India Zalenna Ni vawi 67-na chu vawiin dt 15th August 2013 hian Mamit GSA khelmualah ropui takin lawm a ni a. Pu R. Romawia Speaker, Mizoram chuan zing dar 10:00am ah India Hnam puanzar pawtpharhin Parade Contingents 13 te chibai buk a chhanglet a ni.

Thu sawiin Pu R. Romawia Speaker, Mizoram chuan India Hnampa, Mahatma Gandhi, Pandit JawaharLal Nehru te leh hruaitu ropui tak tak te, kan ramin zalenna a hmuh theihna tura mittui leh thisen hlantute kan chhuangin kan hrereng a, zahna chibai kan buk tak meuh a ni a ti.

Vawiin ni ropui leh chhinchhiah tlak takah hian India ramin hmasawnna tam tak a hmuh mek laia Mizoram sawrkar pawhin hmasawnna tam tak aneih thu tarlangin Mizoram sawrkar hmasawnna kipui ber, Flagship Programme, NLUP a ruahman a, hei hian sum leh pai dinhmun leh nunphung hrim hrimah hmasawnna a thlen mek a a ni a ti a. Line Department hrang hrang, Agriculture Department hnuaiah Hmunphiah 1140 qtls hralhchhuah anih thu te, Horticulture Department atangin NLUP bakah Central Scheme, RKVY leh HMNEH hmanga kut hnathawkte huan leh thlai enpuia tanpui an nih thute a sawi lang bawk.

Khuallian chuan DTO Office ah High Security Registration Plate Dt 2. July 2013 atanga fit tan a nih thu leh Revenue Rs 23,72,475 sawrkarah chhun anih thute tarlangin UD&PA Department EWSHousing Sheme hnuaiah mi rethei in sakna kalzelah in 150 sak turah in 120 sak zawha luah tawh niin in 30 sak mek a ni a ti bawk.

Power & Electricity Department hmasawnna sawiin RGGVY Scheme hnuaia tuam tur zingah khaw 72 chu Mamit Division hnuaia awm niin khaw 55 te tuam tawh a ni a. BPL chhungkaw 2407 hnenah Electric Connection pek a ni tawh a ni a ti bawk.

SSA Mission kaltlanga Mamit District a hmalakna tarlangin Primary School 56 leh Upper Primary School 55 din ni tawhin School hawn thar 26 sak mek a ni a ti a. Residential Hostel naupang 100 awmna leh Girls Hostel naupang 50 awmna Mamitah kalpui mek a nih thu a tarlang bawk a ni.

DRDA kaltlanga Central Scheme hrang hranga hmalaknate tarlangin MGNREGA hnuaiah chhungkaw 19338 te tan ni 18 inhlawhna siam anih tawh bakah IAY hnuaiah kumin chhungin in 335 sak tum a ni a ti bawk.

Khuallian chuan District dangte ruala Mamit District-in hmasawnna kan hmuhte hi District Bawrhsap leh Department hrang hranga thawkte bakah NGO leh Kohhran te hmalakna rah a ni tiin lawmthu a sawi a, hetih rual hian sawrkar hmachhawp leh hmalak mekte chak zawk leh tha zawk a kalpui anih theih nan mahni hmazawn theuhvah rinawm leh taima taka thawka intawiawm tlang zel turin mipuite a sawm bawk.

Khuallian Pu R. Romawia Speaker hian Mamit Damdawi in tlawhin damlo 20 te hnenah thilpek a hlan nghal bawk a ni.

Independence Day 2013 lawmna-ah hian Parade Contingents ah 1st-na St Francis of Asssi Middle School niin 2nd JNV School leh 3rd na Presbyterian English Medium School an ni a, Parade Commander hi SI Dean Singh Minhas a ni.

Chhun Dar 12:00 noon-ah sawm bikte pualin Tourist Lodge ah VIP’s at Home buatsaih a ni. Tlaiah Independence Day lawmna chi khat atana buatsaih, Football leh Volleyball final hmuhnawm tak khelh a ni bawk.