Rampum huapa VeterinaryDoctor-te intelkhawmna Indian Veterinary Association (IVA) Mizoram Chapter chu nikum khan Aizawl-ah din tan ve niin hemi puala intawhkhawmna hmasa ber chu vawiin khan College of Vety. Science & AH, Selesih-ah neih a ni a, Agriculture Minister Pu H.Liansailova’n a hmanpui a ni.

He IVA (Mizoram) General Body Meeting hawnna inkhawm hmasa ber hi an Vice-President Dr. Daniel Chianghnuna chuan a kaihruai a, khawmpui thupui ‘One Health’ chungchang hrilhfiahna leh sawizauna Dr. Lallawmzuali Ralte, Asst. Professor, Dept. of Vety Public Health & Epidemiology in a nei a ni.

Khuallian Agriculture Minister Pu H.Liansailova chuan thupui thlanchhuah ‘One Health’ - hrisel tlan vek pawimawhzia tarlangin tunlai khawvelah hian mihring te natna veitirtu natna hrik (microbes) 1,415 zingah zaa 61% zet hi ran atanga kai a ni tih hmuhchhuah a ni a, chuvangin mihringte hriselhna kawngah hian kan chhehvel boruak leh nungcha, nitina kan sa ei te an thianghlim tawk a tul a ni, a ti. Khuanu rel angin mihring, rannung/ransa leh kan chhehvel leilung boruak te hi inmamawh tawn leh inkungkaih vek - tumah inthlauhthla tur chuang bik awm lova siam kan nih avnginmihring hrisel tur chuan a lova kan awm theih loh kan sa ei tur leh bawnghnute te pawh an thianghlim a ngai a, chutiang bawkin anni pawhin thlai hrisel leh thianghlim an mamawh chhawng ve zel a ni, a ti. Mizoramah bik phei chuan kan ranvulhte nen kan inngheng hnai em avangin kan fimkhur leh zual tul hle nia a hriat thu a tarlang tel bawk. Agriculture Minister chuan he College inrelbawl dan leh ran hriselna tura an hnathawh hrang hrangte a hmuna a hmuhpui thu sawiin a bik takin tun hnaia vawk pul hri leng sukiang tura theihtawp an lo chhuah dan te chu a fak a. Hun kal zel turah pawh an thiamna leh hmanrua te chu State Vety. Department nen pheikhairual taka an thawhho chhunzawm zel chuan Mizoram khawtlang nun langsar tak ranvulh pawh hian hmasawnna namen lo a rahchhuahpui ngei ang, a ti.

He huna thu sawitu AH&Vety. Director Dr.L.B.Sailo chuan ran leh mihring inkara natna inkaichhawn thei a tamzia hriain Department chuan a mamawh em em Polyclinic Hospital chu an sak mek thu te, District hrang hranga Vety. Hospital leh Dispensary te tih changtlun mek thu te leh Canada atanga vawk chi tha mi chawk luh an tum mek dan te a sawi a. Kum tina Mizoramin artui a eiral chu nuai 389 vel nia chhut niin hemi zinga nuai 150 vel lek hi tualchhung tharchhuah a ni tiin artui leh ar note tharchhuah tihpunna turin Tanhril-ah nasa taka tan lak a ni a, artui nuai 400 leh ar note pawh 41,000 zet kumtin tharchhuah theih tura hisap a ni, a ti. FMD leh Swine Flu venna kawngah Vaccine Programme kalpui mek a nih thu leh ramrihrul khuaah te Animal Checkgate khauh taka kalpui tum a nih thu a sawi bawk.

Indian Veterinary Association (IVA) Mizoram Chapter din a nih dan leh he pawl hian Mizoram Veterinary Service Association hmalakna te a kawlkalh loh dan leh rampum huapa an thawhho dan tur tlangpui chu he inkhawm kaihruaitu Dr. Daniel Chianghnuna chuan thuhma a sawinaah a tarlang tel a. IVA hi World Veterinary Association leh CommonWealth Veterinary Association te nen inthlunzawm vek pawl ngelnghet tak a ni.Tun dinhmunah Mizoram State Veterinary Council hnuaiah hian ran doctor 225 zet an inziak lut tawh a, vawiinah hian IVA (Mizoram) hruaitu thar tur an thlang nghal dawn a ni.

IVA Mizoram Chapter chuan kumhnih chhunga an pawl hruaitu atan heng mite hi an thlang:- President ah Dr Saingura Sailo; Vice-President ah Dr. Daniel Chianghnuna; General secretary ah Dr Robert Rualthankhuma; Asst. General Secretarty ah Dr C Lalmuanthanga; Financial secretary ah Dr Kawlthanmawia leh Treasurer atan Dr Zosangpuii te an thlang a ni.