India ram Danpui hman tanna ni hriatrengna leh lawmna ni, Republic Day chu India ram hmundangte rualin Mizoram dung leh vangah te pawh ropui taka lawm a ni a. Mizoram chhunga 71st Republic Day lawmna programme lian ber chu tukin zing dar 7 khan Sipai Lammualah neih a ni. He hunah hian Governor P.S. Sreedharan Pillai chuan Hnam Puanzar pawt pharhin zahna chibai a buk a. Parade contingent-te a endik hnuah parade contingent te hnam puanzar chibai bûk a chháng lêt a; Republic Day thuchah a sawi chhunzawm nghal a ni.

India Danpui siam a nih a, kum 1950, January 26 a Kumpinu Sawrkar siam Danpui, Government of India Act(1935) a rawn thlak tak Ni hriatrengna leh lawmna ni atan Republic Day hi hman thin a ni a. He Ni pawimawh tak hi India in ama puala Danpui a hman tanna ni a nih bakah ram pakhat, mahnia thuneihna neia inrelbawl hrang( Independent Republic), khua leh tui ten rorel tura an aiawh an thlanna ram a nih tanna ni a ni.

Republic Day vawi 71-na puala thuchah sawitu Governor P.S. Sreedharan Pillai chuan Zoram dung leh vanga khua leh tuite zawng zawng duhsakna chibai a buk hmasa a. India ram chu khawvelah Mipuite thuneihna ram lianber leh Democracy hlawhtlinna ber, a chhungah engemaw val tal pawha inthliarna te leh inenhranna awm ve lohna, khawvel ramdangte leh ram thenawma chengte pawhin an awh ngawih ngawih a ni a ti.

He Ni lawmawm takah hian tuna kan dinhmun duhawm tak kan neih theihna tura thisen leh thlantui fara, an nunna hial lo hlana, zalenna lo sualtu hruaitu hmasate inpekna thuk tak leh duhsaknate chu zahna lantirin kan hre thar leh theuh tur a ni a ti a. Governor chuan Zalenna sualtute khan zalenna min pe a; Danpui kan inrelbawlna tur min siam sak bawk a. He Danpui hi dan naran a ni lova, uluk taka duan, hmathlir thui tak nei leh mithiam chungchuang tak tak, hruaitu hmasate’n kawng tinrenga ram mipuite hma an sawnna tur bakah khua leh tui zawng zawng ten an chanvo diktak an chan vek theihna tura Danpui nih tling a ni a. Tun thlengin a rintlak zia kan hmu mek zel a ni a ti. India Danpui chu " India chu Bharat" a ni tiin a in tan thu a sawi a. Governor chuan Bharat chu tun hma atang tawk khawvel mi te zah leh mitin, chitin te lungrual taka an lenna ram a ni a. Khawvela sakhaw lian deuh deuh te lo pianchhuah na hmun a nih avangin sakhaw zalenna hnuaiah inpumkhatna a awm thu a sawi a. "Vanduaithlak takin mi thenkhat ten inpumkhatna tichhe thei zawngin thil ti thin mahse keini chuan inpumkhatna hi kan ngai pawimawh tlat dawn a. Tun dinhmuna phei chuan inpumkhatna leh indawhtheih tawnna kan mamawh lehzual a ni", a ti.

Zalenna, remna leh muanna hnuaiah hmasawnna a awm thin tih a sawi a. Hun reilote chhung, kum khat emaw lek Mizoram Sawrkar chuan hmasawnna ruhrel pawimawh tak tak din hman tawhin hmasawnna kawngah thui tak ke a pen tawh a ni a ti. "Chief Minister viak tha tak, hruaitu nih tlin kan nei a. A ni hian state hmasawnna tur leh ham thatna turin theihtawp a chhuah mek a. Central Sawrkar hotute nen pawh an in hre tha hle a, kan vannei hle a ni", a ti.Tun kum khat liamta chhung khan hlawhtlinna tam tak zingah a langsar zual pathum chhuanawm tak tak a awm tih a sawi a. A hmasaberah chuan Central Sawrkar, Mizoram Sawrkar, Tripura leh Bru-Reang ten kum 22 chhungzet sum, tha leh hun sengsoa kan buaipui Bru-Reang harsatna chu inremna thuthlung ziakin kan ching fela a lawm awm tak zet a ni a ti a. Pahnihnaah chuan Sawrkarin HPC(D) te Peace Accord a lo siampuina rah leh Remna leh Muanna kawngah ka sawrkarin a tul anga piang te a tih zel avangin Sinlung Hills Council pawh boruak muanawm tak hnuaiah hlawhtling taka neih a ni a. Hei hian helai bialah pawh hmasawnna kawnga ke pen a tichak sawt dawn a ni a ti. Pathumnaah chuan Mizoram History a lianber, Mizoram State Games hlawhtling takin kan rawn huaihawt thei a. He hunah hian Mizo thalai infiammi hmalam hun eng tak takte tan an theihna te pholanna hun siamsak a ni a. Hei hian Infiamna Khawvelah hma kan sawnchhoh zel na turin sawrkar chuan a tih theih a piang te tihzel a tum tih a chiang hle a. Ka sawrkar chuan Khelmual, infiamna hmunhma leh infiamna hmanraw tha zawk te pawh chhawpchhuah zel dawn a. Heng hlawhtlinnate hi Zoram mipuite tan thil lawmawm tak leh inchhuanna tham a ni a ti.

