India ramin zalenna a hmuh champhaphak vawi 66-na chu India ram state hrang hrang leh Mizoram District hrang hrang te hman rualin, Champhai ah pawh Champhai South bialtu Minister Pu J,H.Rothuama hovin tukin zing dar 10:00 atang khan Chhangphut Field-ah tluang taka hman a ni.
Hnam Puanzar a pawhpharh hnuin khuallian chuan Independence Day puala March Past Contingent 23 Parade Commander Joseph Lalvenzela, ASI kaihhruai te chu an awmna hmunah tlawhkual nghalin Hnam puanzar chibai an buk chu Khuallian hian a lo chhanglet a ni. Independence Day thuchah sawiin Pu J.H.Rothuama chuan India rama zalenna leh hun lawmawm a lo awm theih nana sulsutu Pu Mahatma Gandhi leh Pu Jawahar Lal Nehru leh hruaitu ropui tak tak te thinlung taka chhuangin, hriatreng an nih thu a sawi a, zalenna hmuh theihna tura mittui leh thisen hlan tute duhthusam ti hlawhtling tura inhlan thar a tul tak meuh a ni a ti.
India ram chuan zalenna a neih hnuah kawng hrang hrang in hma a sawn chho hle a, tunah phei chuan khawvel ram thangduang leh hmasawn ber zingah a in vawrh chho mek a, chumi rual chuan Mizoram ah pawh Chief Minister Pu Lal Thanhawla kaihhruai sawrkar chuan boruak ralmuang leh muanawm tak hnuaiah theihtawp chhuah a hma la in kawng tinrengah hmasawnna leh changkanna nei tur a tan a lak mek naah hlawhtlinna tamtak hmuh tur a awm chu lawmawm a tih thu sawiin Khuallian chuan Mizoram sawrkar in kum kalta chhung a hmasawnna a tih hlawhtlin tawhte chu a sawi lang nghal bawk.
Hmasawnna kipui ber, Flagship Prog atana sawrkarin a ruahman New Land Use Policy (NLUP) chu Mizoram chhung hmun tinah a inzar pharh tawh tiin Pu Rothuama chuan kum nga chhunga NLUP dawng tura ruahman chhungkaw 1,20,000 chu kum 3 chhunga tuam hman a niin tunah hian chhungkaw 15,000 ten an hmuh leh theihna tur Supplementary Plan chu Planning Commission hnenah thehluh leh ani tiin kum 4-na thleng hian ACA chhungah Cheng vbc.1208.82 a pe chhuak tawh a ni a ti a. NLUP hian kuthnathawktute tan eizawnna kawng dang, hlawk zawk, rintlak leh ngelnghet zawk a siam sakin nasa takin a chawikang a CCS programme leh NLUP kaikawpin , chak leh zuala sawrkar ruahmanna, hmasawnna hnate tihpuitlin a nih theihna turin, ruhrel pawimawh hrang hrang-thlai kui tiahna, Ar awp keuna, ruahtui khawlna leh inkalpawhna kawng siamte leh a dang tamtak ah te hmasawnna a lang a, heng avangte hian 11th Plan chhunga India ram pum GDSP-a thanna za zelah 7.8 anih laiin Mizoram, state thanna chu za zela 11 lai ani a, he hlawhtlinna chhuanawm tak hi NLUP vang liau liau ani . Kum 2010-2011 chhunga per capita income chu cheng 50,956 lai a tling pha chu kan state in ei leh bar kawnga hma kan sawn zia tilang tu a ni, a ti.
Co-operation Department in kan ram economy siamtha tura hma a lakna nasa tak sawiin Pu Rothuama chuan Co-operative Development Council din a nih tawh thu leh Primary Agriculture Co-operative Society 132-te sum hloh belhkhawm cheng vbc 24.58 zet thaibo anih theihna tura Short Term Co-operative Credit Structure atan Sawrkar chuan Inda sawrkar leh NABARD nen Memorandum of Understanding (MOU) an ziah fel tawh thu sawiin Mizoram sawrkar tum ve tur cheng nuai 214.00 pawh dah fel a ni tawh a, Sawrkar Laipui tum tur cheng vbc 22.44 pawh hmuh thuai beisei a nih thu a sawi.
Land Revenue lam inrelbawlna chungchangah Khuallian chuan kum kal ta a lei chhiah atanga sum khawn khawm chu cheng vbc 4.30 a ni a, House Site Cadastral Survey leh ruahmanna dangte chak taka kalpui mek aniin Champhai District-ah pawh National Land Record Modernisation Programme hnuaiah Cadastral Survey chu tan thuai anih tur thu a sawi a.
Mizoram sawrkar chuan ruihhlo tawlhruk leh damdawi hmansual hluar zel tur a ngaimawhin a vei em em a, heng suahsualna do tura Excise & Narcotics department in thapui an thawh chhunzawm zel avanga zu leh a kaihhnawih, ruihhlo tawlhruk ching tam tak man an niin thubuai siamsak anni tiin ruihlo tawlhruk leh damdawi hmansual dona kawnga Kohhrante leh tlawmngai pawl hrang hrangten thinlung taka sawrkar hmalaknate an thlawp thin avangin lawmthu a sawi bawk a ni.
Khuallian Pu Rothuama chuan Soil & Water conservation department ten ram leilung luangral tur venhimnaah leh tuihna siam leh humhalhna kawnga an theihtawp a an hmalakna tarlangin NLUP 1st Phase leh 2nd Phase atangin Champhai District-ah Hmunphiah chingtu chhungkua 552 leh coffee chingtu chhungkua 46 hnenah tanpuina sem ani a, Rubber Plantation lamah hma lak mek ani a ti bawk.
Champhai District chhungah District Bawrhsap hmalak na in boruak tha leh ralmuang tak a awm na ah lawmthu sawiin Khualllian chuan department hrang hrang PWD, H & FW, PHE,P&E, Agri, Horti, Seri, AH& Vety, Fisheries etc te hmasawnna te a sawi a.School Education leh Higher & Technical Education hmalaknain naupang zawng zawngte huap zo tur zirna hmun buatsaih a nih thu leh Tlangsam-a Polytechnic Building pawh sawk zawh anih tawh thu leh hawn thuai tum anih thu sawiin Champhai District in kawng tinrenga hma a sawnna ah district dangte entawntlak anih theihna tura rilru siamthar leh zual turin kalkhawmte a fuih a ni. Minister hian Independence Day puala infiamna hrang hrang a champion te leh Champhai District chhung a hruaisen lawman dawngtu te chu :
1. C. Thanthuama (Postthumous) Zawlsei khua 'Sarvathan Raksha Padak' lawman Rs 60,000.00 bakah Medal leh Thuziak kengtel.
2. Liankamlova S/o Kapthanga Saichal khua, 'Sarvathan Raksha Padak' Rs 60,000.00 bakah Medal leh Thuziak a kengtel.
3. Lalramchhana S/o PC Pahlira Aiduzawl 'Uttam Jewan Raksha Padak' Rs 40,000.00 bakah Medal leh Thuziak a kengtel.
Champhai District Hospital leh District Jail bakah Champhai khawpui chhunga Chhanchhuahna Home hrang hrang tlawh a tanpuina a hlan hnuah Chhun dar 12:00-ah Jericho Garden, Keifangtlang-ah Independence Day At Home chu Khuallian ho hian neih chhun zawm nghal a ni.
