India Republic Day vawi 71-na chu Mamit GSA Playground-ah ropui taka hman a ni a. Khuallian Dr.Lalrozama, IAS, District Bawrhsap chuan Parade Contingents 13 te hnam puanzar chibai buk a chhang let.

Khuallian chuan thu sawiin he Ni lawm tura kalte leh Mamit District mipui zawng zawngte Republic Day leh kumthar chibai ka buk a.

Vawiin ni ropui takah hian India ramin mahni kea dinga zalenna a neih theihna tura thisen leh nunna hlu tak hlantu hnam pasalthate leh kan hnam pa Mahatma Gandhi te, Jawaharlal Nehru te, Subhash Chandra Bose leh hnam pasaltha kal ta midang zawng zawngte zahna chibai ka buk a.

India ram leh Mizoram-in kawng hrang hranga hma a sawn mek laiin kan District pawhin hmasawnna hmel hrang hrang a hmuhte a tarlang a.DC Office, Mamit hnuaiah Aadhaar enrolment kalpui zel niin Aadhaar thla la tawh mi 90461 an awm a, hei hi mipui awm zat (target population) atanga chhuta 99.03% a ni a. La ti ve lote tan pawh DC Office leh BDO Office-ah:te enrolment hi a tih theih reng a ni. Kum kalta 2019-a 9th Batch Bru Repatriation-ah khan Bru chhungkaw 199 lai mai kan District chhungah an rawn let a. Puitling (Adult) 501 leh Nunau (Minor) 316 te chu kan District chhunga khaw 26 ah inbengbel tura hruaikir an ni a ti.

Sawrkar laipuiin duhsak taka Aspirational District 115 zinga min telh hnu hian hmasawnna tam tak hmuh theihin a awm a. North Eastern Council (NEC) atanga fund lo kalte chu line Department hrang hrangah sem darh niin hmasawnna hna tam tak thawh mek a ni a. Health and Nutrition bikah Aspirational District zinga Delta ranking ah 2-na dinhmun October, 2019 khan kan hauh a, hei hi chhinchhiahtlak tak niin thawktute an fakawm hle a ni a ti. Tin, nu leh naupang hriselna kawngah pawh hma kan sawn hle a, naupang sawngnawi (Severely Acute Malnourished) pawh July-November, 2019 chhung lek khan mi 35 atangin mi 7-ah an tlahniam bawk a. Hei hian faina, thianghlimna leh hriselna lama mipui kan thanharh tawhzia a tilang chiang hle bawk a ni a ti. Poshan Abhiyan hnuaiah Aganwadi centre hrang hrangah inbukna tha zawk leh changtlung zawk te, mobile phone 282 laite semchhuah niin tangkai taka hman mek zel an ni a. Naupang mamawh zualte hnenah Education, Medical leh Nutrition lama chhawmdawlna’n thla tin Rs.2000/- mi 39 hnenah an Bank Account kaltlanga pek an ni bawk a ti.

Hriselna kawngah kum telin hma kan sawn a, Intensified Mission indradhanush 2.0 hnuaiah naupang hri danna pek chu 101% lai niin a lawmawm hle. Tin, Mobile Medical Unit (MMU) te hian hmun harsa leh chengker tak takah atanga a thlawna inentirna buatsaihin a thlawn vekin damdawi an sem thin bawk a. TB veite tihdam tur target 90% chu 100% tihdam an ni a, he programme hnuaiah vek hian vaihlo ngai nghei zat pawh 23.34% niin thawktute inpekna a fakawm hle a. DRO Office hmalakna-in Mamit District Statistical Handbook 2018 chu 20th April 2019 ah tihchhuah a ni a ti bawk.