Kan state chuan tun kum reilote chhung khan economy lamah nasa takin hmasawnna kan nei tih a sawi a. Nikum chhung khan ei leh bara kan thanna chu 14.82% niin, India ram state dangte nen khaikhin pawhin a thang chak ber pawl kan ni a. Kum 2012-2018 chhung khan Mizoram hmasawnna chu chawhrualin 12.75% niin, hetiang taka kal tluan hi kan la nei ngailo a ni a ti. Hetiang ang zela kan kal chho a nih chuan kum 10 chhung chuan retheihna um bovin, state intodelh leh sum lakluh inrualkhai tak kan la ni mai ang tih a rinawm tih a sawi a ni. Kan hmasawnna chu sector hrang hrangah a innghat a tih a sawi a. Hengte hi Socio-Economic Development Policy (SEDP) hnuaiah khaikhawm a ni tih a sawi a. Chak taka hma la tur leh sector pawimawh zual bik vil turin SEDP hnuaiah Board 14 din a ni a, heng board te hi Minister, MLA leh mithiam bik te leh official te enkawlna hnuaiah kalpui a ni a. SEDP hmalakna kalpui tura ruat sawrkar department 25 hmalakna an enzuiin an kaihruai dawn a ni tih a sawi a. SEDP hnuaiah hian Nationl Bamboo Mission nen tangkawpin rua chi hnih – Dendrocalamus Latiflorus leh Dendrocalamus Brandisii te chu Area Expansion Scheme a kalpui tan mek a nih thu a sawi bawk a ni. Governor chuan State hmasawnna chu Autonomous District Council Area te hmasawnna tello chuan a famkim theilo tih a sawi a. District Councilte 3n huamchhungah te hmalakna thar tam tak kalpui mek a ni a, hmasawnna atan sawrkarin state pum huapin ruahmanna a siam a ni a ti.

Mizoram sawrkar chuan mipuite hriselna a ngaipawimah em em a, a bik takin thingtlang kilkhawr zawk a nu leh naupangten hriselna tha an neih theih nan theihtawp kan chhuah a ni tih a sawi a. Hetih mek lai hian HIV/AIDS hian harsatna lian tak min thlen mek a, theihtawp chhuah a ral beih ang tak tak a kan beih let a tul tawh a ni ati. He natna darzau zel tur veng a titawp tur hian mipuite hnenah uar lehzuala zirtirna kan kalpui a tul thu sawiin kohhran, khawtlang leh tlawmngai pawlte thahnemngaihna leh phungbawmna tello chuan sawrkar tan chetlak a harsa a. Sawrkar, kohhran leh tlawmngai pawlte zawng zawng he natna tihbaiawm tak beilet tur hian tanrual a ngai a ni a ti. Mipuite tana hriselna tha pek hi sawrkar intiamna a ni tih a sawi a. Damlote inenkawlna, a bik takin miretheiten damlohna avanga inenkawlna senso tam tak an pek thin lo chhawk zangkhai turin tunhnai maiah khan Mizoram State Health care System thar leh changtlung zawk sawrkarin a kalpui tan tih a sawi a. He malsawmna sawrkarin a mamawhtute tana duhsak taka a ruahman hi bel chianga, a tul hunah chhawr thei theuh turin khua leh tui te a chah bawk a ni.

Republic Day thuchah a sawiah hian Sawrkar hmalakna hrang hrang, sawrkar hmachhawp hrang hrang, sawrkarin hmalakna hlawk deuh nia a ngaih leh a awn lam te a sawi chikim hle a. Hun reilote chhunga sawrkar hmalakna te leh kan sawrkarin tan kan lakna tur laite bakah hmasawnna kawnga khua leh tuite tihtur leh mawhphurhna hrang hrang te pawh a tarlang a ni.

