No.277/2021-2022

Lunglei the 26^th April, 2021 – Kar hmasa inrinni (24/04/2021) zing atanga Lungleia kangmei chhuak chu veng hrang hrang ramah kangkaiin inrinni, nimin nileng leh nizan zan khua khan veng hrang hranga mi tlawmngai leh inpe ten theihtawp chhuahin tun thlengin a thelh hna anla thawk mek zel a ni. Nimin chhun leh tlai khan Zotlang leh Chanmari area nasa taka a kan hnu in nizan zanlai dar 11 pelh vel khan Lunglawn AIR Station hnuai Lungtauh kham chho a kang leh a. Fire & Emergency Services leh mi tlawmngai tam tak pungkhawmin Lunglawn kangmei hi zing dar 3 velah an thelh thei a. Vawiin khan Zotlang ram ala kang mek a, hei hi Indian Air Force (IAF) Bambi Operation-in vawiin tlai khan vawi hnih phuh a ni. 

Mizoram sawrkarin Indian Air Force (IAF) hnenah tanpui a zuk ngen tawh angin, IAF chuan Mi-17V5 helicopter pahnih nimin khan an deploy a. Scout Helicopter (lo enfiah hmasa tur) IAF chopper pakhat chu tukin zing dar 5:50 ah khan Kawmzawl helipad ah a tum a. Tui lakna tur GPS Co-Ordinates thehluh tawh atangin Tlabung Khawthlangtuipui chu hla an tih avangin an kal lova, Darzokai Tuipui D enfiah tura han kalin heta tanga tui lak hi an ti tlu ta a. IAF Helicopter hi vawiin chawhnu dar 12:05 ah Kawmzawlah lo tum lehin Lunglei DC Pu Kulothungan A hovin kangmei thelhna tur hmun te enfiah lawkna (recce) an neih hnuin vawiin tlai khan Bambi Operation an nei tan a ni. IAF Helicopter Mi-17V5 hian Litre 3500 dawng Bambi Bucket hmangin 3:55 pm – 4:22 pm inkar khan Zotlang ram kang mek thelh tumin tum hnih tui a phuh a. Vawiin atan chuan operation hi tih tawp rih a ni a. Lungleia kangmei hi 90% aia tam thelh mit tawh nia chhut niin Bambi operation hi naktukah ala tul anih chuan chhunzawm leh a ni ang. Indian Air Force team te hi air crew, ground crew, engineer leh pilot te nen an zavaiin mi pariat (8) Lungleiah la chamin zanin an riak dawn a ni. 

Additional Principal Chief Conservator of Forests Pu Keyiekhrie Kire-in a report danin Forest Survey of India (FSI) Satellite atanga a lan dan chuan Lungleia kangmei chhuak avangin nimin tlai thleng khan ram 427.88 hectare a zau kang tawhin kangmei a intan ni 24^th April 2021 (Inrinni) khan 158.68 hectare a kang a, nimin 25^th April 2021 (Chawlhni) khan 269.2 hectare a kang leh a ni.