Vawiin chawhma dar 10:00 khan  Thuamluaia Mual ah Independence Day vawi 64-na chu  India ram hmun dang te ang bawkin Lunglei khawpui ah pawh hman a ni  ve a. He ni pawimawh  a Chief Guest Pu R. Romawia Mizoram Legislative Assembly Speaker  chuan Hnam Puanzar pawt pharh in zirlai, NCC cadets te leh armed contingents endik in an chibai buk a chhang let a ni.

Speaker chuan India ram chu Independence Day vawi 64 a thlen meuh chuan zalenna sualtu te Mahatma Gandhi, Jawahar Lal Nehru leh hruaitu hmasa te in pekna zar zovin ram ropui tak a ni tawh a ni a ti. Tunah phei chuan sum leh pai ah India ram chu khawvel a ram thang duang berte zinga mi a nih thu leh ramdang ten nena inkungkaihna thu hla ah ram dang zah kai leh ngaih chan a ni tawh a ni a ti. Industry tih hmasawn, Information technology, zirna tih hmasawnna, thiamna tih pun, mirethei te tana chenna in sak sak, mipui te tana hrilselna leh chawtha chhawpchhuah te hi India Sawrkar ngaih pawimawh be rte zinga mi a nih thu a sawi a.
   
Mizoram pawh in June 30,1986  a remna thuthlung a lo neih atangin remna leh muanna hnuai ah kum 25 lai hmel a lo hmu ta a. Muanna avang hian hmasawnna tam tak kan neih tawh a – achhan chu hmasawnna leh ralmuanna hi a inthlunzawm tlat vang a ni a ti. Kan state in ei leh bar intodelh na tura Sawrkar hmalakna lian ber chu NLUP a nih thu  a sawi a. Hun rei lo te chhunga hmasawnna tam tak kan neih theih nan sawrkar in chak tak in a kalpui mek zel a. A hlawhtlinna chu a hlawkna tel tu tur NLUP dawngtu mawhphurhna leh inpekna ah thui tak a awm thu a tar lang a. NLUP thawh khat na atangin Sawrkar in ngaihtuahna a sen nasat thu leh Loneitu te chu sum chauh ni lovin thiamna a tan pui zel a tum a ni a ti. Sawrkar hmalakna pawimawh tak tak tarlang in Aizawl Municipal Council hial din a lo nita chu hmasawnna mel lung langsar tak a ni a. He Municipal council hian khawpui inrel bawl dan awmze nei zawka a kal pui theih nan Sawrkar in a thuam chak mek zel thu a sawi. Aizawl Municipal Council ah hian India danpui zulzui a hmeichhia te chawikan nan seat 33% hauh sak a ni a, chu chu achhuan awm hle a ni a ti.
   
District hrang hrang te chu hmasawnna kawnga chak zawk a ke an rawn pen nan sawrkar in a tul ang in a thuam chak zel thu leh district tin te hmasawnna chu Sawrkar ngaih pawimawh ber pakhat anih thu a sawi a. Lunglei district chhunga department hrang hrang atanga Sawrkar hnathawh pui tlin tawh te leh hmalak mek te chung chang te pawh speaker hian a tar lang a. A state pum huap a hmasawnna kan hmuh te hi sawrkar hmalakna te kohhran leh tlawmngai pawl hrang hrang te leh khua leh tui te tawiawm na zara lo awm a nih thu sawiin Sawrkar hmachhawp hrang hrang te tihhlawn a nih zel theih nan Sawrkar a kan chanpual leh mawhphurhnate kan hriat thar leh angai a ni a ti
   
Vawiin Independence Day Parade ah hian contingent 20 an tel a. Armed contingent 3, unarmed 5, school naupang contingent 10 bakah 40th AR Battalion pipe band leh 2nd Battalion MAP  pipe band te an ni. Armed Contingent ah  Mizoram Home Guards, Lunglei pakhatna niin, unarmed ah Scout & Guides, Sacred Heart school leh School naupang ah Baptist HSS, Serkawn ten pakhatna an hauh hlawm a. Southern Flower School leh Govt Leitlang HSS te chuan School atang in pahnihna leh pathumna an hauh ve bawk a ni. Vawiin parade hi T.Tuanpu, adjutant, 2nd battalion MAP in a command a ni. Chief Guest hian lawman a sem nghal a – Independence Day Snooker Tournament ah Men’s single a champion Lalrintluanga Khiate bakah Double a champion Lalnunsanga Pachuau leh Lalrintluanga khiante  te hnenah lawman hlan a ni a. Parade zawh ah  hian Independence day Football Tournament Final Electric veng leh ZMS football team ten an khel nghal a ni.Lammual programme a zawh hian Lunglei DC Pu V.Sapchhunga,IAS kaihhruaina in DC Indoor Stadium ah sawm bik te tan DC’s At HOME buatsaih a ni a, he hun hi Speaker leh a mah rawn tawiawm tute pawn an hman pui a ni. Vawiin tlai dar 4 hian Dc’s Coference Hall ah Lunglei district Head of department te Speaker hian a ko khawm nghal a ni.