Tun thla February ni 23 & 24, 2016-ah Lunglei, Saiha leh Lawngtlai District-a chengte tan Lunglei-a Indian Air Force lakna neih tur chungchangah vawiin khan Lunglei DC Pu Abhijit Vijay Chaudhari hovin a office chamber-ah a kaihhnawih Department.hotute an thukhawm.

Meeting-ah hian Sipai lakna neih a nih huna tui in tur thianghlim supply dan tur leh power supply chungchangte bakah interview buaipui tur Army officers te lo dawnsawn dan turte sawiho a ni a, Indian Air Force te hian Airmen lakna interview hi February ni 23 leh ni 24 hian Govt. HSS Lunglei leh 2nd Bn.MAP, Luangmual-ah an nei dawn ang a. Written test hi February ni 23-ah Govt. HSS-ah neiin Physical test hi a tuk February ni 24-ah Luangmual-ah neih a ni ang, Interview-naa tling ten July thla chhungin Medical Exam an nei leh dawn a ni.

Air Force Airmen diltute chu August.ni 1, 1996 atanga November ni 30, 1999 inkara piang, kum 21 aia upa lo, mipa (nupui la neilo) leh Pawl 12 pass, mark zaa 50% hmu chin an ni tur a ni a. San zawng 152.5 cms & above niin diltute chuan Sainik Welfare Office, Lunglei atangin 'Consent Certificate' lak tur a ni.