Mizoram Sports Minister Pu Zodintluanga chuan Union Sports Minister Dr.M.S.Gill leh Indian Women Hockey Federation President Pi Vidya Stokes te chu lehkha thawnin kumina World Cup Women Hockey, Boston USA a India team tel tur zingah Mizo nula Lalremruati chu chhan tha tawk awm lova thlauh thlak tumna a awm nia a hriat thu leh hemi chungchangah hian inrawlh turin a ngen.

Minister chuan a lehkhathawn ah hian Lalremruati leh Manipur nula 3 te chu India team atangin chhan tha tawk awm lova thlauh thlak tumna a awm chhan chu Selection Committee in heng mi 4 te aiah hian Haryana nula te thun an duh vang tih mi rintlak tak hnen atangin a hria tih a tarlang a. Lalremruati hian 4 Nations U-18 International Cup 2006 Japan, 3 Nations International Cup 2007 Italy leh Junior World Cup Qualifying 2008 Malaysia ah te a khelh tawh laiin Haryana player te hi Asian Cup hnuhnung berah pawh India team a tello an ni, a ti a.

Manipuri Weightlifter pakhat Dope Test vanga Beijing Olympic a tel thei lova siam  tak chungchang pawh tarlangin Sports Minister chuan a lehkhathawnah India ram infiamna khawvelah thil diklo awm thin siam tha turin Union Sports Minister leh Indian Women Hockey Federation President te hi a ngen a ni.