Vawiin khan DC’s Conference Hall-Mamitah Pu V. Lalremthanga IAS District Bawrhsap Mamit kaihhruaina in kumin 2013 India zalenna ni champha lawmdan tur relin mi pawimawhte an thukhawm.
He meeting-ah hian kumin India zalenna August ni 15 chu hun dang zawng aia ropui a hman ni se, Mamit GSA khelmual ah zing dar 10Am-ah function hi tan ni se, khuallian tur chu sawrkar lam atanga an ruat apiang lawm taka pawm ni se tih te rel a ni a. Zing ni chhuah rualin mimal leh sawrkar building-ah te hnam puanzar uluk taka zar ni se, hei bakah hian Mamit khawpui chhunga kohhran hrang hrangah ram hruaitute tana tawngtai turin ngen ni se tih te rel niin Independence Day Football leh Volleyball Tournament buatsaih ni se tih te rel a ni bawk.
India zalenna ni hlawhtling taka lawm anih theih nan mawhphurhtu hrang hrangte ruahman fel nghal a ni bawk.
He Meeting-ah hian Mamit khawpui chhunga Heads of Offices, khawtlang hruaitute, Tlawmngai Pawl hrang hrang hruaitute, Zirtirtute leh thuthar thehdarhtute an tel tha hle a ni.
