Naupangte an  naupan lai atanga an tuizawng infiamna an zir theihna tur atana sawrkar programme pawimawh tak “Catch Them Young” Programme chu Pu Zodintluanga, Sports & Youth Services Minister chuan Sports Discipline chi hrang hrang parukah Serchhip District tan vawiin chhun khan a hawng.

Minister chuan a thusawiah Serchhip District chu Mizoram pum huap mai bakah Mizoram pawnah pawh infiamna lama thawhhlawk tak an ni a ti a, Coach tha tak tak ten naupangte an naupan laia inkhelh dan dik an zirtir anih chuan Zofate hi khawvelin min hmelhriat thuai dawn ani tih Sawrkarin a hriat avanga he Programme hi kalpui anih thu sawiin, Catch Them Young Policy kalpui anih hnu tun hnai kum hnih vel kalta chhung maiah pawh Mizo nula leh tlangval thahnem tak India ram pawnah an fehchhuak a, hei hian Sawrkar pawh a ti phur hle tih a sawi bawk.

Minister chuan Catch Them Young policy hi tih tak takna nena kalpui tul atih thu sawiin a tan tira phur hluai a ti tha chhunzawm peih leh si lo tur te chu sawrkarin a phurpui loh thu leh sawrkar duhdan anih loh thu sawiin, District Sports Association hrang hrang hotute nen tanrual a ngaihzia leh theihtawp chhuah a tul zia a sawi uar hle a ni.

Serchhip District ah hian a bul tan nan Sports Discipline hrang hrang paruk – Football, Volleyball, Chess, Taekwondo, Table Tennis leh Boxing te thlan a ni a, Football ah hian naupang 200, Volleyball-ah 37, Chess ah 50, Taekwondo ah 80, Table Tennis ah 180 leh Boxing ah 30 an vaiin naupang 577 an inziaklut tawh a ni.

Minister hian Catch Them Young Policy bultan na atan hian Football 30, Volleyball 8 leh volleyball net 4, Punching bag 2, Table Tennis Ball 150, Chess set 10, Boxing glove pair 10 avaiin Rs. 43,710/- man hu a pe a, hun remchangah changtlung zawka thuam belh nghal an nih tur thu a sawi bawk a ni.