Chief Minister Pu Lal Thanhawla chuan vawiin khan Thenzawla Joint YMA Hall, Bazar Vengah AMFU General Assembly vawi 15 na a hmanpui.

Chief Minister chuan sorkar leh AMFU in phur taka thawhhona an nei thei chu lawmawm a tih thu a sawi a, kan hnam dinchhuahna tur hnar anih ngei a beisei awm a ni, a ti. Pu Lal Thanhawla chuan a pa hnen atanga Agriculture, Horticulture leh kuthnathawktute pawimawh zia a zirchhuah thu sawiin, ei leh bara intodelh tur chuan kuthnathawktu lo nei mite leh michanhai miretheiten lei rem an rah a, khaweng an hmuh hi a pawimawh hmasa ber a ni, a ti a. Heng mite hi chawikanga eizawnna ngialnghet an neihna turin sorkar chuan NLUP a kalpui a, NLUP sumte hi thil dang atan hman a thiang lova, chutiangin central atanga sum lokalte hi NLUP atan hman a thiang bawk lo a ni, a ti. NLUP hlawhtling turin central sorkar in min duan sak a. Sum kan dil aia tam min pe a, chuvangin a dawngtuten an mawhphurhna hrechiang a, neitu rilru leh taimakna, rinawmna, dikna leh Pathian tihna nen an kal a ngai a ni a ti. Hnam changkang leh duhawm ni tur chuan kan intodelh a ngai a ni a ti.

Chief Minister chuan central sum atanga project din tur chungchangah state sorkar in thuneihna a nei lo a ni, a ti a, NIT pawh Thenzawlah dah duh mah ila a hmun chu airport atanga darkar 2 chhunga thlen theih tur anih avangin kan thuneihna piah lam a ni, a ti a. Pu Hawla chuan kan awmna apiang hi Pathian in a rawngbawl tura min dahna a ni a, tui takin kan thawk tur a ni, a ti. Mizote hi kohhran mi vek ni chung hian kut tling lova sum lak kan pawisa lova, hei hian project lian kan neih tur rel kawng te, Bay of Bengal a chhuah-ka kan neih tura kawngpui siamte hi a thuanawp phah mai ang tih a hlauhawm a ni, a ti a. Chuvangin kan vai hian a chhelai siamthatu tur kan ni a, kan mamawh ber chu rinawmna, tumruhna, taimakna , dikna leh Pathian tihna a ni a ti.

Thenzawl Forest Division chhunga ramsa in thlai huan a tih chhiat sak a neitu mi 12 te hnenah State Wildlife Board Chairman a nihna angin Chief Minister hian zangnadawmna a hlan a. Ramsa in thlai huan 1 hectare a zau a tih chhiat hian dan angin Rs. 2000/- zangnadawmna pek theih a ni.

Assembly ah hian AMFU President Pu R. Lalduhawma pawhin thusawiin AMFU din tirh anih laia ngaihsak a hlawh loh thin thu a sawi a. Tunah chuan sorkar-in kuthnathawktute pawimawhna leh tanpui an ngaihna rawn hriain ngaihsak an hlawh tawh hle a, sorkar flagship programme NLUP pawh tha kan tiin kan thlawp tlat a ni, a ti.

Assembly inkhawm thenkhatna hi AMFU Vice President Pu Joseph H. Thanzuala’n a kaihruai a, chawhnu lamah district tin atanga report ngaihthlakna neih a ni bawk. Naktukah assembly hi chhunzawmin MJA Serchhip-in kum 2013 – 2016 chhung atana an hruaitu tur thlanna an neihpui ang. Assembly ah hian District leh Sub-Division atangte in palai an kal tha hle a, hall an khat tlat a ni.

Chief Minister hi a nupui Pi Lal Riliani leh Serchhip DC Pi Juhi Mukherjee, IAS te an tawiawm a ni.