No.275/2021-2022

Aizawl, 26th April, 2021 : Vawiin khan DHME Conference Hall, MINECO-ah Mizorama COVID-19 inkhuahkhirhna kalpui mek thlirho a ni a, he hun hi Health & Family Welfare Minister Dr. R. Lalthangliana'n kaihruaiin, MOT Chairman Dr. ZR Thiamsanga, MLA, Chief Secretary Pu Lalnunmawia Chuaungo bakah COVID-19 dona kawnga hma latu department hrang hrang hotute,  Indian Medical Association (IMA), Non-Government Hospital Association of Mizoram (NGHAM), Jt. NGO Coordination Committee  leh Mizoram Kohhran Hruaitute Committee (MKHC) aiawhte an tel.

Vawiin thlirhonaah hian India rama COVID-19 second wave lo hluar leh mek laka Zoram mipuite kan him theihna tur atana inkhuahkhirhna kalpui mek thlir ho a ni a, IDSP hotute hnen atangin tunhnaia Mizorama COVID-19 positive case pun dan report ngaihthlak niin March ni 29, 2021 atanga April ni 25, 2021 inkarah positive 948 hmuhchhuah niin Lengpui Airport-a lo thleng zingah positive 273 hmuhchhuah a ni a, an zinga 193 hi Lengpui Airport an rawn thlen hlima Lengpui Airport Screening Point-a RAgT hmanga hmuhchhuah niin, midang 80 hi Lengpui Airport Screening Point-a RAgT negative, a hnua positive tih hmuhchhuah leh an ni. Vairengte kaltlanga rawn lut zingah positive 84 hmuhchhuah niin an zinga 42 hi screening point-a positive tih hmuhchhuah an ni a, 42 dang hi screening point-a negative, a hnu a positive leh an ni. Kanhmun screening point-ah positive 6 hmuhchhuah an ni a, Zokhawthar kaltlanga rawn lut screening point-a negative, a hnua positive leh si 5 an awm bawk. Positive hmuhchhuah thar zawng zawng zinga 580 (61.20%) hi tualchhunga hmuhchhuah an ni. Kumin January thla khan positive 156 hmuhchhuah an ni a, February ah 51, March ah 53, April thlaah ni 25 thleng positive 934 hmuhchhuah an ni.

Police Contact Tracing team hotute report daninn April thla chhunga positive 934 hmuhchhuah zingah hri an kaina chhui chhuah harsa 190 an awm a, April thla chhunga positive hmuhchhuah tawh zinga 509 (54.5%) hi tualchhunga inkaichhawng an ni a, 425 (45.5%) hi state pawn atanga lo lut (travel history nei) an ni. Aizawl khawpuia local council 84 zinga 70-in active case an nei a, tunhnaiah chhungkaw khata chengho zingah hri inkaichhawng an pung nasa a, chhungkaw member zawng zawng positive te pawh an awm tawh a ni. Tun thla chhunga Mizoram chhunga COVID-19 hri hluar zualna (hotspot) te chu - Bethlehem/Bethlehem Vengthlangah positive 71, Borkolok, Lawngtlai districtah 33, Dam Vengah 31, Kanan Vengah 30 an ni. Aizawl Municipal Area-ah police te ngawrh takin chhunzan zawmin an duty a, COVID-19 Executive duty te puibawm turin police 90 ruat an ni bawk.

Vaccine chungchang report ngaihthlak niin inrinni kalta (24.4.2021) thlengin vaccine dose 2,99,870 Mizoramin a dawng tawh a, vaccine dose 2,07,730 pekchhuah tawh niin, mi 41,313 in vaccine second dose an la tawh a ni. Sawrkar laipui record danin Mizorama kum 45 chin chunglam zinga 43.72% hnenah COVID-19 vaccine hi pek tawh a ni bawk. Tun kar chhung hian dose 1,00,000 dawn leh beisei a ni a, hengte hi kum 45 chung lamte hnena pek tur a ni.

