India Zalenna Ni vawi 65 na chu vawiin hian Mamit GSA khelmualah ropui taka lawm a ni a. Pu S. Hiato, Minister PHE etc. chuan India Hnam puanzar zing dar 10:00 ah pawt parhin Parade Contingent 16 te Hnam Puanzar chibai buka chhang let a ni.

Thusawiin Khuallian Pu S. Hiato chuan zanelna ni ah Mamit mipuite chibai bukin India ram zalenna suala nunna hlantu mi huaisen kaltate vawiin ni ah hian zahna chibai bukin kan chawimawi a ni, a ti. Hruaitu ropui Hnampa Mahatma Gandhi hruaina hnuaiah tharum tel lovin harsatna namen lo paltlangin zalenna an lo sual chhuak a, chumi azarah chuan India rama hnam ze tinrengte in lungrual leh in pumkhatna tha nen kan cheng ho a ni a ti bawk.

Zalenna hnuaiah India ram chuan kawng tinrengah hmasawn chho zelin khawvela ram thangduang ber leh thil ti thei berte zinga chhiar a lo ni ta hial a. India ram hmasawnna chuan hmarchhak biala state tenau zawkte pawh thleng phakin inkalpawhna kawngtha te, hriselna leh zirna lamahte nasa takin hma kan sawn a ni a ti bawk.

Mizoram chungchang sawiin Mizoram Peace Accord kan nih atanga kum 25 na kan hman mekah nasa takin hma a sawn thu sawiin hmasawnna hi remna leh muanna hnuaiah chuah a kal thei a ni tih hria a, kan ram muanna boruak vawng him zel turin mipuite a chah.

Ei leh bara kan intodelh nan leh mirethei ten eizawnna ngelnghet an neih theih nan sorkar hmachhawp NLUP chungchang sawiin hemi hnuaiah hian kum 5 chhungin chhungkaw nuai 1 leh sing 2 tuam chhuah hman tum anih thu te, Remote Sensing Technology hmanga leilung leh boruak zirchianga awmze nei taka hmalakna tur duan mek anih thu te sawiin zirna lamah SSA hmangin naupang 2,01,306 hnenah 2010 - 2011 chhungin zirlaibu a thlawn a sem anih thu te, Rualbanlo naupang 6769 hnenah a bika zirna pek anih thu te, naupang 25924 hnenah computer zirna pek anih thu te leh zirna kalphung thar CCE chu kumin atanga kalpui a nih thu te, National Institute of Technology (NIT) Mizoram ah kumin July 21 a hawn anih thu te leh Indian Institute of Mass Communication (IIMC) Mizoram kumin August thlaa hawn anih thu a tarlang bawk a ni.

Hmasawnna hrang hrang tarlangin hriselna atana NRHM hnuaia hmalakna te, ei leh bara kan intodelh theih nana hmalakna te, thingtlang khaw tinte tih en nana RGGVY hnuaiah hmalak anih thu te, thal ruahtui hul laia kan hman tur tui hnianghnar leh thianghlim kan neih theih na tura Baba Atomic Research Centre, Mumbai te nen thawk hovin kawng zawn mek anih thu te, World Bank sum hmanga Mizoram Road Project hna cheng vaibelchhe 541.36 man thawh zawh mek Kaladan Multi Model Transit Transport Project hnuaia Lawngtlai leh Myanmar inkar kawngpui 100KM laih thu te leh PMGSY hnuaiah cheng nuai 10,000 sengin kumin kum tawp hma hian thingtlang khaw 54 inkal pawhna 22KM siam anih tur thu te a sawi bawk.

Khualzinte himna tura sorkar hmalakna tarlangin Tourism lama hmasawnna hi department kutah chauh a in nghat lova, ram mipuite kan pawimawh theuh thu sawiin, khualbuk leh hahchawlhna hmun a neihte mimal kuta hlan turin ruahman mek a ni a ti bawk.

Sorkar chuan kan ram dinhmun siam tha turin theih tawp chhuah zel a tum thu sawiin sorkar hmalakna kawng hrang hrangah thahnem ngai taka tawiawm turin zalenna ni hmangtu zawng zawngte a sawm bawk a ni.

Zalenna Ni lawmna ah hian Armed Contingent 1 leh Un-armed Contingents 15 awmin JNV School chu pakhatna a ni a. 2 na Govt. M/S III niin 3 na chu Govt. M/S II an ni a. Lawmman te hi khuallian in a sem a ni.

Zalenna Ni hian khuallian chuan Mamit Damdawiin tlawhin dam lo 16 te hnenah thil pek a hlan a ni.

Chhun dar 12 ah VIPs at Home, Tourist Lodge ah sawm bikte tan buatsaih a ni bawk.