1317/2024-2025

Dated Aizawl, the 25th July, 2024: Vawiin khan Pu DP Vidyarthy, Chief General Manager, LPG, Indian Oil AOD, State Office chuan Chief Minister Pu Lalduhoma chu a office ah Gas bur thar (composite cylinder) a hlan a. Heng bur a hlan te hi cabinet Ministers te hman tur niin Chief Minister leh Supply Minister hnenah hian an hman tur bik an lo pe tawh a ni. Chief Minister hi Pu B. Lalchhanzova, Supply Minister chuan a tawiawm.

Chief Minister hian hun engemaw chen hman lohva awm tawh Mualkhang Gas Bottling Plant siam tharna tur leh Oil Depot thar siamna tura an hmalakna te avangin lawmthu a lo hrilh a. Oil Depot phei chu Mizoram mipuiten kan nghakhlel tawh a, chak takin hma la ula, puih in ngaihna apianga pui tur che uin kan inpeih reng a ni, a ti.

Pu DP Vidyarthy hian Mualkhanga Bottling Plant chu nitin bottle 6000 chuang thun theihna tura an thuam that chhoh tur thu a sawi a. Chu chu Mizoram nitin mamawh zat aiin a tam zawk a ni, a ti. Oil Depot siamna tur hmun hi pali an thlithlai mek a, hun reiloteah duh an thlang fel mai tawh dawn tih sawiin a hmun a fel chuan hma pawh kan la nghal mai ang. Gas Composite Cylinder hi a zang zawk a, a himin enkawl a awlsam a, a puak thei lova (explosion proof), a tha zawk em em a ni. Mipuiten an Indane distributor ah theuh ngaihven se kan duh a, company lam chu kan inpeih tawh a ni, a ti. Tin, gas sem dan kalphung fel fai leh mipuite tana awlsam zawk tur an buaipui mek thu pawh Chief Minister hi an hrilh a ni.