India ram hmun hrang hranga kan ramin zallenna a sual chhuah champha phak 66-na hman a nih rualin Aizawl-ah pawh tukin dar 9:00 khan A.R. Ground-ah ropui taka lawm niin, Chief Minister Pu Lal Thanhawla chu Khuallian a ni.

Pu Lal Thanhawla chuan kan ramin he hun lawmawm a hmuh theihna tura an theihna zawng zawng hlantu, India Hnampa Mahatma Gandhi te, Pandit Jawaharlal Nehru te leh hruaitu ropui tak takte chu thinlung takin kan chhuangin, kan hre reng a; zahna chibai kan buk tak meuh a ni tiin, “He ni chhinchhiahtlak leh pawimawh tak hi kan ram ropui takin ram dang lak atanga zalenna a hmuh ni, mahni ke a ding tura beiseina sang tak nena bul a tan ni a ni tih hre rengin, keini khua leh tuite hian, zalenna kan hmuh theihna tura mittui leh thisen hlantute rilru lo kaihruai thin tu, an duhthusamte tihlawhtling tura kan inhlan thar a tul tak meuh a ni” a ti.

Khuallian chuan kum kal ta chhunga Mizoram Sorkarin hmasawnna kawnga a thil tihhlawhtlinte a tarlang a. Hmasawnna kipui ber, flagship programme atana kan Sorkarin a ruahman - New Land Use Policy (NLUP) chuan ei leh bar zawnna kawngah te, sumpai dinhmun leh khawtlang nunphung hrim hrim ah hmasawnna tam tak a thlen mek zel a ni tiin, NLUP tanpuina dawng tur hian chhungkua 1,35,000 ruahman mek a nih thu a sawi.

Chief Minister chuan, power lamah hian mahni intodelh mai bakah hralh chhuak thei turin kan beisei a ni a ti. Power lama kan intodelh theih nan Sorkar chuan nasa taka hma la in, tunah Tuivai HEP, 210 MW pe chhuak thei tur chu Viability Gap Funding hmanga siam turin ruahman mek a ni. Inkalpawhna leh ei leh bara hma kan sawn leh zual nan Sairang pawh tur rel kawng siam tura tender chhuah a nih tawh bakah, Lawngtlai thleng a rel kawng siam a nih theih nan survey neih mek a ni a ti bawk.

Thalaite hmakhua ngai tak chungin Sorkar chuan hma a la mek zel tih sawiin, thalaite chu ram nghahfak an nih ang ngeia ram leh hnam tana mi tangkai ni tura tan la turin a fuih a. Chief Minister chuan ram leh hnamin hma a sawn a, a thanduan zel theih nan, mitin te tha leh zung chhuah theuh tur leh midangte tana malsawmna ni turin a chah bawk.

Independence Day lawmnaah hian Chief Minister chuan chawimawina medal hrang hrang a sem mai bakah, Independence Day puala inkhel puahchah a titha te bakah vawin parade a titha te hnenah lawman a sem a ni.

(INDEPENDENCE DAY VAWI 67-NA A CHIEF MINISTER PU LAL THANHAWLA THUSAWI PUMPUI CHU A HRANPAIN DIPR WEBSITE-AH SPEECH SECTION A DAH A NI E).