India ramin  mahni puala  danpui siam  a neih champha hriatrengna vawi 71-na India Republic Day 2020 lawmna chu tukin   dar 7:30 khan Chhangphut Field, Champhaiah urhsun taka hman a ni.  He hunah hian Champhai District Bawrhsap  Pu SL Naveen, IAS chu khuallian a ni a, hnam puanzar pawtpharha  zahna chibai bukin Parade Contingent-te chibai bukna a chhanglet a ni.  

Khuallian chuan Republic Day puala Champhai District mipuite chibai bukin Republic Day chu India   dan pui  duanchhuaha hman anih hriatrengna ani a, India chu mahni a inrelbawl thei thla pathum pawimawh tak tak  Legislature, Executive leh Judiciary nei kan lo ni ta a ni, a ti a. Republic Day  lawmna hmang hian  India in zalenna a neih theihna tur leh tun thlenga him taka kan awm theihna tura beitu zawng zawng te kan hriat thar leh angai a ni tiin,  India chuan hma sawn zelin tunah chuan khawvela ram thang duang leh chak ber pawl a ni tawh a ni, a ti bawk. 

Khuallian chuan kum 2019-2020 a Champhai District chhunga sawrkar  Department hrang hrangte hmalakna langsar zualpui tarlangin,  Mahatma Gandhi National Rural Employment Guarantee Scheme (MGNREGS) hnuaiah Job Card holder 29,006 te ni  88 inhlawhna siam sak an ni a, Champhai mipuite hriselna lama inenkawlna ngaipawimawhin sawrkarin District Hospital-ah Dialysis khawl leh High Dependency Unit (HDU) te a bunfel a,  naupang za zela 97.3 te  rulhut hlo pek niin,  zeng hri danna  dawng tura tih za zela 99 te pek an ni, a ti a. AB-PMJSY (Ayushman Bharat Pradhan Mantri Jan Arogya Yojana) hamthatna dawngtu 1,563 leh Golden Card chhawr tangkaitu  damlo  1,061  awm tawh thu a sawi a. Pradhan Mantri Matru Vandana Yojana (PMMVY) kaltlangin nau vawikhatna nei turte tan tanpuina sumfai pek chhuah niin,  dawngtu mi 1654  te hnenah  cheng nuai   67.01 pek chhuah a ni a,  Poshan Abhiyan kaltlangin  naupang thanthu leh Anaemia ven leh enkawlna atan nasa taka beihpui thlak a nih thu a sawi a. Mi 2766 te hnenah Tar pension Indira Gandhi National Old Age Pension Scheme (IGNOAPS)  pek mek niin, heng zinga   822 te chu kum  80 chuang an nih thu leh  Hmeithai chawmna  Indira Gandhi National Widow Pension Scheme (IGNWPS) dawngtu mi 269 te hnenah thla tin pension cheng   300 pek thin anih thu a sawi a. National Family Benefit Scheme (NFBS) kaltlangin chhungkaw 23 te henah tanpuina Rs.20000/-  pek an ni a, Sawrkar hmalaknain Goverment  Champhai College-ah Commerce leh BCA zirtirtu tur Assistant Professors 3 RUSA (Rashtriya Uchchatar Shiksha Abhiyan)  atanga pek a ni, a ti bawk. Housing for All kaltlanga In sak tanpuina thawhkhatna hnuaia diltu 3062 zinga 2421 dilna pawm sak niin, a thawhhnihna hnuaia diltu  1748 zinga 997 te dilna chu pawmsak anih thu a sawi a. Eizawnna tlak thiamthil zir lama hmalakna   tarlangin, DAY-NULM (Deendayal Antyodaya Yojana-National Urban Livelihoods Mission) kaltlangin Self Help Group (SHG) 78 siam anih tawh thu leh SHG tinte inchhawmnunna atan Rs.10000  pek niin,  training hrang hrang pek thin an ni, a ti bawk. 

