Vawiin chawhma dar 11 khan Chhangphut Field Champhai-ah India Independence Day vawi 64-na chu India ram leh Mizoram hmun dangte ang bawkin lawmna hun hman a ni a. Home Minister Pu R. Lalzirliana chu khuallian niin he ni pawimawh tak hi a hmanpui a ni.

Home Minister chuan India Hnam Puanzar pawtpharhin March Past contingent 26, SI V. Lalbiaksanga’n a kaihhruai chu a tlawhkual leh hnuin mipuite hnenah Independence Day thuchah sawiin Independence Day chibai a buk nghal a ni.

India ram in zalenna a neih theihna tura theihtawp chhuah a, mahni nun hial pawh hlantu kan hnam pasaltha te kha theihnghilh lovin zahna chibai bukin an inpeknate kan hre reng tur a ni. Pu Lalzirliana chuan a ti a. India ram Danpuiin dikna leh zalenna ang khat kan neih theihna turin min phuarkhawm vek a, hnam thu ah te, tawng thu ah te, sakhaw thu ah te inthliar thin mahila, India mi kan nihna hian min phuar khawm a ni tih hre thar leh tur leh kan nihna chhuang turin mipuite a sawm a ni.

Zalenna India ramin kan neih hnu a hmasawnna hrang hrang kan neihte sawiin Home Minister chuan Agriculture, Industry leh Information Technology leh kawng tam taka India ramin  hmabak eng tak kan neih chhoh dan te, sorkar inrelbawlna tha leh chak, dik leh felfai tak neihna tur kawnga hmalak dante sawi zelin Mizoram bikah phei chuan buaina lian tham chhuak lova a awm theih nan a sorkar khawtlang, kohhran, NGO leh pawl hrang hrangte tanrualna ah lawmthu sawiin Pu Zira chuan mipui ten hima kan inhriat tlat chuan kan nun pumpui a nuam thin a ni a ti.

Sorkar hmalakna atanga Mizoram hmasawn dan hrang hrang sawi zelin Minister chuan kan ram ei leh bar dinhmun chawikanna tura Project pawimawh leh lian tak NLUP chu chak tak a kalpui mek a nih dan leh mi tam takin an chhawr tangkai tawh dan te, Agriculture atanga loneitute hamthatna tur thil tam tak ngaihtuah chhoh zel a nih dan te, sumchangthlai atanga tam zawk thar chhuah dan te leh tui thianghlim kan in theih nan khawl tha Baba Atomic Research Centre, Mumbai te nena thawk hova tuihna kang chat tur ven dan te leh in tinin tui thianghlim an hmuh theihna turin an zir reng a ni tiin chhungkaw tinin buhfai khamkhawp an neih a, mipuite riltam a an awm lohna tura kawng zawn hna chu mut mawh har mawhah an neih reng thu a sawi bawk.

Kawlphetha megawatt 210 pe chhuak thei tur Tuivai Hydel Project bul tan tur leh Rajiv  Gandhi Grameen Vidyulikaran Yojano (RGGVY) hnuaia eng la luh lohna khawl 137 ti eng tur te, BPL chhungkaw 27,417 te hnena a thlawna eng pek a nih nan a chak taka hma lak dan sawiin Minister chuan ni 100 inhlawhna hmuh theih nan MGNREGS kalpui dan te, IAY hnuaia chhungkaw 4246 te in thar sak nan leh thawmthat nan cheng nuai 1492 chuang hman anih thu te, nikum chhung ngawt pawh a chhungkaw 3000 chuang in he malsawmna hi an dawn tawh thu leh BADP leh BRGF hmanga hmalak mek anih laiin Autonomous District Council lam te pawh duat taka enkawl leh hmasawnna kawng hrang hranga an thuam thu a sawi.

