1318/2024-2025

Mamit 25th July, 2024 : Vawiin khan DC Conference Hall, Mamit-ah Pu Jacob Lalawmpuia, District Bawrhsap kaihruaina-in Independence Day, 2024 hman dan tur rela thutkhawm a ni.

Kumin Independence Day Ni 15th August, 2024 lawmna hi GSA Playground-ah zing dar 10:00 hman nise tih a ni a, hnam puanzar pawtpharh tur hian Mizoram Sawrkarin a ruahman angin Pu Lalthansanga, Minister, EF & CC etc. chu a ni ang. I-Day lawmnaah hian parade contingents 15 tel tura beisei an ni a, zing ni chhuah rualin sawrkar building-ah te zah taka hnam puanzar zar nise tih a ni bawk.

Independence Day-2024 hlawhtling leh ropui taka hman a nih theih nan Sawrkar Department hrang hrangte mawhphurhna leh chanvo pek an ni.

District Bawrhsap chuan meeting kalte chungah lawmthu sawiin Independence Day hlawhtling taka hman a nih theihna tura Department hrang hrangte chanvo leh mawhphurhna kan inpek theuhte tihlawhtling theuh turin a chah bawk a ni.

Vawiin meeting-ah hian Sawrkar Officials, tlawmngaipawl aiawh, khawtlang hruaitu, Zirna In hrang hrang aiawhte leh thutharthehdarhtute an tel a ni.