Sawrkar laipuiin kut hnathawktute hmakhua ngaiin Central scheme hrang hrang rawn chhawp chhuaka, kan District ah pawh National Mission on Oil Seeds and Oil Palm (NMOOP) hnuaiah Oil Palm seedlings 7738 no’s semchhuah a ni a, kum 2018-2019 chhungin Oil Palm rah (FFB) 2490 MT Rs.136,95,000/- man hu tharchhuah a ni a. Inkalpawhna tha zawk kan neih theihna turin chak taka hma lak mek zel a ni a. PWD Mamit Division hnuaiah Central Scheme PMGSY hmangin kan district chhunga khaw hrang hrang inkalpawhna heng Mamit-Phaizau, Kawnmawi-Chhippui, Phuldungsei- Parvatui, Tuipuibari- Andermanik kawngte chu a laih hna beihpui thlak mek zel a ni. Heng bakah hian Maintenance Action Plan atangin khawpui chhung kawng chei that hna thawh zawh tawh a ni bawk.

Mamit leh a chhehvel Power infrastructure tihchangtlun na’n Mamit Power Division hnuaiah hna kal lai engemaw zat awmin Integrated Power Development Scheme (IPDS) Project hnuaiah Rs.1858.37/- lakh hmangin Zawlnuam leh Mamit khawpui chhungah 33kV Sub-Station thar leh Power distribution semchhuahna siam a ni a, 11 kV line, Low Tension Line leh Distribution thar bun hna Mamit khawpuiah kalpui mek a ni bawk. Tin, NESID Scheme hnuaiah 132/33kV Sub-Station thar bun hna chu Mamitah thawh mek zel niin hun rei lo teah Zawlnuam Sub-Station nen kan inthlunzawm vat thei dawn a ni. NEC Funding-na hnuaiah Rs.5495 lakh 132kV single circuit line Bairabi-West Phaileng chu thawh mek zel niin North Eastern region Power System Improvement Project (NERSIP) hnuaiah Rs.10183.04 lakh hmangin West Phaileng to Marpara Sub-Station thlunzawm hna thawh mek a ni a.
Hna thar tawh a nih mek lai hian 33kV Rawpuichhip leh Zamuang Sub-Station pawh DDUGJY Scheme hnuaiah Rs.227.05 lakh hmanga thuam that mek an ni bawk.

Zirna lamah hma kan sawn theihnan chak taka hma lak mek zel a ni a. Naupang kum 6-14 inkar sikul la kal lote sikul kal tura hmalakna-ah mi 253 lai sikul pangngaiah tun academic session chhung khan luh tir hman an ni. MLA Fund atangin sikul ekin 26 sak that a ni a, tui dah khawlna pawh sikul 20 laiah pek an ni bawk. Swachh Bharat Mission hnuaiah PHE Department lamin tui thianghlim in tur school thahnem takah pek niin Zirna hian mi tin a huap vek a, pian phunga rualbanlo naupang mahnia sikul kal thei lo mi 112 te’n sikul an kal ve theihnan Transport leh Escort Allowances pek an ni bawk.

Ziak leh chhiar lama hma kan sawn nan leh naupangte’n zirna awmze nei leh mumal zawk an dawn theih na’n DIET, Mamit nen tang kawpin NISHTHA hnuaiah Primary leh Middle School zirtirtu leh Headmaster mi 328 hnenah Stage 3 training pek an ni a. Tin, naupangte’n nun kawng dik an neih nan zirtirna kawngah Sensitization Programme on Drug Demand Reduction chu zirtirtu mai ni lo, Khawtlang hruaitu leh kohhran hruaitute hnenah training pek tel niin hei hian zirlai naupangteah eng angin nge an nun leh an zirlai a nghawng tih enlet lehna Achievement Survey neih leh thin a ni a.DEO leh Samagra Shiksha Secondary School hnuaiah pawh hmalak niin, Science subject bika hma kan sawn theih na’n STAM (Science Teachers Association of Mizoram) nen tang kawpin District Level Science Congress programme a buatsaih a ni a.Mamit Higher Secondary School-ah Science Stream hawn thar a ni ta bawk.
MZP Hqrs., Mamit nen tang kawpin Quiz competition for Secondary students buatsaih thin a ni bawk Govt.
RUSA funding atangin Govt. Mamit College-ah Library cum Seminar Hall Rs.1,60,00,000/- sengin sak mek a ni a, tunah hian 70% zawh tawh ni a. RUSA hnuaiah vek hian Academic block/building tihchangtlunna turin Rs.1,53,00,000/- hmuh a ni bawk a. Hei pawh hi sak mek niin 65% sak zawh tawh a ni. NEDP Fund atangin Examination Hall tha tak Mamit college-a sak chu zawh tawh a ni bawk.

