India ramin mahni inrelbawla mahni puala siam dan a neih vawi 71-na India Republic Day chu Mizoram hmundangte rualin tukin khan Khawzawlah lawm a ni. He Hun Khawzawl Mualvawm Field-a neihah hian District Bawrhsap Pu H. Lianzela chu khualian a ni a, hnam puanzar pawtpharhin Parade Contingent-te chibai a chhanglet a ni.

Khuallian chuan thu sawiin January ni 26, 1950-ah India ram danpui Constitution chu hman tan a ni a, hma thlir thui tak nei chungin huaisen takin India ram chu Sovereign, Democratic, Republic ni tur leh a mipuite tan dan hnuaia intluktlanna, zalenna leh rorelna dik te awm theihna tura rahbi thar kai a ni, a ti a. India danpui ropui tak hnuaiah India ram zau tak chhunga hnamtin leh chitin awmte inrem tlang taka khawsakhona tur te, mimal tin zahawm taka kan nun theihna tur te leh kan ram inpumkhatna tur te, mipui thlan Sawrkar kan neihna tur te chu felfai tak dah anih thu a sawi a Bawrhsap chuan India ram chu khawvela democracy ram lian ber leh economic power lian tak a lo nih theih phah ta tih sawiin, India ram ralmuang leh zalen kan neih theihna tur leh India danpui pawimawh tak kan neih theihna tura tha thawhtu zawng zawngte kha vawiin ni hian kan hre renga , zaghna chibai kan buk a ni, a ti a. Ram danpui neihna ni champha kan lawm mek lai hian danpuiin mawhphurhna huang bik a siam te hi kan hre thar lkeh tur ani tiin, mipuite chu mahni mawhphurhna leh tih ve turte hre thar leh turin a chah a ni.

He hunah hian Khawzawl Bawrhsap chuan district chhunga sawrkar hmalakna hrang hrangte a tarlangin kum 2019 August ni 12 atanga Khawzawl DC Office bultan anih hnuah Khawzawl District mipuiten hmundang pan kher ngai tawh lovin Certificate hrang hrang Khawzawl DC Office atangin an la chhuak thei tawh a, DC Office hawn tirh atanga vawiin ni thleng hian Certificate chi hrang hrang 4223 pek chhuah a ni tawh a, Arms Licence leh ILP pe chhuak tura inpuahchahna kalpui mek zel a ni, a ti a. Khawzawl tan Site Allotment Advisory Board (SAAB) pawh din fel niin, Treasury Office pawh reiloteah hawn theih beisei a ni, a ti bawk. Faina lama district hlawhtlinna pawh sawilangin, Mizoram khawpui fai inelnaah Biate khua pakhatna niin, Category II-ah Khawzawl chu 7-na anih thu a sawi a. State Disaster Response Fund (SDRF) atangin khua rel chhiatna avanga tuartute hnenah tanpuina Rs. 3,38,200/- pek chhuah tawh ani leh MPLADS fund Rs. 48,00,000/- sengin hna thawh mek a nih thu te, Khawzawl District huamchhunga BPL awm lohna khua 5 - Pamchung, Rabung, Tlangmawi, Chawngtlai leh Riangtlei khua te hnenah D.C. Office kaltlangin, Participatory Community Development Project for BPL Free Villages hnuaiah Rs.16,00,000/- theuh (1st Instalment) pek a nih thu a sawi bawk.

Pu H.Lianzela chuan Khawzawl District chhung mipuite him leh hrisel zawk theihna tura khapna thupek hrang hrang tih chhuahte chu mipuite’n an zawm tha hlea a hriat thu sawiin, abikin Krismas leh Kumthar vuakveta khawtlang mipuite dan zawmna chu fakawm atih thu leh nakin zel pawha chhawmnun tlat turin a chah a. SDO Sadar kaihhruaina hnuaia Khawzawl Road Protection Squad dina hmalak tan anih tawh thu te, In sa thar tur ten DC-a dilna thlen thin tur leh Lirthei dahna March 20, 2020 hma a nei vek turin a ngen nawn leh a. District chhung kawngpui NH-6 Double Lane-a siam zauh hna bultan turin Ministry of Road Transport & Highways, Government of India bultumin National Highways and Infrastructure Development Corporation Ltd (NHIDCL) in hma a lak tan thu leh Tuivawl to Dulte (54.6KM to 69.01KM)-ah Land Acquisition proceedings bul tawh anih thu a tarlang a. Chhiarpui Census 2021 hmachhawn turin Supervisors, Enumerators leh Field trainers te pawh ruatfel an ni tawh a, Krismas 2019 leh Kumthar 2020 vuak veta dan bawhchhiatna avanga case register a awmlo leh boruak muanawm tak kan nei thei kha thil chinchhiah tlak tak a ni tiin, Khawzawl Police Station-in Mizorama Police Station 40 chuang zingah Police Station ti tha 3-na lawmman a dawng thei chu fakawm a tih thu a sawi bawk.

