Vawiin khan HBSC Ground No. I-ah Hnahthial District-ah a vawi khatna atan Republic Day 2020 ropui taka lawm a ni. Hnahthial District Bawrhsap Pu Vanlalmawia chu khuallian niin Hnam Puanzar a pawt parh a, school parde contingent 12-te Hnam Puanzar chibai buk a chhang let a ni.

 Thu sawiin Hnahthial Bawrhsap Pu Vanlalmawia chuan Hnahthial District mipuite chibai bukin duhsakna a hlan a, India ram chu kum 1947 ah British lak atanga indangin kum 1950 January 26 atangin keimahni Dan siam, India Constitution chu kan lo hmang tan ta a. Hei hi Republic kan lo nih tanna ni, ni lawmawm leh ni ropui tak a ni a. India chu kan danpui hian Sovereign, Socialist, Secular, Democratic, Republic ni turin min duan sak a. Chutiang ang tak chuan mahnia ro inrelin, tu ram thunuaiah mah awm lovin kan lo awm ta a, keimahni Danpui siam ngei hmangin ro kan lo inrel ta a, he kan Danpui hmang hian India ram chu Democracy ram hlawhtling takin kum 70 chuang lai kan lo kal ta a ni a ti.

 Khuallian chuan Mizoram Sorkar pawhin hmasawnna kawng zawhin Sorkar in theihtawp chhuahin kawng hrang hrangah hma a la mek a. Kawng hrang hranga Sorkar hmalaknate hi a ropuiin a chhinchhiahtlak hle a ni tiin, Hnahthial District pawh Mizoram Sorkar in District thar a siam zingah August 2019 atangin a takin a lo function tan ta a. Independence Day pawh District tharah a hmasa ber atan India Flag pawt pharhin kan lo hmang tawh a. Vawiinah hian Hnahthial District a nih hnua Republic Day hmasa ber kan lo hmang leh ta hi a lawmawmin a ropui hle a ni. Sorkar in District tihchangtlunna atan chak takin hma a la chho mek a. A bul tanna atana Deputy Commissioner Office leh Superintendent of Police te dah tan in District anga inrelbawlna chhoh tan a ni a. Tunah hian District Urban Development Office din anih thu Sorkar in a tichhuak tawh a, SDO (Sadar) chu DUDO hna bul tan turin ruahmanna siam a, District Agriculture Office din a nih thu sorkar in a tichhuak bawk a, a lawmawm hle a ni. Chutiang zelin Sorkar ruahmanna siamin kan District tihchangtlunna tur kawng hrang hrang a kalpui chho zel dawn a ni tiin Rural Development hma lakna te, Urban Development & Poverty Alleviation lam te; Education lamah te, Health & Family Welfare lam te, PWD, PHE, P&E lam te; Social Welfare lam te; Agriculture, Horticulture, KVK Hnahthial, Fishery Department; Industry leh Sericulture te, Environment & Climate Change-a hmasawnna hnathawh hrang hrangte a tarlang in, he ni-ah hian kan ram tana kan inpekna titharin kan puanven sawi chhing theuh ila. Mizoram State leh kan District hian hma a lo sawn zel theihna tura theihtawp chhuah thar theuh turin mipuite a sawm a ni.

 School parade contingents 12 te hi High School leh Middle School section-ah te then niin High School section-ah 1-na Moriah Public School niin 2-na Govt. High School leh Govt. Southern High School te chu 3-na an ni. Middle School Section-ah Nuchhungi English Medium School chu 1-na niin English Congregation School chu 2-na an ni a, 3-naah St. Stephen's School an awm bawk. Republic Day lawmnaah hian Hnahthial Officers' Club (HOC) te chuan an lo tih thin angin Hnahthial ti hmingtha tu mi 3 H. Lalvenzuali d/o H. Lalthanghuta, MA (Socialogy)-a Gold Medalist; C. Lalhriathlua s/o C. Lalhmingmuana, Mathematics Competion-a Middle School Level-a 3-na dawng te, HC. Lalhmahruaizela, Bullet Bike Rider, Bullet bike hmanga khawvela motor kal theihna hmun sang ber Khardungla khalh thleng bakah Mizorama hmun hmingthang engemaw zat bike hmanga tlawhchhuak tute hnenah chawimawina an hlan a ni.