A thuchah tawp lamah Governor chuan Central Sawrkar leh State Sawrkar hnuaia hnathawk zawng zawngte chuhna tha an thawh avang leh an inpekna avanga lawmthu sawiin tun aia tan la zual tur leh hlawhtlinna sang zawk thawk chhuak turin a fuih a. Mipui aiawha thlan tlin hruaitute, Chanchinbumite, zirlai, thalai, tlawmngai pawlte leh kohhranmite hnenah Mizoram hmasawnna kawnga an theihtawp an chhuah avang pawhin lawmthu a sawi bawk a. Governor chuan vawiina Police zinga rinawm taka hna thawka chawimawina tangkapui dawngtute pawh a lawmpui tih a sawi bawk a ni. Kan hlawhtlinna te a lawmawm a, kan thawhhona te a tha tih sawiin a pawimawh ber chu ram ropui leh ngelnghet kan nih chhunzawm zel na tura theih tawp chhuah a ni a ti a. “Vawiin Ni pawimawh takah hian khua leh tute zawng zawng, Indian ram ropui zelna, inpumkhatna tur leh India Danpui lakah rinawmna thu tiam chhunzawm turin kan inchah nawn a. India ram hi khua leh tui te intluktlanna, sakhuanna avang inthliar hranna awmlohna hmun leh khawilai pawh hi khua leh tui te ta a ni a. Mizoram pawh ram nuam, zalen taka kan chenna, hmun ralmuang leh kan zahawmna hmun a nih zel theih nan keini hian mawh kan phur a ni”, a ti.

Kumin Republic Day Ceremonial Parade-ah hian Contingent 30 an awm a. Ceremonial Parade hi Parade Commander Pu C.S. Lalrinzuala, Assistant Commandant 5th IR Battalion leh 2nd Commander Pu C. Lalmalsawma , Deputy SP CID(Crime) ten an kaihruai a. Armed Contingents pariat, 4 unarmed contingents Pali, School Contingents sawmpali leh band party 4 ten Republic Day Parade ropui takin an rawn entir a.

Armed Category-ah 46th AR, 1 Mizo Air Squadron NCC Armed leh Mizoram Home Guards te chuan Parade thiam lawmman pakhatna, pahnihna leh pathumna an la a. UnArmed Category-ah Pachhunga University College NCC, Ex-Servicemen contingent leh 1 Mizo Air Squadron NCC Unarmed te chuan Parade thiam lawmman pakhatna, pahnihna leh pathumna an la a. Schools contingents zingah Govt Mamawii H/S, Oxford HSS leh Springfield HSS te chuan Parade thiam lawmman pakhatna, pahnihna leh pathumna an la a bawk a ni.

Republic Day lawmnaah hian PRESIDENT'S POLICE MEDAL FOR DISTINGUISHED SERVICE nikuma dawngtu mi 2, POLICE MEDAL FOR MERITORIOUS SERVICE nikuma dawngtu mi 2 leh Governor’s Medal dawngtu mi 3 ten Governor hnen atangin lawmman an dawnga. Kuminah hian PRESIDENT'S POLICE MEDAL FOR DISTINGUISHED SERVICE chu Pu LR Dingliana Sailo, IPS, SP, CID(Crime) in a dawng leh dawn a. POLICE MEDAL FOR MERITORIOUS SERVICE pawh Pu Laldawngliana, MPS, Director, F&ES, Pu Lalthafamkima Jongte, MPS, Commandant, 1st IR BN leh Pu Lalmanliana, SI(UB) ten an dawng dawn bawk a ni.

A hnuaia tarlan te hi Police hnathawk zinga hnathawhthat avanga chawimawina dawngtute an ni.

PRESIDENT'S POLICE MEDAL FOR DISTINGUISHED SERVICE awarded to

1. Pu R.A. Sanjeev, IPS, DIG(Training)
2. Pu Malsawma Royte, Dy. SP, CID (SB)

PRESIDENT'S POLICE MEDAL FOR MERITORIOUS SERVICE Awarded to

1. Pu Neihchungnunga, IPS, DIG (CID)
2. Pi Lalmuanthangi, Inspector (M) Police Headquarters

GOVERNOR’S MEDAL

1. Sub Inspector (UB)Zirthanga Pachuau, CID, Gold Medal
2. Sub Inspector (UB)R. Lalhmingliani, Lunglei, DEF, Silver Medal
3. Constable (C/17013) Laldinpuia, Aizawl, DSB, Silver Medal