Heng bakah hian Mission (Urban) hnuaiah Community Toilet Rs 87,100 theuh senna, Khawzawl-ah 15, Khawhai-ah 5 leh Biate-a 5 ah sak mekte, Mualvawm Field Artificial Turf phah hna kalpui mek leh Mizoram State Games-a Khawzawl District chhunga 22-Tuichang AC aiawh infiammi ten Gold Medal-6, Silver Medal-1 leh Bronze Medal-1 an hawn thu a tarlang a. Khawzawl ICDS Project hnuaiah National Social Assistance Programme (NSAP) Scheme atangin Tar Pension (IGNOAPS) kum 80 hnuailam mi 506 leh Kum 80 chunglam mi 253 te, Hmeithai Pension (IGNWPS) mi 59 leh Rualbanlo Tanpuina (IGNDPS) mi 19 (te hnena pek mek anih thu pawh a sawi bawk a. National Family Benefit Scheme(NFBS) atangin chhungkaw eizawngtu ber boral chhungkaw 7 (pasarih)hnenah Rs. 20,000/- (Cheng Sing Hnih) theuh tanpuina pek a ni, a ti bawk.

Education Department Khawzawl Sub-Division hnuaiah Zirtirtu indaihlohna hnawhkhahna atan Sawrkarin regular teacher Middle School-ah 5, Primary School-ah 8, Muster Roll Teacher Primary School-ah 71 leh Middle School-ah 5 dah thar a ni a. Sawrkar kum kal mekah hian mipuiten Khawzawl SBI-ah Rs. 31,76,00,000 lai deposit-in kum hmasa lam aiin 26.58% in a pung a ni. Saubhagya Scheme hnuaiah Khawzawl Power Division chuan BPL chhungkua 414 te hnenah electric eng a pe a, Vankal khuaa 20MW Solar Park siam hna pawh thawh mek niin, Khawhai Power Supply System leh Biate-ah pawh zawh tep a ni bawk. Green India hnuaiah Seedling 3,66,000 phun a ni a, kumin Sawrkar kum chhung hian Cocoon (Mulberry) 6295 kgs tharchhuah a ni a, I&WD hnuaiah M.I Project 40 zawh fel a ni tawh a, Project 4 kalpui mek a ni. Ayushman Bharat - Pradhan Mantri Jan ArogyaYojana (AB-PMJAY) Scheme atangin damlo 322 a thlawnin enkawl an ni a, Mizoram State Health Care Scheme a taka kalpui mek a ni tawh bawk. Agriculture Department Khawzawl Sub-Division chuan Pradhan Mantri Krishi Sinchayee Yojana (PMKSY) Scheme hnuaiah Secondary Storage Structure siam nan chhungkaw 7 hnenah Rs. 2,00,000/- theuh tanpuina a pe a. Khawzawl Sub- Distribution Centre (SDC) chuan mipuite hnianghnar takin buhfai a pe chhuak zel a, thla tin buhfai quintal 1,650 mipui hnenah a sem chhuak thin a ni.

Khuallian hian thu a sawi zawhah Khawzawl District huamchhunga infiammi hlawhtling hmeichhia 4 - Nl Lalvenhimi, Khawhai; Nl PC. Lalhmingtluangi, Khawzawl Darngawn Veng, Pi F. Lalrempuii, Khawzawl Zuchhip Veng leh Nl Lalchhanhimi, Khawzawl Darngawn Vengte hnenah chawimawina thuziak leh pawisafai Rs.2,000/- theuh a hlan a.Republic Day lawmnaah hian Parade Contingent 18, Armed Contingent 2, Unarmed Contingent 16 leh 2nd. I.R. Battalion Pipe Band te an tel a ni. Parade Contingent-te zinga pakhatna Grace Foundation School, Khawzawl Higher Secondary School Girl Contingent, pahnihna Khawzawl Higher Secondary School Girls Contingent leh pathumna St. Josephs' School-te hnenah lawmman a hlan bawk.

Vawiina Khawzawl khawpuia Republic Day lawmnaah hian Addl. D.C. Pu Paul L. Khuma; S.P. Pu Lalchunglura; Department Head of Office; Sawrkar hnathawkte; khawtlang hruaitute; MJA Memberleh mipui thahnem tak Republic Day lawmnaah hian an tel a. Republic Day lawmna hun Mualvawm Field-a neih zawh hnu hian Bawrhsap hovin official leh mi sawm bikte tan DC’s Residence-ah thingpui ina inkawmhona hun hman a ni.

Attachment

  • Loading attachment...