3529/2023-2024

Lawngtlai dated 26th January 2024: Vawiin chawhma khan CYLA Playground, Lawngtlaiah Republic Day 2024 lawmna hun hman niin Parade Contingent 23 an in lan a. Lawngtlai District chhunga Sawrkar Office hotute, LADC hruaitute, tlawmngai pawl hruaitute, School naupang leh mipui thahnem tak he hunah hian an tel a ni.

Republic Day 2024-a khuallian Pu Cheemala Siva Gopal Reddy, IAS, Deputy Commissioner chuan India in mahni inrelbawl hrang thei tura danpui ‘Constitution’ a hman tanna ni Republic Day chu ngaih pawimawh a tul thu leh hemi puala hun kan hmanna hian thangtharte thinlungah ram hmangaihna a tuh nun zel a beisei thu a sawi a. Lawngtlai district tihhmasawnna tura kum 2023-24 chhunga Sawrkar Office hrang hrang kaltlanga hmalakna tlangpui a tarlang bawk a ni. Loneitute tanpui nan PMKSY hnuaiah Tui dah khawlna lian 68 leh a te 21 sak sak a nih thu te, huan siam nan ram 132.5 Ha a zau chu sawngbawl a nih thute leh chhungkaw 250 chuangin Oilpalm rah hralhin sum an dehchhuah mek thute a tarlang a. Ei leh bara intodelhna chuan zahawmna a ken tel thu sawiin, kawng hrang hranga intodelh tum turin kalkhawmte a chah.

Sa hrisel chauh mipuiin an ei theih nana Veterinary & Animal Husbandry department hmalaknate, Fisheries department hnuaia sangha dil 33 siam thar a nih thu leh Horticulture hnuaiah ram 115 Ha a zau chu Dragonfruit, balhla, serthlum leh thingfanghma chin nan buatsaih a nih thu Deputy Commissioner chuan a sawi a. District Hospital hmalakna a natna inkaichhawn theih loh enkawl a nih dan leh Program hrang hrang kaltlanga hriselna endikna kalpui thin a ni chu lawmawm a tih thu sawiin, nau piang thi zat titlem tura chhungkua leh khawtlang tanrual a pawimawh thu a tarlang bawk a ni.

Thalai te’n an nih tur ang an nih theih loh nachhan lian ber chu ruihhlo hman sual vang a nih thu Pu Cheemala Siva Gopal Reddy chuan sawiin, zirlaite chu ruihhlo hman sualna laka fihlim tur leh Mobile phone khawi chin tawk hre turin a chah a. Tuna thangtharte kutah hian kan ram hma hun thui tak a innghah tlat avangin mi rintlak leh tangkai an nih theih nan tun atang hian enkawlna tha pek an ngaih thu a sawi bawk.

Rural Development Department kaltlangin MGNREGA Card nei mi 37025 an awm thu leh hna 2567 thawh puitlin a nih tawh thu Deputy Commissioner chuan a tarlang a, heng bakah hian PWD enkawlna hnuaiah Sawrkar building 30 sak pum a nih thu te, kawlphetha mamawh zat phuhruk nan 25 MVA, 132/33kV Sub-Station sak hna kalpui a nih thu sawiin, heng hmasawnna ruangam hrang hrangte hi neitu nihna thinlung nen kan zavaia enkawl a pawimawh thu a sawi bawk a ni.

Autonomous District Council hnuaia hnathawh hrang hrangte leh kum lama upa leh mi harsate chhawmdawlna pek an nih dan Deputy Commissioner chuan sawiin, Lawngtlai district tihmasawn zel tur chuan Sawrkar, khawtlang leh tlawmngai pawl hrang hrangte inkarah inpawhna leh tanrualna boruak tha a awm a pawimawh thu a sawi a. Tun hun kan thlen theih nana ram tana nunna hlan zawng zawngte zahna chibai bukin thangtharte thinlungah ram leh hnam hmangaihna nung zel tura a duh thu a sawi.

Republic Day 2024 a Parade Contingent inlante endikna neih zawh hian District Hospital Poor fund, District Jail, Motherless Home leh Lairam Rescue Centre-ahte Republic day pualin tanpuina pek a ni a. School Parade Contingent atangin Jehova Jire Higher Secondary School, LAHAS leh ML Junior English School-ten lawmman an la a ni.