Vawiin khan India Republic Day vawi 71-na chu Lawngtlaia Central YLA khelmualah ropui taka lawm a ni a. Lawngtlai Bawrhsap Pi Shashanka Ala, IAS chu Khuallian a ni.

Zing ni chhuah rualin sawrkar pisa leh hmun pawimawh dangah te India hnam puanzar zar a ni a. Zing dar 7:30-ah CYLA khelmualah Khuallianin hnam puanzar pawt pharhin, hnam puanzar chibai buktu parade contingent 11 te chibai buk a chhang let nghal bawk.

Khuallian Pi Shashanka Ala chuan Lawngtlai District mipuite chu Republic Day chibai bukin, India ram Danpui duang chhuaktu ram hruaitu hmasate zahna chibai a buk a. Lawngtlai District chhunga hma sawnna hna thawh hrang hrang tar langin, MGNREGA hnuaiah Lawngtlai District-ah job card holder 31943 an awm mek thu leh kum 2019-20 chhungin ni 76 inhlawhna siam a nih tawh thu a sawi a. KMMTTP kawngpui sial mekah hna 89.74% zawh a nih tawh thu te, NH-54 kawngpui zauhna tura ram lak chungchang buaipui mek a nih thu leh District chhung inkal pawhna kawngpui dang pawh thawm that chhoh mek a nih thu a sawi a. Khum 50 awmna tur District Hospital building sak mek a nih thu leh February 2020-ah chuan peih fel hman beisei a nih thu sawiin, Kayakalp 2018-ah District Hospital Lawngtlai chuan Mizorama damdawi in fai ber (1st prize) leh mawi ber (most beautiful award) lawmman a dawn kawp thu a sawi a. Intensified Mission Indradhanush Phase-II hnuaia rai puar leh naupang kum nga hnuai lam hri danna pek thu-ah kum hmasa lama 70% atangin March 2020-ah chuan 90% kai theih beisei a nih thu a sawi. 

Health Worker zirna ANM School pawh a kum thumna chauh a la ni chungin 1st batch atangin top ten-ah mi 4 langin, Mizorama a tha ber dinhmunah an ding mek tih sawiin, Bawrhsap chuan zirna lama hma sawn turin theih tawp chhuah a nih thu a sawi a, EduFix hnuaiah zirtirtute zirtir lai video siam a nih thu leh zirlaite hman theih tura chhawp chhuah tum a nih thu te, Samagra Shiksha hnuaiah naupang vohbikte'n zirna tha an dawn theihna tura hma lak a nih thu te, sikul thenkhatah smart classroom buatsaih a, sikul tina library din a nih thu te, sawrkarin pre-school-te tihchangtlunna tura tanpuina sum a pek thu leh DIET Lawngtlai te'n kumin chhungin zirtirtute training ngawrh taka an kalpui thu te a tar lang.

Venhimna hna thawktu Lawngtlai District Police te'n tlin taka an hna an thawh thu sawiin, special patrolling unit "Ralveng" din thar a nih thu a sawi a. Rulkual-R. Vanhne-Paithar-Saikah te'n an intawm tur Combined Water Supply Scheme Rs vaibelchhe 11.04 senga siam chu kumin chhunga peih fel a nih tur thu sawiin, mipuite'n hnianghnar taka tui an dawn theih nan sawrkarin theih tawp a chhuah thu a sawi a. Power & Electricity Department hnuaiah quarters leh sub-station thar din leh a awm sa tihchangtlun hna thawh reng a nih thu sawiin, Saubhagya scheme hnuaiah in tin tihenna tur pawh kalpui mek a nih thu a sawi.

Bawrhsap chuan District Administration leh District Council te'n thawh hona tha tak an neih thu sawiin, LADC hnuaia hma sawnna hna thawh hrang hrang chu LADC Planning & Programme Implementation Department-in a vil thu a sawi a, Tribal Sub-Scheme atanga Rs nuai 950 dawn a nih thu leh, chu chu Lawngtlaiah Skill Development Training Centre leh Tribal Girls' Hostel sak nan te, Vawmbukah Community Centre sak nan te hman tum a nih thu a sawi.

