No.276/2021-2022

Lunglei the 26th April, 2021: Inrinni zing atanga Lungleia kangmei chhuak chu veng hrang hrang ramah kangkaiin inrinni, nimin nileng leh nizan zan khua khan veng hrang hranga mi tlawmngai leh inpe ten theihtawp chhuahin tun thlengin a thelh hna anla thawk mek zel a ni. Kangmei thelh tura lo kal Indian Air Force (IAF) atanga helicopter deploy pawh tukin zing 5:50 atang khan Lungleiah hmalakna a rawn nei tan a. IAF Helicopter Mi-17V5 hian Litre 3500 dawng Bambi Bucket hmangin 3:55 pm – 4:22 pm inkar khan Zotlang ram kang mek thelh tumin tum hnih tui a phuh a. Vawiin atan chuan operation hi tih tawp rih a ni a. Lungleia kangmei hi 90% aia tam thelh mit tawh nia chhut niin Bambi operation hi naktukah alal tul anih chuan chhunzawm leh a ni ang. 

Lunglei kangmei chungchang a hmuna rawn enfiaha Lunglei mipuite thlamuan tura sawrkar aiawha lo kal EF&CC etc changtu Minister Pu TJ Lalnuntluanga, Dr. Vanlaltanpuia, MLA & Chairman MYC leh Pu Lalrinsanga Ralte, MLA & Vice Chairman Rubber & Allied Crops Development Board te chuan nizan khan Lunglei lo thlengin tukin zing ah Lunglawn, Chanmari, Serkawn leh Zotlang ah te kalin kangmei dinhmun an enfiah a, ruahmanna siam tul te sawrkar official-te leh khawtlang hruaitute an siam pui. Lunglei HPC Vice Chairman Pu Lawmawma Tochhawng, Lunglei South bialtu MLA Dr K Pachhunga te pawh an tel a ni.

EF&CC Minister Pu TJ Lalnuntluanga ho hian Lunglei DC Conference Hall-ah vawiin chawhnu khan sawrkar official-te, Executive Magistrate-te, BSF, Assam Rifles, YMA, VC-te leh media mite nen he kangmei chungchang sawihona leh inrawnkhawmna neih a ni a. EF&CC Minister chuan ram kang avanga Lunglei mipuite thlabar taka an awm chu Sawrkarin pawi a tih takzet thu sawiin Chief Minister Pu Zoramthanga ruahmanna siam anga lo kal an nih thu a sawi a. Kangmei chhuak avanga mipuite thlabar taka an awm laia, a thelh hna chu sawrkar tih tura dah mai lova mi tlawmngai leh thahnemngai tak tak rawn pen chhuak te chungah Mizoram sawrkar aiawhin lawmthu a sawi a. Kangmei chhuak hi thelh mit thuai anih theihnan sawrkar hotute chuan theihtawp chhuahin Fire Tender leh thawktute Aizawl atanga rawn thawn belh an nih bakah IAF hnenah zuk thlenin, Prime Minister pawhin vawiinah phone kaltlangin Chief Minister a lo bia a, a tul anga puih a inhuam thu a rawn sawi a ni, a ti.

A sawi zelnaah EF&CC Minister chuan ram hi amahin a kang ngawt lo tlangpui a, a ti kangtu an awm thin a. Ram ti kang lo tur hian theihtawpin Environment, Forest & Climate Change Department kaltlanga inzirtir thin niin Awareness campaign te pawh neih fo thin a ni a, hei hi hun lo kal zel turah uar leh zau zawka kalpui tum a ni, a ti a. Kan thing leh mau te tul lo taka kan suat hian kan ram a ti rovin, tui hna tam tak a chhu chata, tuna kan buaina leh harsatna lian ber chu khaw thal leh tui harsatna a lo ni ta a ni tiin thing leh mau leh nungchate humhalh kawngah tan kan lak sauh a tul takzet a ni, a ti a. Lunglei mipuite tawrhna leh Mizoram hmun hrang hranga kangmei avanga harsatna kan tawhte hi sawrkarin a hria a, mipuite harsatna sukiang turin theihtawp kan chhuah chhunzawm zeldawn a ni, a ti bawk.

Lunglei HPC Viceh Chairman Pu Lawmawma Tochhawng pawhin thu sawiin Lunglei mipuite thlamuan tur leh mawhphurtute ruahmanna siampui tura lo kal EF&CC Minister Pu TJ Lalnuntluanga, Dr. Vanlaltanpuia, MLA & Chairman MYC leh Pu Lalrinsanga Ralte, MLA & Vice Chairman Rubber & Allied Crops Development Board te chungah lawmthu a sawi a. Lunglei District –in Fire & Emergency Services tih len kan mamawh hle bakah he kangmei chhuak avang hian tui lamah harsatna nasa tak kan la hmachawn dawn chauh a ni tiin, sawrkar atanga ruahmanna siampui turin a ngen a ni. 

Vawiin tlaia IAF Helicopter Mi-17V5 –in Lunglei Zotlanga Bambi Operation a neih an enpui fel hnuah Minister leh amah zuitute hi Aizawl panin an let leh nghal a ni.

Attachment

  • Loading attachment...