Pu SL Naveen chuan Excluded Area Grants sum cheng nuai  893.30  hmangin District chhunga thingtlang khaw tinte chawikang tuma hnathawh anih thu sawiin, NLCPR (Non-Lapsable Central Pool of Resources) sum hmangin Keilungliah Dam Reservoir and Recreation Centre siam  mek a ni a, a panna kawng, soil test leh Concrete Gravity Dam-te siam a ni, a ti a. Green Mizoram programme kaltlangin thing tiak  11794 chu mipuite hnenah sem niin, a lawmna ni-ah thing tiak  1386  lai phun a ni a,  kangmei ven kawnga district ti tha ber  Champhaiin a dawng thu a sawi a.  Agriculture department hmalaknain Rainfed Area Development (RAD) Scheme hnuaiah cheng nuai 41.05 senga hmalak niin, National Food Security Mission (NFSM) Scheme kaltlangin cheng nuai  26.76  hu tanpuina Loneitute hnenah pek a ni, a ti a. Silk thar chhuah lama hmasawnna turin Champhai Kanan Venga Mulberry Silk Farm-ah Reeling Machine bunfel tawh anih thu a sawi a. Blue Revolution scheme kaltlangin Sangha khawitu chhungkaw 15 te hnenah tanpuina sumfai  cheng  32400 pek niin,  Tlangsamah Circular Hatchery siam a ni, a ti a. Mission for Integrated Development of Horticulture (MIDH) hmalaknain Kawlchaw Theihai tiak 1400  Zokhawtharah sem a ni a, Assam Lemon kung  1050   Vapar-ah sem niin,  Zo Chilli  kan tih mai tiak pawh Khuangleng, Vanzau, Khuangthing leh  Dilkawn khuaa chhungkaw 70 te hnenah semchhuah a ni, a ti bawk. Pradhan Mantri Krishi Sanchayee Yojana (PMKSY) kaltlangin cheng nuai  41.05  sengin tui khawlna leh tui  lakna thar siam a ni a,  Micro Irrigation-Per Drop More Crop tih kaltlangin tui kawng siam niin,  hei hi Kiwi chingtu 48,  Grape chingtu  40, Dragon Fruit chingtu 23  leh Thlai chingtu 9 ten tangkai takin an hmang a ni, a ti a. Champhai District chhungah Primary School zirtirtu thar 152 leh Middle School zirtirtu thar 15 lak an nih thu sawiin, NEDP (New Economic Development Policy)  sum hmanga sak Education Training Centre pawh peihfel tep anih thu leh SSA (Sarva Shiksha Abhiyan), RMSA (Rashtriya Madhyamik Shiksha Abhiyan) leh TE (Teachers Education) te chu Samagra Shiksha tih hming pu a chhunfin tawh anih thu a sawi a. Sawrkar Middle School tam zawkah Computer hmanga zirtirna hmanruate pek tawh niin, ICT Computer lab pawh Government High School pahnihah dah belh leh a ni a,  Sikul naupangte’n hamthatna an dawn tur angte pawh pek zel thin a ni, a ti bawk. 

Khuallian chuan Champhai District-a State sawrkar leh central sawrkar hnathawk zawng zawngte district hmasawnna tura hnathawh chu chhuanawm a tih thu sawiin, theihtawp chhuah chhunzawm zel turin a chah a. Republic Day hlawhtling taka lawm anih theiha tura Parade contingents, Zirlai, Sawrkar hnathawk,  MJA, NGO leh mipuite chungah lawmthu a sawi a.  District mipuite chu taima leh rinawm taka thawka, nun hrisel leh thianghlim lam hawia ram leh hnam siam ropuitu nih tum theuh turin duhsakna a hlan  a ni.  

Vawiin Republic Day March-Past hi Parade Commander Sub-Inspector Joseph Lalhnehzela chuan kaihruaiin, contingent 19 zingah hian Armed Contingent 1, Unarmed Contingent 5, School Contingent 13 leh SSA Pipe Band-te an tel a. Parade entir zingah hian School contingent-te atangin titha pathum thlanchhuah niin,  Eastern Flower Academy Girls Contingent chu pakhatna a puan an ni a,   Bethel Mission School  Contingent chu pahnihna niin, pathumna chu  Govt. Vengthlang M/S Contingent te an ni a. Armed leh Unarmed Contingent inkawpah  Student Police Cadet, Govt. GM H/S Boys Contingent pakhatna niin, NCC Govt. GM H/S Contingent chu pahnihna niin, Student Police Cadet, Govt. GM H/S Girls Contingent-te chu pathumna an ni. Khuallian hian  thalai leh naupangte ruihhlo laka an fihlim theihna tura zirtirna film tawi Champhai District HIMNA-MADAT Documentary Film ‘Hmelma’ tih chu a tlangzarh nghal a. Hemi hnu hian Project HIMNA-MADAT hnuaia kohhran thalaite puala ruihhlo thatlohna inzirtirna video tawi insiamsiak lawmman pawh semchhuah a ni a, Bethel Branch KTP  chu pakhatna niin, Vengthlang Branch KTP leh AYM, Bethel Veng-ten an dawt a. Heng bakah hian TennisTournament buatsaiha lawmmante sem chhuah  a ni bawk.