Sikul naupangte'n thei leh thlai tharlam leh hrisel an hmuh theih nana sikul, anganwadi leh naupang enkawlna hmun tina chuktuah huan siam project, "Kan Sikul, Kan Huan" hlawhtlinna chu lawmawm a tih thu sawiin, ram chhung district tam takah an entawn thu leh Skoch award of merit leh G-files governance excellent contribution award a dawn bakah, Outlook nutrition warrior atana thlan a nih thu a sawi bawk.

Khuallian chuan mahni hnam ziarang leh tih phungte humhalh a, chawi nun zel a pawimawh thu sawiin, hnam kut hrang hrang - Hlukhla leh Chapchar Kut bakah, hnam ziarang chawi nunna tur kut dang - Chokhlei Kut te hman thin chu thil tha tak a nih thu a sawi a. Sakhaw tlem zawk (minority)-te kut hmanna atana sawrkar laipuia sum an dil pawh a chhuah thuai a beisei thu sawiin, Lawngtlai DC leh Siaha DC tang kawpa February ni 7 & 8-a Kawlchaw bul Chhimtuipui kama Kolodyne Music Festival buatsaih tur pawh hnam ziarang chawi vulna hmanrua atana hman theih a nih a rin thu a sawi.

Sawrkarin kawng tinrenga mipuite mamawh phuhruk a tum thu sawiin, chu'ng kawngah chuan mipui thawhpuina a mamawh tih a sawi a. Sawrkar department hrang hrang bakah, tlawmngai pawl, kohhran, chanchinbu mi leh mipuite'n District hma sawnna atana district administration an thawhpui thinnaah lawm thu sawiin, la thawhpui leh zel turin a ngen zui bawk.

Thu a sawi zawh hian Khuallian chuan lawmman hrang hrang a sem nghal a. Republic Day parade-a school contingent-ah Jehova Jire High School chu pakhatna niin, pahnihna Ngurnunsangi English School leh pathumna Govt Region Higher Secondary School te an ni a. Unarmed contingent-ah Govt Model English School Scouts & Guides chu pakhatna niin, pahnihna Downtown English School Scouts & Guides leh pathumna Don Bosco School NCC te an ni.  He'ng bakah hian parade endiktu (judge)-te, parade commander te, Mizoram Police armed contingent te, Samagra Shiksha Pipe Band te leh parade contingent dang zawng hnenah lawmman pek a ni bawk.

Republic Day vawi 71-na puala buatsaih Volleyball Running Trophy mipaah College Veng Volleyball Club an champion a, hmeichhiaah BDA Volleyball Ball club an champion thung. Republic Day Badminton Tournament 2020-ah mipa singles-ah K. Lalrotluanga (Chandmary BC) champion-in, hmeichhe doubles-ah Tlangthanmawii leh PC Vanlalzawmi (Electric Veng BC) te inkawp an champion a. Mipa naupang kum 15 hnuai lamah Lalropeka (Electric Veng BC) champion-in, kum 13 hnuai lamah C. Lalramhlimpuia (Chandmary BC) a champion bawk.

He hunah hian "Kan Sikul, Kan Huan" hma laknaa che tha sikul - SSA Residential School (AOC Veng Lawngtlai), L-VI Primary School-I (College Veng), Longpuighat Comprehensive M/S, Ajasora-III P/S, Govt H/S Bualpui NG leh Govt M/S Bualpui NG te hnenah lawmman hlan a ni bawk.

Vawiin Lawngtlaia Republic Day lawmnaah hian LADC CEM Pu T. Zakunga te, Chairman Pu V. Zirsanga te, Lawngtlai SP Pu Amit Goel, IPS te bakah, LADC-a member te, state leh district council-a officer te, tlawmngai pawl hruaitute leh thu thar theh darhtu te, sikul naupang leh mipui eng emaw zat an tel a. Pathianni a nih avangin VIP At Home erawh buatsaih a ni lo.