Pu Lalzirliana chuan Sports lamah pawh nasa taka tan lak anih dan sawiin ‘Catch them Young’ policy kalpui mum mup anih laia, Rajiv Gandhi Stadium ruangam te pawh hmuh theih a din a ni ta te hian kan thalaite kan dah pawimawh zia a tilang chiang hle a ni tiin zirna lamah te pawh hmasawn zelin thla tir lam khan India Institute Mass Communication (IIMC) chu tan a lo ni tawh in July thla khan National Institute of Technology (NIT) pawh tan a ni tawh in kan tu leh fate India ram hmun hla zawk kal ngai lova kan tualzawla zirna bik zir theia chhawp chu a hlawhtling chho mek a ni a ti. Hmasawnna kawng hrang hrang sawi zelin Minister chu kawngpui tha siam chhoh mek a niin Instrumental Landing System (ILS) pawh tun thla ni 2 atang khan kan lo hmang tan ve ta a ti a. Hmasawnna tam tak sawi vek sen loh ni mahse, Champhai District chhunga hmasawnna tam tak te chu rilru thianghlim taka en hmaih chi a nih loh thu a sawi a. Hmasawnna tur tamtak la awm bawhzui zel thei tur a ke pen pui tura sawiin Pu Zira chuan Zoram nuam leh India ram chawimawi zel turin mipuite a ngen a ni.

Ei leh bara hmasawnna hi hmanrua leh bungrua awlsam taka hmuh mai theih a nihna nen hian a inzawm tlat a ni tiin Khuallian chuan chumi hriaa nasa zawka khaw kar kawng siam thar hna kalpui a nihna chuan rah tha a chhuah zel a. Tunah chuan Cheng Vaibelchhia 541 chuanga World Bank puihnaa Mizoram State Road Project pawh zawh fel a lo ni ta a. Lawngtlai atanga Myanmar ram inkalpawhna tur Double lane highway km 100 zeta thui pawh thawh tan a ni tawh a, hei hi Mizoram tan mai ni lo, India ram hmarchak state dangte tan pawh thil hlu tak a ni dawn a ni. PMGSY hnuaiah kumin leh nakum chhung hian km 520-a thui kawng laih a ni leh dawn a, kawngpui tha tak hmangin khaw 80 chu inkalpawh theiin kan siam leh dawn a ni, a ti a.

Kan thlai tharte hralhna tur lam hi kan phak tawk angin kan ngaipawimawh hle a, Zokhawthara Land Custom Station pawh chutiang atan chuan cheibawl thar mek a ni a, Rih leh Kalemyo inkalpawhna kawngpui pawh hi sumdawnna tha zawk leh hlawk zawk a a awm theihna turin a siamthat hna kalpui turn tan mek a ni a ti bawk.

Vawiin Independence Day lawmna ah hian Khuallian chuan Champhai District khaw hrang hranga a mi mihuaisente te hnenah chawimawina thuziak a hian a, chung mite chu- 1) Burmathangi, Champhai Kahrawt; 2) Lalramchuana Chinzah, Kelkang; 3) Zohlupuia, Champhai Zotlang; 4.) Lalrinthari (L), Vangchhia; 5) Sanglungmuana, Mimbung khua te an ni.

Independence Day pual hian infiamna Chi hrang hrang ah inel a ni a. Hengte hi discipline hrang hranga champion te an ni- Basket Ball ah The Ballerz, Chess Grade A ah Lallianmanga, Grade B ah HC Lalthangzauva, Volley Ball ah Vengthlang Sporting Club, Table Tennis ah HT Lalrokunga, Badminton(Singles) Grade lA’ ah Lalrindika, Veteran doubles ah Vijay Kumar Bidhuri &. RL.Thianghlima te an ni.


Independence Day Programme zawh hian DC Bungalow, Keifangtlanga Jericho Garden-ah sawm bikte pualin At Home neih a ni a. Chawhnu lama Hnahlan leh a chhehvel khua a BNRGSK Building leh Village Haat te hawng turin Pu Zira chuan Hnahlan lam a pan. Home Minister hi Pi Lianhmingi Pachuau, Director RD Department, Pi Ramdinliani, Jt. Director RD Department ten an tawiawm a. Minister hian Hnahlan ah zan riakin naktuk zing dar 10 ah Hnahlan atangin Aizawl a pan ang.