District Urban Development & Poverty Alleviation (UD&PA) atangin mirethei in sak tanpuina dawng Mamit khawpui chhungah mi 529 leh Zawlnuamah mi 239 awmin 1st Installment pek chhuah theih tura hmalak mek a ni. Tin, mi harsa zawk te’n damdawiin an pan changa an thlenna tur National Urban Livelihood Mission (NULM) hnuaiah Dharamsala chu District Hospital bul Lungsir Veng Mamit-ah Rs.35 lakh senga sak tura buaipui mek a ni a. Tin, khawpui chhung inrelbawlna mumal tak kan neih zawk nan khawpui chhung kawngsir leh inphur kuala thil zuarte tan Survey neih mek a ni a. Thalaite tan eizawnna tlaka an thiamna chher hriam kawngah nasa taka hmalak niin tun kum kalta chhung khan UD&PA (NULM) hnuaia Skill Training chhuak mi 204 lai kan District chhungah an awm bawk a ni.

Faina leh thianghlimna kawngah kan District-in hma nasa takin a sawn a, Swachh Bharat Mission hnuaia Individual Household Latrine (IHHL) atangin Mamit khawpui chhunga chungkaw 251 te hnenah ek-in sak tanpuina pekchhuah an ni a. Public Toilet hmun 8 (riat) ah sak mek niin, Thei leh thlai hrisel zawk tharchhuah kawngah Horticulture Division, Mamit hmalaknain PMKSY- Drip Irrigation hnuaiah Dragon fruit, Oil Palm leh thlai chi tha tam tham tak sem chhuah a ni a. District chhunga khaw hrang hrang heng Mamit, Rawpuichhip, Tuahzawl, Kawrtethawveng, Darlak, Zawlnuam, Tuidam leh a dangte-ah mi 25 hnenah Mobile Vending Cart sem chhuah a ni bawk. AES M. Orange leh Dragon fruit hnuaia beneficiaries te hnenah an thlai enkawlna tur sum fai Rs.30,000/- leh Rs.60,000/- pek an nih mai bakah a enkawl zuina tur hmanraw hrang hrang PP chemical leh fertilizer te pek an ni. Tin, RKVY-RAFTAAR hnuaiah Rawpuichhip khuaa chhungkaw 10 hnenah Aieng (Turmeric) chin na’n Rs.30,000/- zel unit 1-ah pek an ni a, a chinna material atan Rhizome pek theuh an ni bawk.

Boruak hrisel leh thianghlim kan mamawhzia hriain Afforestation Scheme hnuaiah EF&CC, Mamit chuan thing leh mau phunin 510 Ha. a zau a enkawl mek a. Tin, Green Mizoram Day-ah pawh thing tiak tam tham tak Mamit khawpui leh a chhehvel ramah phun a ni. Teak chingtute’n an teak-te an hralh theihna turin ruahmanna siam a ni a, Teak chingtu mi 331 lai an in register tawh bawk. Forest Reserved pawnlama huan neitu mi 210 hnenah Felling Permit pek ni tawhin kangmei chhuah rikrum thilah Mamit Fire Station te chu engtik lai pawha inralring rengin an duty bawk a ni.

Ei leh bara kan intodelh zawk na’n leh buhfai tha rualkhai taka kan ei theih na’n Ration Card Digitization leh Aadhar Seeding thawh mekah 91% Ration Card leh 69% Beneficiary zawh tawh a ni.

