuang dawn atangin a bul tan nan nikum chhung khan Kuhva tiak Nuai 2 chuang leh Behliang chi Quintal 50 semchhuah a ni bawk, tih a sawi.

Horticulture department hmalakna in thei leh thlai thar lakkhawmna tur Collection centre Bilkhawthlir, Lungdai leh Bukpuiah te sak mek leh Dragon Fruit tih pun zel nan khaw hrang hrangah Unit 50 pekchhuah a ni, tih a sawi a. Ram hmasawn nan kawng tha a pawimawh thu sawiin PWD Kolasib Division chuan SEDP leh Maintenance Action plan 2019-20 hnuaiah khaw chhung kawng hmun hrang hrang siamthat leh thawmthat hna an thawk mek a ni, a ti bawk.

Bawrsap hian District department hrang hrangte hnathawh leh hmalak thenkhat a tarlan te zingah Kolasib District Office of the Assistant Excise & Narcotics te chuan January Ni 1 atanga Dec Ni 31, 2019 chhung khan Cheng Nuai 60 hu man vel Zu man a nih thu a sawi a, Kolasib chu State dang nena ramri thui tak intawm anih avangin zirna leh Hindi tawng a hmasawn a tulzia a sawi bawk a ni.

Kolasib ditrict office hrang hrang a thawktute, School naupang leh mipui thahnem takin Republic Day lawmna hi an telpui a, Parade Contingent inlan zinga tithazual thlanchhuah te hnenah lawmman sem nghal a ni.