May ni 1, 2021 atangin sawrkar laipui chuan kum 18 – 44 inkar tan vaccine pekchhuah tur a ti a. Hemi chungchangah hian sawrkar laipuiin ruahmanna a siam danah COVID-19 vaccine siamtu (manufacturer) ten an siamchhuah zinga 50% chu sawrkar laipuiah an pe ang a, hei hi State hrang hranga Healthcare workers, Frontline workers leh kum bituk bik thenkhatte tan a thlawna sem tur a ni ang a. Kum 18-44 inkarte vaccine dawn tur hi sawrkar laipuiin State sawrkarah a pe tawh dawn lova, State sawrkarin vaccine siamtute hnen atangin an mamawh ang zat an lei a ngai tawh dawn a ni. Mizoramin vaccine kan dawn thin COVISHIELD man thar tur hi hi official-a hriattir an la ni  lova, private hospital ten COVISHIELD an pekchhuahna man Rs. 250/- a lo ruahman tawh pawh sawrkar laipui hian a hnukkir leh a ni. Health department hotute chuan COVISHIELD  siamchhuaktu  Serum Institute of India lamin sawrkar laipuiin COVISHIELD an order sa pawh an la supply sen rih loh thu an sawi tih tarlangin, state sawrkarte hnena pekchhuah tur hi chu nghah rih a la ngai dawn tih an sawi thu an tarlang a ni. Mizoramah kum 18-44 inkar vaccine pek ngai hi mi 5,86,702 vel niin chhut a ni a, heng mite tan hian vaccine manah Rs. Vaibelchhe 47 vel sen a ngaih rin a ni.

Vawiin meetingah hian COVID-19 positive te enkawlna tur Covid Care Centre (CCC) ruahman belh chungchang leh Dedicated COVID Hospital chungchangte sawiho a ni a, CCC leh Quarantine Centre hi tun dinhmunah chuan ruahman belh a la tul rih lo nia hriat niin, a tul dan azira hman turin hmun dang pawh thlithlai lawk a ni a. Paid CCC leh paid Quarantine Centre ruahman belh a tul thu sawi a ni bawk.

COVID-19 positive te hman tur oxygen chu tun dinhmunah vanneihthlak takin dam lo serious kan la neih tlem avangin a thlaphanawm rih loh thu sawi a ni a, amaherawhchu hmalam hun hriat lawk a nih loh avangin lo inhmakhawsuih dan tur a theih ang anga ngaihtuah a ni a. Pu F. Kapsanga, Tuikual te chhungin May thla chhung ZMC-SRHF oxygen mamawhte a thlawna an refill sak tur thu meetingah hian tarlan a ni.

CCC-a positive enkawl mek ten harsatna hrang hrang an tawh theih avangin anmahni lo thlamuana a tul anga lo buaipuitu tur psychologist/councillors in-volunteer tura ruahmanna siam mek a nih thu tarlan a ni a, quarantine facility chungchangah Aizawl khawpui mi leh Aizawl pawnlam mite khunghran dan tur pawh ruahmanna siam a tul thu sawi a ni.

Vairengte screening point-a thawktu dah belh bakah duty te thuamchak a pawimawh thu pawh sawi niin, executive duty atana sawrkar hnathawkte tangkai taka hman an nih thu sawi a ni a, boruak thlirin executive duty tur lak belh a tul dawna a lan thu sawi a ni bawk. Dawr hawn chungchangah ruahmanna awmsa belh hleka ruahmanna thar siam a tul tih sawi a ni a, Zoram pumah rualkhai zawka inkhuahkhirhna kalpui a that thu tarlan a ni.

COVID-19 kaihhnawih thilah social media hrang hrangah thu belhchian dawl lo, mipui rilru ti chi-ai thei thehdarh a tam chu pawi an tih thu meeting-ah hian sawi a ni a, thuthang belhchian dawl lo thehdarh lo turin mipuite an ngen nawn leh a, sawrkar thuchhuak ngaichang hram hram thin turin an ngen bawk a ni.

Heng bakah hian COVID-19 dona kawnga mamawh chi hrang hrang la awm theite sawiho niin, ruahmanna chi hrang hrang an sawiho a ni.