AH & Vety. Department lam chuan ran hrisel tak tak thlahpungin a hridanna ran 10,730 nos hnenah pek an ni. Tin, ran damlo 25410 nos enkawl an ni a, 890 nos zai an ni bawk. Poultry farming-ah nasa taka thangin artui 10,785 nos lai thar chhuah a ni.

Mamit District hian hmasawnna rahbi kai thar zelin Department pawh a rawn awm belh zel a, Cooperative Societies Office chu 18th Sept, 2018 khan hawn thar a ni a. Mamit District chhungah hian Primary Cooperative Societies 68 (sawmruk pariat) kan nei a. Govt. of Mizoram chuan Integrated Cooperative Development Project (ICDP) atan Rs.571.40 lakh min sanction bawk a ni.

KVI Mamit chuan Mamit District chhunga Bank hrang hrangte nen thawkhoin PMEGP hnuaiah a pung tlem chi-a loan diltute DLTFC hmanga recommend-in puktir thin an ni. Tin, Major Honey Mission hnuaiah Bee Keeping Association of Mamit District hnenah khuai bawm 300 lai pek chhuah a ni bawk.

Ruihhlo do kawngah Excise & Narcotics Department lam chuan hma a la zel a. Kum 2018-2019 chhung khan ruihlo thahnem tak man a ni a. MLPC Act, 2019 leh ND & PS Act,1985 hnuaiah mi 213 man an nih bakah Case 254 ziah luh a ni bawk.

Khawtlang ralmuanna leh venhimna kawngah Mamit District Police leh 4th IR Bn, Mamit te chuan thatho takin hma an la chhunzawm zel a. 9th Batch Bru Repatriation leh MLA leh MP Election, chhungin security tha tak hnuaiah zawh a ni. Ministry of Home Affairs hnuaia Project, Student Police Cadet pawh Mizorama a hmasa ber turin Mamitah hlawhtling taka din niin Govt. Mamit High School leh Govt. Middle School-II te chu he project tihhlawhtlin na’n thlan an ni a, nikum Independence Day leh vawiin Republic Day hian march past contingent pakhat ve ve an nei thei a ni. District Jail pawh changtlung zelin water cooler, TV set khat Mipa leh Hmeichhe ward-ah dah a ni a, tangte nun kawng dik kawhhmuh leh zirtir kawngah pawh khawtlang hruaitu kan NGO leh Kohhran hrang hrangte nen thawkhoin an rilru, taksa leh thlarau lamah intuaitharna neihpui thin an ni a ti.

PHED Mamit Watsan Division chuan tui thianghlim in tur supply kawngah nasa takin hma a la mek zel a. Mamit District chhunga khaw hrang hrangah Water Supply Scheme beihpuithlak mek zel niin heng- Teirei forest/Hruaitluang W.S.S, Phaizau W.S.S, Mualthuam ‘K’ W.S.S, Khantlang W.S.S (Solar Pumping), Suarhliap W.S.S (Solar Pumping) te chu zawh tawh a ni a. Tin, NABARD hnuaia Augmentation of Greater Mamit W.S.S: Part-I (Raw Water) chu thawh tan mek a ni bawk. Tin, Individual Household Latrine (IIHL), Community Sanitary Complex (CSC) leh Solid & Liquid Resources Management (SRLM) hnuaiah pawh chak taka hmalak mek zel a ni bawk.

Fisheries Deptpartment lamin sangha dil tihchangtlun na’n nasa taka hmalain NEFP Convergence scheme hnuaiah sangha note a man pangngai aia 50% a hniamin hralh a ni a. Dil neitute thlam sakna turin mi paruk hnenah Rs.90,000/- (1st instalment) a pe chhuak tawh a, dil thar siam na’n mi 14 (sawmpali) hnenah RS.18,900/- (1st Installment) theuh a pe bawk. Tin, sangha note khawina tur dil 1 Ha. a zau siam na’n mi 10 (sawm) hnenah Rs.16,200/- theuh a pe a. RKVY-Raftaar hnuaiah Rs.8.14 lakh dawn a ni a, hei hi sangha dil thar siam na’n 0.677 Ha. leh sangha note khawina tur dil siam na’n 0.566 Ha.ruahman niin benefiaciary chhungkaw 12 an nei mek a ni.

