3528/2023-2024

Champhai the 26th January, 2024 - Vawiin khan ram chhung hmun dangte rualin Chhangphut Field, Champhai ah India Republic Day vawi 75-na ropui taka lawm a ni a, Pu James Lalrinchanna, Deputy Commissioner, Champhai District chu khuallian a ni.

Zing ni chhuah rualin Champhai District chhunga sawrkar Pisa hrang hrangah India Hnam Puanzar zar niin a lawmna pui ber chu zing dar 10:00 ah neih tan a ni. Pu James Lalrinchhana chuan hnam puanzar pawtparhin Parade Contingent 18, Armed 2, Unarmed 7, leh School Contingent 9 ten hnam puanzar chibai an buk chu a chhanglet a ni.

Khuallian Pu James Lalrinchhana chuan Champhai District mipui zawng zawngte chu Republic Day chibai a buk a. Republic Day 2024 kan lawm hian India ram ropui tak inrelbawlna atana pawimawh em em, ‘Ram Danpui’, ’ Constitution of India’ kan inpekna kan lawm a, He Ram Danpui hi mipui te rorelna, Democracy lungphum a ni, tiin India khua leh tuite tan zalenna sual chhuak tu ram hruaitu hmasate zahna chibai a buk bawk a ni.

Champhai Distict a Mizoram Assembly Election, 2023 hlawhtling taka zawhfel a ni chu Department hrang hrang, NGO, Political Party hrang hrang, MPF, Kohhran te leh mipuite tan ho na rah chhuah ani tiin, kan hma lawka Lok Sabha Election 2024 lo thleng leh turah pawh lungrual taka hmalak puiah a sawm a ni.

Republic Day 2024 lawmna hunah hian Khuallian chuan Champhai District-a Department hrang hrangte hmalakna thenkhat a tarlang a.

Union Home Ministry chuan Annual Ranking of Police Stations for 2023 hmanga a endikna ah India ram pum a Police Station tha ber Palina (4) atan Champhai Police Station a rawn thlang a. Certificate of Excellence a rawn hlan a ni. Election Commission of India chuan Best Electoral Practice Awards 2023 hnuaiah General Award (Security Management) chu Pu Vineet Kumar, IPS, Superintendent of Police, Champhai District hnenah a rawn hlan bawk a.

PMAY-HFA hnuaiah hian Republic Day 2024 Delhi a hman mekah Pi Lalmuanpuii d/o Zadala chuan Best House Construction atan thlan niin lawmpuina a dawng dawn a ni.

Champhai District chhunga Adhoc Grand-in-Aid High School 16 leh Middle School 2 te chu Sorkar school ah hlan kai an ni.

District-in pipute sulhnu hlu tak tak a neih chu vawnhima uluk taka enkawl a tul thu sawiin, khualzin tam tak min hipsaktu leh economy siamtha theitu an nihzia hre thar leh turin District mipuite a sawm a. Swadesh Darshan 2.0 hnuaia Champhai District thlanchhuah anih thu a sawi bawk a ni. Nitina min runtu ruihhlo chi hrang hrangte dona kawngah tan lak mar a ngai hle a ni tiin, Police leh Excise-te tha tichaka thawhpui tlattu NGO hrang hrangte leh kohhran hrang hrangte chungah lawmthu a sawi a. Khawtlang nun nuam tak leh him tak, hmasawnna kawng hrang hranga rual elna dik nena penchhuak nun nei turin District mipuite a sawm a ni.

President of India in huaisenna chawimawina a pek Jeevan Raksha Padak dawngtu Lalramlina s/o Pu Lalrinchhnaa, New Hruaikawn, Champhai District hnenah khuallian hian Medallion leh Certificate a hlan a.

Best Electoral Practice Awards 2023 under General Award (Security Management) chu Additional SP hnenah a hlan a. 4th Best Police Station in India lawmman chu OC, Champhai Police Station hnenah a hlan bawk a ni.

Kumin Republic Day lawmnaah hian Parade First Commander Pu Lalnunhlua, DSP leh Second Commander ASI C. Hmingthantluanga ten kaihhruaiin Republic Day Parade hmuhnawm tak buatsaih a ni a.

School Contingent ti thate chu hengte hi an ni:
1) Pakhatna: Govt GM Higher Secondary School Girls
2) Pahnihna: Bethel Mission School
3) Pathumna: BC Lalthlamuana English Academy

Unarmed Contingent:
1) Pakhatna: Bharat Scout & Guide, Govt Kanan Middle School
2) Pahnihna: NCC Govt GM High School (Girls)
3) Pathumna: Bharat Scouts & Guides, Govt Vengthlang Middle School

Republic Day 2024 puala buatsaih 2nd DC’s Chess Trophy lawmman pawh sem a ni a:

1st – Lalbiakmawia, Farkawn
2nd – Lallianmanga, Kanan Veng
3rd – Vanlalsangpuia, Electric Veng

Chhangphut Field-a hun hman zawh hnu hian Jericho Garden, Keifangtlang-ah sawm bikte pualin VIP's At Home neih a ni a. Republic Day lawmna puala buatsaih CDFA 2nd Division Football Tournament Final chu chawhnu dar 2 ah Kahrawt FC leh SM FC Khuangleng Team te'n an khel a ni.