No.274/2021-2022

Aizawl, the 26th April 2021: Vawiin chawhnu khan Governor PS Sreedharan Pillai chuan Central YMA hruaitute Raj Bhavan-ah a kawm a. He hunah hian Covid-19 hrileng dona kawnga YMA leh tlawmngai pawl dang te hmalakna bakah thil pawimawh dang te sawiho a ni.

Governor P.S. Sreedharan Pillai chuan Covid-19 hrileng dona kawngah YMA in theihtawpin sawrkar a thlawp tih a hriat thu leh lawmawm a tih thu a sawi a. He hrileng dona kawngah hian sawrkar hmanruate a tawk lo a; pawl lian leh pawl chak tak YMA leh tlawmngai pawl dangte puihna leh puih chhunzawmna sawrkar chuan a mamawh takzet a ni a ti. Mipui vantlang hnena Hrileng dona kawnga zawm tur leh fimkhur dan tur te zirtirna kawngah pawh YMA chu theihtawp chhuah zel turin a ngen a. Hriattur pawimawh leh thu rawn te an hnen atangin lo dawn chhunzawm zel a beisei thu CYMA hotute chu a hrilh bawk a ni. Mipui inzirtir nasat a la tul em em nachhan chu India rama cheng mipui zinga 50 % chauhin Hmaikawr(Mask) an vuah a; heng zinga tam zawk te chu vuah diklo an la nih zel thu a sawi a. Hmaikawr vuah, midang hlata awm tum hram hram, kut sil fai leh hrileng laka himna tur thil te zirtir kawngah YMA in theihtawp a chhuah chhunzawm a ngai a ni a ti.

Governor leh CYMA hotute inkawmna hunah hian Pu Vanlalruata, President hoin Pu Lalhmachhuana, Vice President, Prof.Lalnuntluanga, Gen Secretary, Dr.Malsawmliana, Asst. Secretary, Pu Fabian Lalfakawma, Treasurer leh Pu Roneihthanga, Finance Secretary te an tel a. CYMA hotute chuan Covid -19 hrileng rawn chhuah tirh atanga tun thlengin YMA chuan theihtawp chhuahin Hrileng do kawngah sawrkar a thlawp tlat thu an sawi a. Local/Village Level Task Force, Contact tracing, vaccine leh a tulna apiangah theih tawpin tan an la mek tih Governor chu an hrilh a. Covid -19 hrileng avanga harsatna piah lamah tunah hian ram kang, tui hna kang chat avanga tui in tur harsa mek pawhin Mizoramin a tawk mek tih an sawi a. Mizoram ramah Court thutlukna leh mimal thenkhat hmalakna avanga Riverine Reserved Forest( Luikama ramngaw humhalh) a awm tak loh thu sawiin pawi an tih thu te; hei hian Mizoram dung leh vanga lui tui te a ti kang chat mek nia an hriatthhu te an sawi a. He mi chungchang hi Governor chuan lo bih chian a, a tul anga hmalakpui a tum thu sawiin hmun dangah chuan luipui dunga ramngaw te chu dan khirh takin a humhalh vek nia a hriat thu a sawi a ni. 

Attachment

  • Loading attachment...