LAD Department hnuaiah Mamit District chhunga Village Council hrang hrangte’n an khaw chhung develop-na turin Excluded Areas Grant 2017-2018 atangin Rs.642.11 lakh a pe chhuak a. Step rem, leh a dang thawhnan a hman a ni. Hun rei tak ata Mamit District mipuiin kan nghahhlelh em em Vaisam Park chu Hon’ble LAD Minister Pu K. Lalrinliana’n Dt.22nd November, 2019 khan a hawng a. District mipuite’n tangkai zawka kan hman theih na’n hmalak chhunzawm zel a ni.

Land Resource, Soil & Water Conservation Department lam pawhin leilung tingheta sum chang thei thlai chinna kawngah hma nasa takin a la a. NABARD hnuaiah Rubber plantation, Rengdil leh Kanhmunah te a kalpui mai bakah Bawrai, Bungthuam leh Kanhmunahte Rubber processing Rs.48.00 lakh hmanga thawh mek a ni. NEDP kaltlangin West Phailengah Coffee rejuvenation thawh mek a ni bawk.

Kum 2018-2019 chhung khan DTO Mamitah motor 644 register niin heta tang hian chhiah Rs.99,64,269/- hmuh a ni a. Driving license leh Learner license pawh mi 600 hnenah pekchhuah niin chhiah Rs.5,39,000/- hmuh a ni bawk.

Taxation Department Mamit Zone chuan tun tum kal mekah State Goods & Services Tax – Rs.66,22,583/-
Integrated Goods & Services Tax – Rs.8,48,189/-
Profession Tax - Rs.29,67,060/-
Avaiin Rs.104,37,832/- chhiah an hmu a ni.

DRDA, Mamit hmalakna hnuaiah MGNREGS atangin inhlawhna kalpui chhunzawm zel a ni a, December thla chhung khan Ni 80 inhlawhna tur chhungkaw 21728 hnenah pek a ni. PMAY(G) atanga in sak tanpuina dawng tur SECC Data 2011 hmanga thlan chhuah chhungkaw 371 chenna in sak-sak niin Chief Minister Rural Housing Scheme (CMRHS) hnuaiah chhungkaw 177 te in sak tanpuina atan Rs.50,000/- zel pek an ni bawk.

District Sericulture Department, Mamit chuan maimaw pangang atangin Mulberry cocoon 750 kgs thar chhuah a ni a, Muga cocoon pawh 3173 lai thar a ni. Muga grainage building thar pawh sak zawh a ni a, Eri seed farm, Lengpui atangin Dfls 5400 thar chhuah a ni a, chhungkaw 200 te’n eizawn na’n an hmang mek a ni.

Khuallian chuan Mamit District hmasawnna atana thawktu zawng zawngte, Thutharthehdarhtute chungah lawmthusawiin a tul huna infinchhuah a, thurawn pe thin tur leh lungrual taka thawhhopui turin District mipui zawng zawngte a sawm nghal a ni.

India Republic Day vawi 71-na lawmna- ah hian parade Contingents 13 awmin Armed Contingent 1 School Contingents 10 leh Student Police Cadet contingents 2 an awm a ni. Parade commander hi Inspector F. Manhleia niin 2nd Commander hi SI Vanlalruata a ni. School Contingents atangin pakhatna St. Francis of Asssi niin pahnihna JNV School an ni a. Pathumna hi New Diamond School Girls Contigent an ni bawk.

Khuallian hian India Republic Day pual hian Mamit khawpui chhunga Home hrang hrang bakah District Hospital leh District Jail te a tlawh a. Sawmbikte pualin VIP at Home DC Bungalow-ah neih a ni bawk.