3530/2023-2024

Mamit, the 26th January 2024 : Vawiin chawhma dar 10:00 khan Mamit-a Republic Day 2024 lawmna chu GSA Playground-ah hman a ni a. Republic Day 2024 lawmna-ah hian Mamit Bawrhsap Pu V.L. Remliana chu khuallian a ni a, Hnam Hla play a ni a, Hnam Puanzar pawtparhin zahna chibai Parade Contingent- Armed-1; Unarmed-3 leh School-13 ten zahna chibai an buk a, khuallian hian chibai bukna a chhang let nghal bawk a ni.

Parade Commandant hi Inspector S. Lalhmingliana, 4th IR Bn, Mamit a ni a. Second Parade Commandant hi Inspector Vanlalvena, 4th IR Bn, Mamit a ni.

Khuallian Pu V.L.Remliana chuan vawiin Republic Day vawi 75-na lawm tura lokalte leh Mamit District mipui zawng zawngte Republic Day leh kumthar chibai a buk a. India ramin Danpui, Constitution kan neih tan ni January ni 26, 1950 kha kan tan ni ropui leh chhinchhiahtlak tak a ni tiin a sawi a. Hemi denchhen hian kumtin Republic Day hi kan lawm thin a ni tiin a sawi. Mipuite duhthusam leh beisei anga mi tin intluktlanna, zalenna, inunauna leh inpumkhatna ram ni tura India ramin mahnia inrelbawlna a neih theihna tura ram danpui lo duangchhuaktu ram hruaitu hmasate kha hrerengin kan rilruin zahna chibai buk turin mipuite a sawm a. Kan ram hruaitute leh ram mipuite thawhrimna zarah India ram chu khawvela sawrkar chak leh ropui zinga chhiar theihin a thang zel a, nikum kum tawp lama Mizoram State Legislative Assembly tluang tak leh harsatna awm lova kan kalpui theite khan kan Constitution ropuizia a tarlang chiang hle a ni a tiin a sawi.

Khuallian hian Mamit District chhunga sawrkarin hmasawnna tura a hnathawh leh a hmathlir tlangpuite a tar lang (attached file) nghal a ni.

He hunah hian Mizoram sawrkar tana Police hnathawh tha chawimawina Governor's Silver Medal chu mi pahnih- Inspector F. Manhleia, 4th IR Bn leh Constable R. Laldawngliana, 4th IR Bn Mamit hnenah hlan a ni a.

Republic Day 2024 march past ah hian Unarmed Contingents-ah lawmman pakhatna St. Francis of Assisi School (NCC) pahnihna New Diamond School (NCC) pathumna Govt. Mamit College (NCC) te an ni a. School Contingent-ah hian pakhatna Jawahar Navodaya Vidyalaya School niin, pahnihna Presbyterian English School an ni a. Pathumna hi Govt. Middile School-III te an ni.

Republic Day puala hun hman a nih hnuah  Buannel Home, Joshua Home leh District Jail & District Hospital tlawhin Republic Day pual denchhena thilpek hlanna neih a ni bawk a ni.